ភ្នំពេញ៖ អង្គភាពប្រឆាំងអំពើពុករលួយ បានបញ្ជូន លោក នួន ប៉ុក អតីតប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តព្រះសីហនុ ទៅកាន់សាលាដំបូងរាជធានីភ្នំពេញនៅល្ងាចថ្ងៃទី០៤ ខែមីនា ឆ្នាំ ២០២០នេះ ដោយ បានធ្វើការចោទប្រកាន់ពីបទរំលោភអំណាច បំពានធនធានធម្មជាតិ និងផ្តល់ឯកសារក្លែងក្លាយដល់អាជ្ញាធរ។
សំណុំរឿងរពុករលួយនេះ កំពុងស្ថិតក្នុងចំណាត់ការ លោក គុជ គឹមឡុង តំណាងអយ្យការអមសាលាដំបូងរាជធានីភ្នំពេញ។
អង្គភាពប្រឆាំងអំពើពុករលួយ បានឃាត់ខ្លួនលោក នួន ប៉ុក កាលពីថ្ងៃទី១ ខែមីនា ឆ្នាំ២០២០ ពាក់ព័ន្ធនឹងអំពើពុករលួយ ក្នុងពេលលោកកាន់តំណែង។
លោក នួន ប៉ុក បានឡើងកាន់តំណែងជាប្រធានមន្ទីររៀបចំដែនដីនគរូបនីយកម្មសំណង់ និង សុរិយោដី ខេត្តព្រះសីហនុ កាលពីថ្ងៃទី ២៣ ខែមីនា ឆ្នាំ២០១៦ ហើយកាន់តំណែងបាន២ឆ្នាំ លោកត្រូវបានផ្ទេរចេញពីតំណែង កាលពីថ្ងៃទី១ ខែមីនា ឆ្នាំ២០១៨ ៕ដោយ៖បញ្ញាស័ក្តិ