ប្រធានាធិបតីអ៊ីរ៉ង លោក Hassan Rouhani នៅថ្ងៃពុធម្សិលមិញ បានជំរុញឲ្យសហរដ្ឋអាមេរិចដកទណ្ឌកម្មប្រឆាំងលើខ្លួនចេញ ដើម្បីអោយអ៊ីរ៉ងអាចនាំចូលថ្នាំ និងបរិក្ខារពេទ្យ ប្រសិនជាអាមេរិចចង់ជួយអ៊ីរ៉ងប្រយុទ្ធប្រឆាំងនឹងវីរុសកូរ៉ូណា។
ការស្នើបែបនេះកើតឡើង ក្រោយពេលប្រធានាធិបតីដូណាល់ ត្រាំ បាននិយាយកាលពីថ្ងៃសៅរិ៍កន្លងថា រដ្ឋបាលរបស់លោកមានឆន្ទៈជួយអ៊ីរ៉ង។
លោកថ្លែងថា អាមេរិចមានឆន្ទៈជួយអ៊ីរ៉ង “ហើយអ្វីដែលពួកគេត្រូវធ្វើគឺស្នើសុំ”។
ប៉ុន្តែប្រធានាធិបតីអ៊ីរ៉ង បានហៅការប្រកាសរបស់អាមេរិចថាជាការកុហក។
លោក Hassan Rouhani និយាយថា “ប្រសិនជាអ្នក (អាមេរិច)និយាយការពិត យ៉ាងហោចណាស់ អ្នកគួរដកទណ្ឌកម្មក្នុងការនាំចូលថ្នាំ”។
សូមបញ្ជាក់ថា វីរុសកូរ៉ូណា ឬ COVID-19 បានរាតត្បាតយ៉ាងខ្លាំងនៅក្នុងប្រទេសអ៊ីរ៉ង ហើយកាលពីថ្ងៃពុធម្សិលមិញ អ៊ីរ៉ងបានរកឃើញអ្នកផ្ទុកថ្មីចំនួន ៥៨៦នាក់ បណ្តាលឲ្យអ្នកឆ្លងសរុបទូទាំងប្រទេសកើនដល់ ២.៩២២នាក់ ខណៈអ្នកស្លាប់កើនដល់ ៩២នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ CGTN