កាលពីពេលថ្មីៗនេះ មន្ត្រីប៉ូលីសម្នាក់នៅស្រុកកៀនស្វាយ បាន Live វីដេអូចំនួន២ដង ខណៈពេលកំពុងបើកឡាន ទាំងមិនពាក់ខ្សែក្រវាត់សុវតិ្ថភាព ចាក់ភ្លេងសុទ្ធតែបទក្លឹប និងនិយាយទូរស័ព្ទ យ៉ាងឡូយ ដើម្បីបង្កួតគេឯង ថាខ្លួនឥឡូវមិនដូចពីមុនទៀតទេ ។
ទោះយ៉ាងណា ក្រោយ Live វីដេអូចប់ មហាជនបាននាំគ្នារិះគន់យ៉ាងខ្លាំង ទៅលើមន្ត្រីអួតភាពឡូយឆាយរូបនេះ ព្រោះថា ខ្លួនជាអ្នកអនុវត្តច្បាប់ តែបែរជាយកច្បាប់មកទ្រាប់អង្គុយលើបែបនេះ ។
ពិតណាស់ ខមិនរិះគន់របស់មហាជន បានលេចឮដល់ថ្នាក់លើ កោះហៅមកធ្វើការអប់រំ និងធ្វើកិច្ចសន្យាលាយលក្ខណ៍អក្សរបញ្ឈប់សកម្មភាពបែបនេះ នៅពេលក្រោយទៀត។
នេះបើយោងតាមទំព័រហ្វេសប៊ុករបស់ ស្នងការដ្ឋាននគរបាលខេត្តកណ្តាល – Police Commissariat Of Kandal Province បានបង្ហោះកាលពី១៥ម៉ោងមុន មានខ្លឹមសារថា « សូមសាធារណៈជនមេត្តាជ្រាប ៖
ក្រោយពីមានការផ្ទុះការរិះគន់ចំពោះបុគ្គលឈ្មោះគឹម ឆុន ឋានន្តរស័ក្តិ អនុសេនីយ៍ឯក អត្តលេខ៥២២៣៨ ជាមន្ត្រីនគរបាលនៃអធិការដ្ឋាននគរបាលស្រុកកៀនស្វាយ ដែលបានធ្វើ video Live Facebook
ក្នុងពេលបើកបររថយន្ត និងមិនពាក់ខ្សែក្រវ៉ាត់ កន្លងមក។ ក្រុមប្រឹក្សាវិន័យរបស់ស្នងការដ្ឋាននគរបាលខេត្តកណ្តាល បានធ្វើការចុះអប់រំណែនាំ អប់រំ និងធ្វើកិច្ចសន្យាបញ្ឈប់សកម្មភាពបែបនេះនៅពេលក្រោយទៀត»៕ ដោយ៖ លឹម ហុង
