កូរ៉េខាងត្បូង នៅថ្ងៃព្រហស្បតិ៍នេះ ប្រកាសថាមានមនុស្សចំនួន ៤៣៨នាក់បន្ថែមទៀតផ្ទុកវីរុសកូរ៉ូណា ហើយតួលេខនៃអ្នកឆ្លងសរុបទូទាំងប្រទេសកើនដល់ចំនួន ៥.៧៦៦នាក់។
ចំណែកអ្នកស្លាប់កើនដល់ ៣៥នាក់ ក្រោយពេលមានអ្នកស្លាប់ថ្មី ៣នាក់បន្ថែម។ នេះបើតាមមជ្ឍមណ្ឌលបង្ការ និងគ្រប់គ្រងជំងឺរបស់កូរ៉េខាងត្បូង។
មន្ត្រីសុខាភិបាលរំពឹងថា ចំនួនអ្នកឆ្លងនឹងកើនឡើងខ្លាំងនៅពេលខាងមុខ នៅពេលដែលពួកគេបញ្ចប់ការធ្វើតេស្តលើមនុស្សចំនួន ២០០.០០០នាក់ ដែលជាសមាជិកនៃក្រុមអ្នកកាន់សាសនាគ្រឹស្ត។
សូមបញ្ជាក់ថា រហូតមកដល់ពេលនេះ មានប្រទេសចំនួន ៩២ ដែលបានរឹតបន្តឹងការធ្វើដំណើរពីកូរ៉េខាងត្បូងចូលប្រទេសពួកគេ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
