ភ្នំពេញ ៖ គណៈបញ្ជាការឯកភាពខណ្ឌមានជ័យ ចុះរដ្ឋបាល បង្ក្រាបបទល្មើសគ្រឿងញៀន និង អ្នកចែកចាយគ្រឿងញៀន និងរួមទាំង អ្នកផ្ទុកនូវសារធាតុញៀន ត្រង់ចំណុច ទីលានចាក់សំរាមចាស់ស្ទឹងមានជ័យ ក្នុងភូមិព្រែកទាល់ នៅសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ដែលមានកម្លាំងចូលរួមសរុប ១០២ នាក់ នៅព្រឹកថ្ងៃព្រហស្បតិ៍ ទី៥ ខែមីនា ឆ្នាំ២០២០ ។
លោក ឌី រត្ន័ខេមរុណ អភិបាលរងខណ្ឌមានជ័យ និងជាប្រធានលេខាធិការដ្ឋាន នៃគណៈកម្មាធិការប្រយុទ្ធប្រឆាំងគ្រឿងញៀន ខណ្ឌមានជ័យ បានដឹកនាំកម្លាំងចម្រុះជាង១០០នាក់ បែងចែកជា ៥ គោលដៅសំខាន់ៗ ហើយក្នុងប្រតិបត្តិការនោះដែរ ឈានទៅដល់ការរុះរើខ្ទមសង់លើទីលានចាក់សំរាម ចំនួន ៤ខ្ទមតូចៗ រួមទាំង ឃាត់ខ្លួនជនសង្ស័យចំនួន ៨នាក់ ដែលលួចលាក់ប្រើប្រាស់នូវសារធាតុញៀន បញ្ជូនទៅប៉ុស្តិ៍រដ្ឋបាលសង្កាត់ស្ទឹងមានជ័យ២ ដើម្បីចាត់ការតាមនីតិវិធីច្បាប់ ៕ ដោយ ៖ បញ្ញាស័ក្តិ
