វីយ៉ែន អូទ្រីស ៖ អាជ្ញាធរជាតិប្រយុទ្ធ ប្រឆាំងគ្រឿញៀនកម្ពុជា បានប្រកាសថា កម្ពុជាស្នើអង្គការសហប្រជាជាតិ បន្តផ្តោតការយកចិត្តទុកដាក់ និងគាំទ្រ ដល់បណ្តាប្រទេសក្នុងតំបន់ បន្ថែមទៀតដើម្បីដោះស្រាយ និងទប់ស្កាត់បញ្ហាគ្រឿងញៀនក្នុងតំបន់ត្រីកោណមាស ។
ពីថ្ងៃទី២ ដល់ ថ្ងៃទី៦ ខែមីនា ឆ្នាំ២០២០ទទួលបានការអញ្ជើញពីអង្គការ UNODC អាជ្ញាធរជាតិប្រយុទ្ធ ប្រឆាំងគ្រឿញៀនកម្ពុជា បានចាត់បញ្ជូនឧត្តមសេនីយ៍ឯក នាក់ យុទ្ធា អគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀន ចូលរួមក្នុងកិច្ចប្រជុំលើកទី៦៣ របស់គណៈកម្មាធិការស្តីពីគ្រឿងញៀន ណាកូទិក(CND) អង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម UNODCដែលបានប្រារព្ធឡើង នៅទីក្រុងវីយ៉ែន ប្រទេសអូទ្រីស។
ឧត្តមសេនីយ៍ឯក នាក់ យុទ្ធា បានប្រាប់ពីកិច្ចប្រជុំនោះថា កិច្ចប្រជុំលើកទី៦៣នេះ ចែកចេញជាពីរផ្នែកគឺ ១.កិច្ចប្រជុំពេញអង្គ ( Plenary ) និង ២.កិច្ចប្រជុំតាមផ្នែក ( Side Events) ។
១.កិច្ចប្រជុំពេញអង្គ ដោយមានការអញ្ជើញចូលរួមពីថ្នាក់ដឹកនាំប្រទេស ជានាយករដ្ឋមន្រ្តី រដ្ឋមន្រ្តី តំណាងស្ថាប័នប្រយុទ្ធប្រឆាំងគ្រឿងញៀន នៃបណ្តាប្រទេសជាសមាជិកជាច្រើន បានធ្វើបទអន្តរាគមន៍ដោយឆ្លុះបញ្ចាំងពីឆន្ទៈនយោបាយ និងពីការខិតខំប្រឹងប្រឹងរបស់ប្រទេសខ្លួន ក្នុងការប្រយុទ្ធប្រឆាំងគ្រឿងញៀន ស្របតាមស្មារតី នៃខ្លឹមសារអនុសញ្ញា និងពិធីសារ របស់អង្គការសហប្រជាតិ ស្តីពីគ្រឿងញឿន និងស្របតាមគោលការណ៍ណែនាំរបស់អង្គការ សុខភាពពិភពលោក ។ ជាមួយនេះ រដ្ឋមន្រ្តីជាតំណាងប្រទេសមួយចំនួនក៏បានធ្វើការចែករំលែកផងដែរនូវស្ថានភាពគ្រឿងញឿនបច្ចុប្បន្នទាំងនៅក្នុងប្រទេសរបស់ខ្លូន ក្នុងតំបន់ និងពិភពលោកទាំងមូល ពិសេសស្ថានភាព កើនឡើងនូវការប្រើប្រាស់សារធាតុញៀនប្រភេទថ្មី ប៉ះពាល់ប្រព័ន្ធសរសៃប្រសាទ(NPS)។
២.កិច្ចប្រជុំតាមផ្នែក(Side Events) គីជាកម្មវិធីប្រជុំ ពិភាក្សាជាក្រុមតូចៗ លើប្រធានបទ ជាច្រើន (ជាង១០០ ប្រធានបទ) និងការតាំងពិព័រណ៍ផលិតផលដែលកើតចេញពីការងារ ប្រយុទ្ធប្រឆាំងគ្រឿងញៀន លើគ្រប់វិស័យ (លើការងារអនុវត្តច្បាប់ ការងារផ្សព្វផ្សាយអប់រំ ព្យាបាល និងស្តារនីតិសម្បទា ការអភិវឌ្ឍកែប្រែតំបន់ដាំគ្រឿងញៀន ជំនាញមន្ទីរពិសោធន៍ស្រាវជ្រាវបច្ចេកទេស និងសុខុមាលភាព សន្តិសុខសង្គមដែលពាក់ព័ន្ធនឹងបញ្ហាគ្រឿងញៀន ។ល។
ជាមួយគ្នានេះ ឧត្តមសេនីយ៍ឯក នាក់ យុទ្ធា ក៏បានប្រាប់ឲ្យដឹងបន្ថែមថា កិច្ចប្រជុំតាមផ្នែក(Side Event) បាធ្វើការជជែកពិភាក្សាពីយន្តការ និងការខិតខំប្រឹងប្រែងប្រយុទ្ធប្រឆាំងគ្រឿងញៀន របស់ប្រទេសមហាអនុតំបន់ទន្លេមេគង្គ ។ ទន្ទឹមនឹងនោះក្នុងកម្មវិធីជួបសំដែងការគួរសមជាមួយលោកស្រី ហ្កាដា ហ្វាធី វ៉ាលី (Ghada Fathi Waly) នាយកប្រតិបត្តិ អង្គការ UNODC នៃអង្គការសហប្រជាជាតិ កម្ពុជាបានជម្រាបជូនអ្នកចូលរួម និងជម្រាបជូនលោកស្រីពីស្ថានភាពប្រឈមនឹងបញ្ហាគ្រឿងញៀននៅកម្ពុជា និងការខិតខំប្រប្រឹងប្រែងរបស់រាជរដ្ឋាភិបាលដោយបានដាក់ចេញនូវវិធានការជាច្រើន ក្នុងនោះរួមទាំងយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ជាបន្តបន្ទាប់ចាប់តាំងពីឆ្នាំ ២០១៧ មក និងបានស្នើសុំ UNODC បន្តផ្តោតការយកចិត្តទុកដាក់និងគាំទ្រ ដល់បណ្តាប្រទេសក្នុងតំបន់ បន្ថែមទៀតដើម្បីដោះស្រាយ និងទប់ស្កាត់បញ្ហាគ្រឿងញៀនក្នុងតំបន់ត្រីកោណមាស ៕ដោយ៖កូឡាប