គិលានុបដ្ឋាយិកាជនជាតិចិនម្នាក់ បានកំពុងបង្កឲ្យមានការភ្ញាក់ផ្អើលនៅលើបណ្តាញសង្គម បន្ទាប់ពីនាងបានបង្ហោះរូបថតកាន់ក្រដាស១សន្លឹកស្នើរដ្ឋាភិបាលចិនរកមិត្តប្រុសម្នាក់ឲ្យនាង បន្ទាប់ពីការផ្ទុះមេរោគ Covid-19 បានដល់ទីបញ្ចប់។
Tian Fangfang គឺជាបុគ្គលិកម្នាក់ក្នុងចំនោមបុគ្គលិកពេទ្យជាច្រើននាក់ ដែលកំពុងប្រយុទ្ធនៅជួរមុខនៃការផ្ទុះជំងឺ Covid-19 បានបង្ហោះរូបភាពស្លៀកឈុតហាំម៉ាតរបស់នាងនៅលើបណ្តាញសង្គមចិន ដោយកាន់ក្រដាសសរសេរថា៖ “ប្រទេសគួរតែប្រគល់សង្សារខ្ញុំមួយ នៅពេលការរីករាលដាលបានចប់” ។ នេះបើយោងតាម Unilad ។
គិលានុបដ្ឋាយិកាអាយុ ៣០ ឆ្នាំរូបនេះ ត្រូវបានគេរាយការណ៍ថា បានបំផុសគំនិតនេះឡើង គឺដោយសារមិត្តរួមការងារម្នាក់របស់នាងដែលបានសរសេរថា “ខ្ញុំចង់បានមិត្តប្រុសម្នាក់” នៅលើឈុតហេមម៉ាតរបស់នាងដូចដែលនាងបានពន្យល់នៅក្នុងការបង្ហោះរបស់នាងកាលពីថ្ងៃទី ២៥ ខែកុម្ភៈ។
ទោះបីជាបច្ចុប្បន្ននេះ នាងកំពុងស្វែងរកមិត្តប្រុសក៏ដោយ តែគិលានុប្បដ្ឋាយិកានេះបាននិយាយថា អាទិភាពចម្បងរបស់នាងនាពេលនេះ គឺដើម្បីជួយប្រយុទ្ធប្រឆាំងនឹងការរីករាលដាលនៃជំងឺ Covid-19 នៅក្នុងប្រទេសចិន។
នាងបានសរសេរនៅក្នុងបណ្តាញសង្គមហ្វេសប៊ុករបស់នាងថា៖ “ខ្ញុំពិតជាកំពុងស្វែងរកមិត្តប្រុសម្នាក់មែន ប៉ុន្តែឥឡូវនេះការផ្តោតអារម្មណ៍របស់ខ្ញុំ គឺធ្វើការងាររបស់ខ្ញុំអោយបានល្អ និងធ្វើអ្វីដែលគិលានុបដ្ឋាយិកាត្រូវធ្វើ” ។ នោះគឺដើម្បីជួយប្រជាជន Wuhan ជំនះការលំបាក និងប្រយុទ្ធប្រឆាំងមេរោគនេះរួមជាមួយគ្នា។
នៅពេលនិយាយពីចំណូលចិត្ត Tian បានប្រាប់ប្រព័ន្ធផ្សព្វផ្សាយឯករាជ្យ Ren Jian Zhi Bei ថា នាងកំពុងស្វែងរកបុរសខ្ពស់ម្នាក់ ព្រោះនាងមានកម្ពស់ ១.៦៧ ម៉ែត្រ។
Tian ត្រូវបានគេនិយាយថា ជាបុគ្គលិកដំបូងគេដែលបានស្ម័គ្រចិត្តចូលរួមសម្រាប់ភារកិច្ចនៅជួរមុខនៅមន្ទីរពេទ្យ ដែលជាសាខានឹងវិទ្យាស្ថានស្រាវជ្រាវវេជ្ជសាស្ត្របុរាណចិន Wuhan ។ នាងបានមកដល់មន្ទីរពេទ្យ Dahuashan Fang Cang ក្នុងស្រុក Jiangxia ខេត្ត Wuhan កាលពីថ្ងៃទី ១១ ខែកុម្ភៈ រួមជាមួយមិត្តរួមការងាររបស់នាង។
ក្រៅពីធ្វើជាជំនួយការផ្នែកវេជ្ជសាស្ត្រ Tian ក៏ជួយអ្នកជំងឺឱ្យបំបាត់ទុក្ខកង្វល់ ដោយដឹកនាំពួកគេធ្វើលំហាត់ជាក្រុម និងច្រៀង។
ឪពុករបស់នាងក៏ជាបុគ្គលិកពេទ្យ និងធ្លាប់ធ្វើការក្នុងកំឡុងពេលនៃការផ្ទុះជំងឺ SARS ក្នុងឆ្នាំ ២០០៣ ៕
ដោយ៖ លឹម ហុង (ប្រភព៖ nextshark)