ខេត្តព្រះសីហនុ៖ សមត្ថកិច្ចនគរបាលខេត្តព្រះសីហនុ កំពុងស្រាវជ្រាវករណីមនុស្ស៣នាក់ នៅលើទូកនេសាទមួយគ្រឿង ដែលមានមនុស្សម្នាក់ស្លាប់ និង២នាក់ទៀតបាត់ខ្លួនមិនទាន់ដឹងមូលហេតុ។
របាយការណ៍បឋមពីសមត្ថកិច្ច បានបញ្ជាក់ថា សាកសពបុរសជាកម្មករនេសាទម្នាក់ ត្រូវបានគេប្រទះឃើញជាប់មង នៅចំណុចជិតកោះថាស ក្នុងខេត្តព្រះសីហនុ កាលពីព្រឹកថ្ងៃទី៣ ខែមីនា ឆ្នាំ២០២០។ សមត្ថកិច្ចបន្តថា ការរកឃើញសាកសពខាងលើនេះ បានកើតឡើង ក្រោយពេលមានសេចក្តីរាយការពីប្រជាពលរដ្ឋមកថា មានករណីបាត់ខ្លួនកម្មករនេសាទ លើទូកជាមួយគ្នាចំនួន ៣នាក់ ក្នុងពេលចេញទៅធ្វើរបរនេសាទ កាលពីថ្ងៃទី១ ខែមីនា ឆ្នាំ២០២០។
ប្រភពពីម្ចាស់ទូកឈ្មោះលី គីមលី ភេទស្រី អាយុ៣៧ឆ្នាំ ជនជាតិខ្មែរ រស់នៅក្រុម២៧ ភូមិ៣ សង្កាត់លេខ១ ក្រុងព្រះសីហនុ បានរាយការណ៍ប្រាប់សមត្ថកិច្ចថា ក្រោយបាត់ដំណឹង ទាំងទូកនិងកម្មករនេសាទសរុបមានគ្នា៣នាក់ ហើយលោកស្រី បានរកឃើញទូក របស់គាត់ ជាប្រភេទទូក BE នៅឯថ្មស ក្នុងខេត្តកោះកុង ប៉ុន្តែគ្មានឃើញកម្មករនិងអ្នកបើកបរទូកនៅទីនោះទេ។
ស្ត្រីដដែលបន្តថា បន្ទាប់ក្រោយមកក៏មានអ្នកអ្នកនេសាទផ្សេងទៀត បានប្រាប់គាត់ថា បានឃើញសាកសពបុរសម្នាក់ជាប់មង អ្នកនេសាទនៅខាងជើងកោះថាសក្នុងខេត្តព្រះសីហនុ រួចក៏ត្រូវបានគេអូសយកមកដីគោក ទើបរាយការណ៍ជូនសមត្ថកិច្ច។
សមត្ថកិច្ចបន្តថា ក្រៅពីសាកសពបុរសម្នាក់ខាងលើនេះ នៅបាត់មនុស្សលើទូកចំនួន២នាក់ទៀត មានឈ្មោះ៖ ១- ឈ្មោះ ណែម ពឿន ភេទប្រុស អាយុ ២៣ឆ្នាំ ជនជាតិខ្មែរ មុខរបរ បើកបរទូក មានទីលំនៅក្រុម២៧ ភូមិ៣ សង្កាត់លេខ១ ក្រុងព្រះសីហនុ។ ២- ឈ្មោះ សុខ វណ្ណៈ ភេទប្រុស អាយុ ៣២ឆ្នាំ ជនជាតិខ្មែរ មុខរបរកម្មករនេសាទ ស្នាក់នៅលើទូកនេសាទ។ ចំណែកសាកសព បុរសឈ្មោះ រ៉ា ហៅខ្មៅ ភេទប្រុស អាយុ៣៣ឆ្នាំ ជនជាតិខ្មែរ មុខរបរកម្មករនេសាទស្នាក់នៅលើទូកនេសាទ។
ទាក់ទងបញ្ហានេះ សមត្ថកិច្ចជំនាញស្ថាប័នពាក់ព័ន្ធ កំពុងធ្វើកោសល្យវិច័យពិនិត្យ និងស្រាវជ្រាវទៅលើករណីលិចទូកនេសាទ និងការបាត់ខ្លួនបុរសអ្នកនេសាទពីរនាក់ផ្សេងទៀត។
យ៉ាងណាក៏ដោយចុះ ភ្លាមៗនេះ សមត្ថកិច្ចនគរបាលខេត្តព្រះសីហនុ នៅមិនទាន់អាចបញ្ជាក់រឿងហេតុពិតប្រាកដ នៃគ្រោះថ្នាក់ខាងលើនេះថាបែបណានៅឡើយទេ៕ ដោយ៖ ដែន សីមា