ក្មេងប្រុសម្នាក់បានស្លាប់ និង៣នាក់ផ្សេងទៀតរងរបួស នៅក្នុងហេតុការណ៍បង្គោលភ្លើង១ដើមនៅជាប់មុខផ្ទះបានបាក់រលំ ដោយសារដើមត្នោត១ដើម ដែលត្រូវបានអ្នកជិតខាងអារ ចៃដន្យក៏រលំទាក់នឹងខ្សែភ្លើងនោះ ។
គណនីហ្វេសប៊ុកឈ្មោះ កូន ខ្លាតូច បានបង្ហោះពីហេតុការណ៍នេះឲ្យដឹងថា «ស្លាប់ដោយសារបង្គោលភ្លើងគ្មានសសៃដែក!! អាណិតណាស់??
យើងមិនដឹងថា ខាងអគ្គីសនីប្រើបច្ចេកទេសបែបណា បានជាបង្គោលភ្លើង ដែលគ្មានសសៃដែក បានរលំសង្កត់ ក្មេងម្នាក់ស្លាប់ និងរបួស៣នាក់ទៀត ព្រមទាំងខូចខាតផ្ទះសប្បែង នៅភូមិព្រៃបាស្រី ឃុំជៃកំពត ស្រុកព្រះស្តេច ខេត្តព្រៃវែង??? ។
ហេតការណ៍នេះ បានកើតឡើងនៅ ថ្ងៃទី២ ខែមីនា ឆ្នាំ២០២០ គឺមាន អ្នកជិតខាង អារដើមត្នោត ពេលវារលំ វាក៏ដួលទាក់លើខ្សែភ្លើង បណ្តាលឲ្យទ្រេតនិងបាក់បង្គោលភ្លើង រលំចូលផ្ទះអ្នកភូមិក្បែរនោះ នាំឲ្យក្មេងរបួសនិងស្លាប់….។
តើចុងក្រោយ អ្នកណាទទួលខុសត្រូវ លើការខូចខាតខាងលើ????» ។
ទោះយ៉ាងណា អ្វីដែលហួសចិត្តបំផុតនោះ គឺបង្គោលភ្លើងនេះត្រូវបានគេរកឃើញថា ពុំមានដែកសូម្បីតែមួយសរសៃសោះឡើយ ដែលធ្វើឲ្យមហាជនផ្ទុះការរិះគន់ និងជេរប្រទេចយ៉ាងចាស់ៗដៃតែម្តង ។
គួរបញ្ជាក់ឲ្យដឹងផងដែរ ករណីសសរបង្គោលភ្លើងបាក់រលំគ្មានដែកសសៃបែបនេះ គឺបានកើតឡើងច្រើនលើករួចមកហើយ ជាពិសេសនៅក្នុងរដូវវស្សាដែលមានភ្លៀងខ្យល់កន្ត្រាក់ខ្លាំង ជាក់ស្តែងដូចជាកើតឡើងកាលឆ្នាំទៅមិញជាដើម ៕ ដោយ៖ លឹម ហុង
