ត្បូងឃ្មុំ៖លោកឧបនាយករដ្ឋមន្ត្រី ជា សុផារ៉ា បានស្នើឲ្យរដ្ឋបាលខេត្តត្បូងឃ្មុំ និងក្រុមការងាររាជរដ្ឋាភិបាលចុះមូលដ្ឋានខេត្តត្រូវរួមគ្នាបង្ការទប់ស្កាត់ឲ្យបានទាន់ពេលវេលានិងមានប្រសិទ្ធភាពនូវសកម្មភាពរឺការផ្សព្វផ្សាយព័ត៌មានមិនពិត ការញុះញង់អុជអាលប៉ុនប៉ងបង្កឲ្យមានអំពើហឹង្សា ភាពចលាចលវឹកវរអសន្តិសុខក្នុងសង្គម។
នៅនៅសាលាខេត្តត្បូងឃ្មុំលោកជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអញ្ជេីញជាអធិបតីក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០១៩ និងលេីកទិសដៅការងារឆ្នាំ២០២០ របស់រដ្ឋបាលខេត្តត្បូងឃ្មុំ និងក្រុមការងាររាជរដ្ឋាភិបាលចុះមូលដ្ឋានខេត្តនេះ។
ក្នុងឱកាសនោះ លោកឧបនាយករដ្ឋមន្ត្រី ជា សុផារ៉ា បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំគ្រប់លំដាប់ថ្នាក់នៃរដ្ឋបាលខេត្តត្បូងឃ្មុំនិងក្រុមការងាររាជរដ្ឋាភិបាលចុះមូលដ្ឋានខេត្តនេះ មន្ត្រីរាជការ កងកម្លាំងមានសមត្ថកិច្ចទាំងអស់ដែលបានប្តេជ្ញាចិត្តរួមគ្នាក្នុងការបំពេញតួនាទីភារកិច្ចប្រកបដោយការទទួលខុសត្រូវសម្រេចបាននូវសមិទ្ធផលលើគ្រប់វិស័យ ចូលរួមថែរក្សាសន្តិភាពស្ថេរភាពនយោបាយសន្តិសុខសណ្តាប់ធ្នាប់សាធារណៈ លើកកម្ពស់លទ្ធិប្រជាធិបតេយ្យសេរីពហុបក្ស និងជំរុញការអភិវឌ្ឍសេដ្ឋកិច្ចសង្គមសំដៅលើកកម្ពស់ជីវភាពរស់នៅនិងបន្តកាត់បន្ថយភាពក្រីក្ររបស់ប្រជាពលរដ្ឋ ជាពិសេសការខិតខំប្រឹងប្រែងរួមគ្នាក្នុងការបង្ការទប់ស្កាត់ប្រកបទៅដោយជោគជ័យនូវគំរោងផែនការធ្វើរដ្ឋប្រហារប៉ុនប៉ងផ្តួលរំលំរាជរដ្ឋាភិបាល ផ្លាស់ប្ដូររបបនៅកម្ពុជាក្រោមឧបាយកលនៃផែនការវិលត្រឡប់របស់ឧទ្ទាមក្រៅច្បាប់មួយក្តាប់តូចកាលពីថ្ងៃទី៩ខែវិច្ឆិកាឆ្នាំ២០១៩កន្លងមកនេះ ហើយបន្តរក្សាបានយ៉ាងគត់មត់នូវសុខសន្តិភាពស្ថេរភាពនយោបាយស្ថេរភាពសង្គមសន្តិសុខសណ្តាប់ធ្នាប់សាធារណះនិងការអភិវឌ្ឍសង្គមលើគ្រប់វិស័យ។ជាក់ស្តែងក្នុងឆ្នាំ២០១៩កន្លងទៅនេះកម្ពុជានៅតែសំរេចបានកំណើនសេដ្ឋកិច្ចខ្ពស់ក្នុងរង្វង់៧,១%។ជាមួយនឹងការប្រមូលចំណូលថវិកាជាតិកើនឡើងលើសគម្រោងផែនការប្រមាណ១៦០០លានដុល្លារសហរដ្ឋអាមេរិកហើយអត្រានៃភាពក្រីក្របានស្ថិតនៅអត្រាទាបជាង១០%។ការកែទំរង់នានាត្រូវបានជំរុញអនុវត្តយ៉ាងសកម្មស្របតាមយុទ្ធសាស្ត្រចតុកោណដំណាក់កាលទី៤ដើម្បីបង្កើននូវប្រសិទ្ធិភាពការងារ សក្តិសិទ្ធភាពនៃការផ្តល់សេវាសាធារណះ ការអភិវឌ្ឍសេដ្ឋកិច្ចសង្គមនិងការលើកកំពស់ជីវភាពរស់នៅរបស់ប្រជាពលរដ្ឋអោយបានកាន់តែប្រសើរឡើងថែមទៀត។លើមូលដ្ឋាននៃសមិទ្ធផលទាំងនេះ បញ្ហាប្រឈមដែលនៅសេសសល់និងដោយផ្អែកលើទិសដៅការងារឆ្នាំ២០២០ទាំងកិច្ចការគ្រប់គ្រងរដ្ឋបាល ការអភិវឌ្ឍខេត្តនិងកិច្ចការរបស់ក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំនោះ ក្នុងនាមរាជរដ្ឋាភិបាលកម្ពុជា ក្រសួងមហាផ្ទៃនិងក្នុងនាមឯ.ឧផ្ទាល់ ឯ.ឧឧបនាយករដ្ឋមន្ត្រីជា សុផារ៉ាបានណែនាំនូវកិច្ចការសំខាន់ៗដែលត្រូវរួមគ្នាខិតខំសំរេចអោយបានក្នុងឆ្នាំ២០២០ដូចជា ១.ការពង្រឹងសន្តិភាពនិងស្ថេរភាពនយោបាយ: រាជរដ្ឋាភិបាលកម្ពុជាបានផ្តល់នូវគុណតំលៃខ្ពស់បំផុតចំពោះការថែរក្សាសន្តិសុខសន្តិភាពស្ថេរភាពនយោបាយ ការពង្រឹងនិងពង្រីកដំណើរការលទ្ធិប្រជាធិបតេយ្យសេរីពហុបក្ស ការលើកស្ទួយសិទ្ធសេរីភាពគ្រប់បែបយ៉ាងរបស់ប្រជាពលរដ្ឋស្របតាមរដ្ឋធម្មនុញ្ញនិងច្បាប់ជាធរមានដែលជាមូលដ្ឋាននៃការអភិវឌ្ឍប្រទេសជាតិប្រកបដោយចីរភាពនិងភាពសុខដុមរមនាក្នុងសង្គម។លើមូលដ្ឋាននេះគណៈបញ្ជាការឯកភាពគ្រប់ថ្នាក់ត្រូវបង្កើនការគ្រប់គ្រងសភាពការណ៍តាមមូលដ្ឋាននិងដាក់ចេញនូវវិធានការនានាសំដៅទប់ស្កាត់រាល់សកម្មភាពដែលប៉ុនប៉ងបង្កអសន្តិសុខ ភាពចលាចលវឹកវរដល់សង្គមតាមគ្រប់រូបភាពនិងត្រូវរួមគ្នាទប់ស្កាត់ប្រឆាំងដាច់ខាតនូវចលនាឧទ្ទាមនិងសកម្មភាពបដិវត្តន៍ពណ៌។
ទន្ទឹមនេះត្រូវរួមគ្នាបង្ការទប់ស្កាត់អោយបានទាន់ពេលវេលានិងមានប្រសិទ្ធិភាពនូវសកម្មភាពរឺការផ្សព្វផ្សាយព័ត៌មានមិនពិត ការញុះញង់អុជអាលប៉ុនប៉ងបង្កអោយមានអំពើហឹង្សា ភាពចលាចលវឹកវរអសន្តិសុខក្នុងសង្គមដោយត្រូវយកចិត្តទុកដាក់អប់រំណែនាំនិងបកស្រាយបំភ្លឺជូនប្រជាពលរដ្ឋអោយបានទាន់ពេលវេលានិងខិតខំបំផុសអប់រំប្រជាពលរដ្ឋអោយខិតខំគោរពច្បាប់ ចូលរួមការពារផលប្រយោជន៍សាធារណះ ផលប្រយោជន៍សហគមន៍និងត្រូវចៀសវៀងចូលរួមក្នុងសកម្មភាពទាំងឡាយណាដែលផ្ទុយពីច្បាប់និងប៉ះពាល់ដល់សន្តិសុខស្ថេរភាពនិងសណ្តាប់ធ្នាប់សាធារណះ។ជាមួយនេះអាជ្ញាធរគ្រប់លំដាប់ថ្នាក់ត្រូវយកចិត្តទុកដាក់គ្រប់គ្រងដោះស្រាយជំលោះនិងការទាមទារការតវ៉ានានាដោយសន្តិវិធីផ្អែកលើគោលការណ៍ច្បាប់និងត្រូវចៀសវៀងដាច់ខាតនូវអំពើហឹង្សាតាមគ្រប់រូបភាព។២.អំពីសន្តិសុខសណ្តាប់ធ្នាប់សាធារណះសុវត្ថិភាពសង្គម: អាជ្ញាធរនិងកងកំលាំងមានសមត្ថកិច្ចគ្រប់លំដាប់ថ្នាក់ត្រូវបន្តថែរក្សាពង្រឹងសន្តិសុខសណ្តាប់ធ្នាប់សាធារណះសុវត្ថិភាពសង្គមអោយបានល្អប្រសើរដោយត្រូវយកចិត្តទុកដាក់លើវិធានការសំខាន់ៗដូចជា បន្តជំរុញបំផុសចលនាមហាជន ចូលរួមក្នុងការអនុវត្តគោលនយោបាយភូមិឃុំមានសុវត្ថិភាពអោយបានជាប់ជាប្រចាំនៅគ្រប់មូលដ្ឋានដើម្បីបង្ការទប់ស្កាត់និងបង្ក្រាបបទល្មើសនានានៅតាមមូលដ្ឋានរបស់ខ្លួនដូចជាសកម្មភាពលួចឆក់ប្លន់ បទល្មើសគ្រឿងញៀនខុសច្បាប់ ល្បែងស៊ីសងខុសច្បាប់ ការជួញដូរមនុស្សនិងសកម្មភាពក្មេងទំនើងជាដើម ត្រូវខិតខំពង្រឹងសមត្ថភាពជំនាញវិជ្ជាជីវៈរបស់នគរបាលក្រុងស្រុកឃុំសង្កាត់និងលើកកំពស់ការប្រាស្រ័យទាក់ទងរវាងអាជ្ញាធរកងកំលាំងនគរបាលនិងកងកំលាំងមានសមត្ថកិច្ចនានាជាមួយប្រជាពលរដ្ឋតាមរយះការលើកកំពស់ប្រសិទ្ធិភាពក្នុងការផ្តល់សេវាអត្តសញ្ញាណបណ្ណសញ្ជាតិខ្មែរ សៀវភៅគ្រួសារ សៀវភៅស្នាក់នៅនិងលិខិតស្នាមនានាព្រមទាំងការចុះជួយដោះស្រាយការលំបាកនានារបស់ប្រជាពលរដ្ឋនៅពេលជួបគ្រោះធម្មជាតិរឺគ្រោះថ្នាក់នានានិងនៅពេលប្រជាពលរដ្ឋជួបទុក្ខលំបាកខ្វះខាតក្នុងជីវភាពពិសេសជនក្រីក្រនិងជនរងគ្រោះសំដៅជំរុញលើកទឹកចិត្តប្រជាពលរដ្ឋអោយចូលរួមចលនាគោលនយោបាយភូមិឃុំមានសុវត្ថិភាព។គណះបញ្ជាការឯកភាពរដ្ឋបាលខេត្តក្រុងស្រុកត្រូវពង្រឹងរបៀបរបបការងារការប្រជុំ ការដឹកនាំសម្របសម្រួលកំលាំងមានសមត្ថកិច្ចនានាក្នុងការតាមដាននិងវាយតំលៃសភាពការណ៍សន្តិសុខក្នុងមូលដ្ឋានរបស់ខ្លួនដើម្បីរៀបចំផែនការសកម្មភាពនិងវិធានការនានាសំដៅពង្រឹងសន្តិសុខសណ្តាប់ធ្នាប់របៀបរៀបរយសាធារណះនិងសុវត្ថិភាពសង្គមនៅគ្រប់មូលដ្ឋានទូទាំងខេត្តត្បូងឃ្មុំប្រកបដោយប្រសិទ្ធិភាព ត្រូវបន្តជំរុញយុទ្ធនាការប្រយុទ្ធប្រឆាំងគ្រឿងញៀនខុសច្បាប់អោយកាន់តែសកម្មព្រមៗគ្នាទាំងនៅក្នុងទីក្រុងនិងជនបទដោយប្រឹងប្រែងជំរុញការផ្សព្វផ្សាយអប់រំណែនាំដល់ប្រជាពលរដ្ឋគ្រប់មជ្ឈដ្ឋានពិសេសស្រទាប់យុវជនអោយចៀសវាងឆ្ងាយពីគ្រឿងញៀន ត្រូវបន្តជំរុញអនុវត្តវិធានការបោសសំអាតការជួញដូរចែកចាយនិងការប្រើប្រាស់គ្រឿងញៀនខុសច្បាប់នៅតាមទីតាំងសប្បាយស្ថាននានានិងបន្តរុករកទីតាំងលួចលាក់ជួញដូរចែកចាយប្រើប្រាស់គ្រឿងញៀននៅតាមទីតាំងនានាតាមលំនៅស្ថានសំដៅបោសសំអាតនូវសកម្មភាពគ្រឿងញៀនខុសច្បាប់តាមមូលដ្ឋាននិមួយៗ។មន្ត្រីនិងកងកំលាំងមានសមត្ថកិច្ចគ្រប់ថ្នាក់មិនត្រូវមានការពាក់ព័ន្ធនឹងបញ្ហាគ្រឿងញៀនខុសច្បាប់ជាដាច់ខាតហើយប្រធានអង្គភាពរឺស្ថាប័នត្រូវមានវិធានការវិន័យនិងវិធានការច្បាប់ចំពោះមន្ត្រីរឺកងកំលាំងណាដែលប្រព្រឹត្តសកម្មភាពពាក់ព័ន្ធនឹងគ្រឿងញៀនខុសច្បាប់អោយបានម៉ឺងម៉ាត់ជាដាច់ខាត។ឆ្នាំ២០១៩កន្លងមកនេះគ្រោះថ្នាក់ចរាចរណ៍មានការកើនឡើង ធ្វើអោយចំនួនមនុស្សស្លាប់និងរងរបួសមានការកើនឡើងយ៉ាងគំហុកប៉ះពាល់ដល់អាយុជីវិតទ្រព្យសម្បត្តិសាធារណះនិងទ្រព្យសម្បត្តិប្រជាជនជាច្រើនដូច្នេះដើម្បីដោះស្រាយបញ្ហាប្រឈមនេះគណះកម្មការជាតិសុវត្ថិភាពចរាចរណ៍ផ្លូវគោកបានប្រកាសកំណត់យកឆ្នាំ២០២០ជាឆ្នាំរឹតបន្តឹងការអនុវត្តច្បាប់ចរាចរណ៍ផ្លូវគោកទូទាំងប្រទេសអោយបានម៉ឺងម៉ាត់បំផុតដើម្បីកាត់បន្ថយអត្រាគ្រោះថ្នាក់ចរាចរណ៍អោយបានជាអតិបរមាហេតុនេះកងកំលាំងនគរបាលចរាចរណ៍ត្រូវធ្វើការបន្តឹងការអនុវត្តច្បាប់ចរាចរណ៍អោយបានតឹងរ៉ឹងដោយមិនត្រូវមានការយោគយល់និងលើកលែងនោះឡើយ ត្រូវពង្រឹងសមត្ថភាពជំនាញវិជ្ជាជីវះដល់កងកំលាំងនគរបាលចរាចរណ៍ដើរទន្ទឹមនឹងការពង្រឹងការគោរពវិន័យក្រមសីលធម៌វិជ្ជាជីវៈ បង្កើនការផ្សព្វផ្សាយនិងអប់រំដល់ប្រជាពលរដ្ឋអោយគោរពច្បាប់ចរាចរណ៍ផ្លូវគោក។ ថ្នាក់ដឹកនាំនិងមន្ត្រីរាជការកងកម្លាំងមានសមត្ថកិច្ចទាំងអស់ត្រូវធ្វើជាគំរូល្អដល់ប្រជាពលរដ្ឋក្នុងការគោរពអនុវត្តច្បាប់ចរាចរណ៍ផ្លូវគោក អាជ្ញាធរខេត្តត្រូវដឹកនាំមន្ទីរអង្គភាពជំនាញពិនិត្យនិងរៀបចំភ្លើងសញ្ញាចរាចរណ៍ ការរៀបចំដាក់តាំងស្លាកផ្សាយពាណិជ្ជកម្មតាមដងផ្លូវសាធារណៈនានាអោយមានសណ្តាប់ធ្នាប់ដោយត្រូវផ្តល់អាទិភាពជាចម្បងដល់ការដាក់តាំងស្លាកសញ្ញាចរាចរណ៍និងខិតខំរៀបចំសណ្តាប់ធ្នាប់តាមដងផ្លូវសាធារណៈ រៀបចំយានយន្តដើម្បីសម្រួលដល់ការធ្វើចរាចរណ៍ប្រកបដោយសុវត្ថិភាព ត្រូវពង្រឹងការគ្រប់គ្រងនិងចុះបញ្ជីជនបរទេសដែលមកស្នាក់នៅធ្វើការងារនិងទេសចរណ៍ក្នុងភូមិសាស្ត្ររបស់ខ្លួននិងត្រូវចាត់វិធានការលើជនបរទេសណាដែលស្នាក់នៅខុសច្បាប់ស្របទៅតាមច្បាប់និងលិខិតបទដ្ឋានគតិយុត្តិនានាជាធរមាននៃព្រះរាជាណាចក្រកម្ពុជា ត្រូវការពារធនធានធម្មជាតិនិងទ្រព្យសម្បត្តិសាធារណៈ ដោយខិតខំលើកកម្ពស់វិធានការបង្ការទប់ស្កាត់បង្ក្រាបបទល្មើសព្រៃឈើបទល្មើសនេសាទនិងបទល្មើសធនធានធម្មជាតិគ្រប់ប្រភេទនិងត្រូវរួមគ្នាបង្កើនការផ្សព្វផ្សាយអប់រំបំផុសលើកទឹកចិត្តអោយសហគមន៍នៅមូលដ្ឋានចូលរួមការពារធនធានធម្មជាតិដីធ្លីនិងទ្រព្យសម្បត្តិសាធារណៈ។ ៣.អំពីការអភិវឌ្ឍសេដ្ឋកិច្ចសង្គមនិងទេសចរណ៍: រដ្ឋបាលខេត្តក្រុងស្រុកត្រូវជំរុញនិងអភិវឌ្ឍហេដ្ឋារចនាសម្ព័ន្ធរូបវន្ត័និងអរូបវ័ន្តសំរាប់បំរើដល់សកម្មភាពសេដ្ឋកិច្ចការវិនិយោគការធ្វើពាណិជ្ជកម្ម ទេសចរណ៍និងការប្រកបមុខរបររបស់ប្រជាពលរដ្ឋជាពិសេសលើវិស័យកសិកម្មដែលជាវិស័យដ៏មានសក្តានុពលរបស់ខេត្តដើម្បីបង្កើនប្រាក់ចំណូលរបស់ប្រជាពលរដ្ឋកាត់បន្ថយភាពក្រីក្រនិងជំរុញកំណើនសេដ្ឋកិច្ចជាតិ។ក្រៅពីនេះក៏នៅមានវិធានការអភិវឌ្ឍទីក្រុងរួមនឹងវិធានការទាក់ទងនឹងវិស័យជាច្រើនទៀតដើម្បីជាទិសដៅចង្អុរបង្ហាញអោយរដ្ឋបាលខេត្តក៏ដូចជាអាជ្ញាធរខេត្តត្បូងឃ្មុំត្រូវរួមគ្នាអនុវត្តអោយមានប្រសិទ្ធភាពសំដៅឲ្យខេត្តនេះកាន់តែមានការអភិវឌ្ឍរីកចម្រើនលើគ្រប់វិស័យក្នុងឆ្នាំ២០២០នេះនិងបំរើនូវសេចក្តីត្រូវការនិងផលប្រយោជន៍នានាជូនប្រជាពលរដ្ឋឲ្យបានពេញចិត្តពេញថ្លើមផងដែរ៕ ដោយ៖កូឡាប