សៀមរាប៖ លោក អភិបាលខេត្តសៀមរាប បានបញ្ជាក់បន្ថែមដោយសង្កត់ធ្ងន់ថា ក្នុងឆ្នាំ២០២០នេះ គឺជាឆ្នាំអនុវត្តនូវអភិក្រមទី៥ “វះកាត់” របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ទៅលើមន្ត្រីណាដែលមានភាពអសកម្មភាព ដើម្បីពង្រឹងការផ្តល់សេវាសាធារណៈ អភិបាលកិច្ចល្អជូនប្រជាពលរដ្ឋឲ្យកាន់តែឆាប់រហ័ស ងាយស្រួល មានតម្លាភាព គណនេយ្យភាព និងលែងមានការថ្នាំងថ្នាក់ពីប្រជាពលរដ្ឋ។
បើតាមលោកទៀ សីហា ជាពិសេសមេឃុំ សង្កាត់ត្រូវបញ្ឈប់ការបញ្ជាក់លើ ឯកសារកាន់កាប់ដីធ្លីខុសគោលការណ៍ និងនីតីវិធី។
នាថ្ងៃទី៤ ខែមីនា ឆ្នាំ២០២០ រដ្ឋបាលខេត្តបានរៀបចំពិធីបូកសរុបការងារសន្និបាតឆ្នាំ២០១៩ និងទិសដៅការងារឆ្នាំ២០២០ ក្រោមអធិបតីភាពលោក អ៊ាន ឃុន ប្រធានក្រុមប្រឹក្សាខេត្តស្តីទី និងឯកឧត្តម ទៀ សីហា អភិបាល នៃគណៈអភិបាលខេត្តនៅសាលសន្និសិទសុខាសៀមរាប។
ក្នុងការបូកសរុបការងារសន្និបាតនេះ លោក ទៀ សីហា បានផ្តល់ការណែនាំ និងឱ្យដល់មន្ទីរ អង្គភាព និងរដ្ឋបាលក្រុង ស្រុកទាំងអស់សហការគ្នាអនុវត្តការងារ ដោយសង្កត់ធ្ងន់លើ ការសាងសង់សំណង់មិនត្រូវអនុញ្ញាត ឱ្យសាងសង់សំណង់មុនលិខិតអនុញ្ញាត ត្រូវបន្តពង្រឹងការអនុវត្តច្បាប់ស្តីពីចរាចរណ៍ សិក្សាស្ថានភាព និងលើកជាយោបល់រៀបចំ ទិសចរាចរក្នុងខេត្ត ដំឡើងស្លាកសញ្ញាចរាចរ ភ្លើងសញ្ញាចរាចរ គំនូសសញ្ញាចរាចរ និងគំនូសកាត់ទ្រូងផ្លូវ ឬចិញ្ចើមផ្លូវដោយលុបបំបាត់ការហុយដីក្នុងក្រុង។ ម្យ៉ាងទៀត ត្រូវសហការគ្នាក្នុងការចូលរួម សាងសង់បង្គន់អនាម័យនៅតាមសាលា និងណែនាំដល់ប្រជាពលរដ្ឋ ក៏ដូចជាសិស្សានុសិស្សត្រូវសម្អាត អនាម័យឱ្យបានល្អប្រសើរផងដែរ។ ក្នុងនោះដែរត្រូវបន្តការបង្ក្រាប ទប់ស្កាត់ការជួញដូរ ប្រើប្រាស់គ្រឿងញៀននៅតាមមូលដ្ឋាន៕ដោយ៖កូឡាប
