សៀមរាប៖ សមត្ថកិច្ចបានឲ្យដឹងថា ជនសង្ស័យម្នាក់បានទាញដាវមកកាប់ជនរងគ្រោះ២នាក់បណ្តាលឲ្យរងរបួសធ្ងន់ ក្នុងករណីគំនុំសងសឹករបស់ក្រុមក្មេងស្ទាវ។ តែត្រូវកម្លាំងនគរបាលតាមឃាត់ខ្លួន។ នៅថ្ងៃទី០៣ខែមីនានេះ កម្លាំងនគរបាលជំនាញនសខេត្តសៀមរាប កំពុងកសាងសំណុំរឿងបញ្ជូនខ្លួនជនសង្ស័យខាងលើទៅសាលាដំបូងដើម្បីចាត់ការតាមផ្លូវច្បាប់។
ហេតុការណ៍នេះកើតឡើងនៅវេលាម៉ោង២០និង៣០នាទីថ្ងៃទី០១ ខែមីនា ឆ្នាំ២០២០ នៅវត្តត្រពាំងថ្ម ភូមិត្រពាំងថ្មឃុំតាសៀម ស្រុកស្វាយលើ ខេត្តសៀមរាប។
លោកឧត្តមសេនីយ៍ត្រី ភឹងចិន្តារ៉េត ស្នងការរងទទួលផែនកណ្តាលព្រហ្មទណ្ឌខេត្តសៀមរាប បានឲ្យដឹងថា កម្លាំងនគរបាលស្រុកស្វាយលើ បានឃាត់ខ្លួនជនស័ង្សយឈ្មោះ ឆាន់ សុភក្រ័ត្រា ភេទប្រុសអាយុ១៨ឆ្នាំ មានទីលំនៅអចិន្ត្រៃភូមិត្រពាំងថ្ម ឃុំតាសៀម ស្រុកស្វាយលើ ខេត្តសៀមរាប ករណីអំពើហិង្សាដោយចេតនាមានស្ថានទម្ងន់ទោស។
លោកបន្តថា ជនជនសង្ស័យ ឆាន់ សុភក្រ័ត្រា បានធ្វើសកម្មភាពយកដាវកាប់ទៅលើជនរងគ្រោះចំនួន២នាក់ ទី១-ឈ្មោះចាប ចិន ភេទប្រុស អាយុ២៦ឆ្នាំ មុខរបរកសិករ នៅភូមិរំដូល ឃុំស្រុកវ៉ារិន ស្រុកវ៉ារិខេត្តសៀមរាប ទី២-ឈ្មោះរឿន សុផាត ភេទប្រុស អាយុ២០ឆ្នាំ មុខរបរកាត់សក់ មានស្រុកកំណើតនៅភូមិក្បាលហុងថ្មី ឃុំល្វា ស្រុកចំការលើ ខេត្តកំពង់ចាម។ ស្នាក់នៅណ្តោះអាសន្នភូមិត្រពាំងថ្ម ឃុំតាសៀម ស្រុកស្វាយលើ ខេត្តសៀមរាប បណ្តាលឲ្យរបួសធ្ងន់។
លោកបន្ថែមថា អង្គហេតុនៃរឿង នៅយប់ថ្ងៃទី០១ ខែមីនា ឆ្នាំ២០២០ ជនរងគ្រោះទាំងពីរនាក់ខាងលើបាននាំគ្នាទៅដើរលេងកម្សាន្តកម្មវិធីដង្ហែផ្កាប្រាក់និងបំបួសនាគនៅវត្តត្រពាំងថ្ម ឃុំតាសៀម ស្រុកស្វាយលើ ពេលទៅដល់ជនរងគ្រោះឈ្មោះ រឿន សុផាត បានឃើញជនសង្ស័យ ឆាន់ សុភក្រ័ត្រា នៅទីនោះដែរ។ ពេលនោះជនរងគ្រោះក៏បានដើរទៅវាយជនសង្ស័យចំនួនមួយដៃ មូលហេតុនៃការវាយដោយសារនៅយប់ថ្ងៃទី២៩ ខែកុម្ភៈ ឆ្នាំ២០២០ បក្ខពួកជនសង្ស័យ បានវាយមកលើជនរងគ្រោះ តែជនរងគ្រោះមិនស្គាល់ក្រុមបក្ខពួកជនសង្ស័យនោះឡើយទើបមកដល់យប់ថ្ងៃទី០១ ខែមីនា ឆ្នាំ២០២០ ជនរងគ្រោះឃើញជនសង្ស័យក៏វាយសងសឹកវិញ។ ដោយឃើញសកម្មភាពជនរងគ្រោះរឿន សុផាតនិង ជនសង្ស័យ ឆាន់ សុភក្រ័ត្រា បានវាយគ្នាដោយដៃទៅវិញទៅមក ឃើញដូចនេះជនរងគ្រោះ ចាប ចិន បានចូលទៅឃាត់បំបែក ពេលនោះជនសង្ស័យ ឆាន់ សុភក្រ័ត្រា ក៏បានរត់ចេញពីកន្លែងវាយគ្នាសំដៅទៅម៉ូតូដែលគេ ចតទុកនៅក្បែរនោះហើយយកដាវដែលគេសៀតទុកនៅនឹងបាំងច្រវ៉ាក់ម៉ូតូយកមកកាប់ជនរងគ្រោះ ចាប ចិន ត្រូវ ចំដៃមួយដាវ ត្រូវចំក្បាលផ្នែកខាងក្រោយមួយដាវ ជនរងគ្រោះបានប្រាស់ខ្លួនរត់ចេញ។ បន្ទាប់មកជនសង្ស័យគេបន្តកាប់ទៅលើជនរងគ្រោះរឿន សុផាត ម្នាក់ទៀត ចំនួនប្រាំដាវទៀត ត្រូវចំចិញ្ចើមមួយ ដាវ ខ្នងមួយដាវ កដៃឆ្វេងមួយដាវ កែងដៃឆ្វេងមួយដាវ កែងដៃស្តាំមួយដាវពេលកាប់រួចជនសង្ស័យបានរត់កាន់ដាវគេចចេញពីទីនោះ។ បន្ទាប់មកកម្លាំងនគរបាលស្រុកស្វាយលើ បានសហការជាមួយប្រជាការពារតាមចាប់ជនសង្ស័យឃាត់ខ្លួនមកសួរនាំនៅអធិការដ្ឋាន។ ចំណែកជនរងគ្រោះបានបញ្ជួនទៅសង្គ្រោះបន្ទាន់នៅមន្ទីរពេទ្យបង្អែកខេត្តសៀមរាប។ តាមចម្លើយសារភាពជនសង្ស័យបានប្រព្រឹត្តសកម្មភាពដូចខាងលើពិតប្រាកដមែនហើយយើងបានធ្វើតេស្តទឹកនោមរកសារធាតុញៀនលទ្ធផលវិជ្ជមាន៕ ដោយ៖កូឡាប
