ចិននៅថ្ងៃពុធនេះ បានប្រកាសថា មានអ្នកស្លាប់ដោយសារវីរុសកូរ៉ូណាចំនួន ៣៨នាក់ ប៉ុន្តែតួលេខនៃអ្នកឆ្លងថ្មីមានការធ្លាក់ចុះ ៣ថ្ងៃជាប់គ្នា។
បច្ចុប្បន្ននេះ តួលេខនៃអ្នកស្លាប់សរុបនៅចិនកើនដល់ចំនួន ២.៩៨១នាក់ ខណៈដែលមានអ្នកឆ្លងសរុបច្រើនជាង ៨០.២០០នាក់។ នេះបើតាមការបញ្ជាក់របស់គណៈកម្មការសុខាភិបាលជាតិ។
មានការឆ្លងថ្មីត្រឹមតែ ១១៥ករណីប៉ុណ្ណោះនៅក្នុងខេត្តហូបេ កន្លែងដែលវីរុសមរណៈនេះបានផ្ទុះឡើងដំបូងកាលពីខែធ្នូ ឆ្នាំមុន។
តួលេខនៃអ្នកស្លាប់ និងឆ្លងថ្មី នៅក្នុងប្រទេសចិនបានធ្លាក់ចុះជាបន្តបន្ទាប់ក្នុងរយៈពេលប៉ុន្មានសប្តាហ៍ចុងក្រោយនេះ ប៉ុន្តែមានការព្រួយបារម្ភថា អាចនឹងមានការចម្លងថ្មីមកពីពិភពលោកខាងក្រៅវិញ ខណៈដែលមនុស្សចំនួន ១៣នាក់ត្រូវបានគេរកឃើញថាមានផ្ទុកវីរុសកូរ៉ូណា ក្រោយពេលត្រឡប់ចូលចិនពីប្រទេសផ្សេងៗ។
ខណៈការរាតត្បាតនៅចិន កំពុងថមថយ មានការផ្ទុះនៅកូរ៉េខាងត្បូង ក្នុងរយៈពេលប៉ុន្មានសប្តាហ៍នេះ ហើយរហូតមកដល់ពេលនេះ អ្នកឆ្លងវីរុសកូរ៉ូណានៅកូរ៉េខាងត្បូងកើនលើស ៥.៣០០នាក់ ខណៈអ្នកស្លាប់មាន ៣២នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
