សមាជិកសភាអ៊ីរ៉ង់យ៉ាងតិចចំនួន ២៣នាក់ត្រូវបានធ្វើតេស្តរកឃើញថា មានផ្ទុកវីរុសកូរ៉ូណា។ នេះបើតាមការបញ្ជាក់របស់មន្ត្រីអ៊ីរ៉ង់ នៅថ្ងៃអង្គារម្សិលមិញនេះ។
“រហូតមកដល់ពេលនេះ សមាជិកសភា ២៣រូបមានផ្ទុកវីរុសកូរ៉ូណា”។ នេះជាការបញ្ជាក់របស់អនុប្រធានសភា នៅក្នុងសេចក្តីប្រកាស។
លោកថ្លែងទៀតថា ការជួបជុំរវាងប្រជាពលរដ្ឋ និងសមាជិកសភា ត្រូវបានពន្យារពេលដោយមានការព្រួយបារម្ភពីសុខភាព។
អាជ្ញាធរអ៊ីរ៉ង់បានឲ្យដឹងនៅថ្ងៃច័ន្ទថា មនុស្សចំនួន ៦៦នាក់បានស្លាប់ដោយវីរុសកូរ៉ូណា ខណៈតួលេខនៃអ្នកឆ្លងសរុបមានច្រើនជាង ១.៥០០នាក់។
សូមបញ្ជាក់ថា បច្ចុប្បន្ននេះ ពិភពលោកកំពុងមានការព្រួយបារម្ភយ៉ាងខ្លាំងពីការរាតត្បាតនៃវីរុសដ៏កាចសាហាវ ដែលបានផ្ទុះចេញពីប្រទេសចិនកាលពីខែធ្នូ ឆ្នាំមុន ហើយមកដល់ពេលនេះ មានអ្នកស្លាប់ជាង ៣.០០០នាក់ និងឆ្លងជិត ១០០.០០០នាក់។ ប្រទេសជាង ៦០បានឆ្លងវីរុសមរណៈនេះ៕
អត្ថបទប្រែសម្រួលដោយ៖ សុភ័ក្រ
ប្រភព៖ AA.com