ភ្នំពេញ៖លោក វិល្លាម ប្រធានគណបក្សខ្មែរក្រោក បានសម្ដែងការភ្ញាក់ផ្អើលយ៉ាងខ្លាំងក្រោយ ក្រោយពីទទួលព័ត៌មានថាពលរដ្ឋមួយចំនួន បានតវ៉ាចំពោះលោក ព្រាប សុវត្ថិ ដែលធ្វើរោងឈើបិទផ្លូវសាធារណៈ ហើយពលរដ្ឋអះអាងថាលោក ព្រាប សុវត្ថិ ក៏ធ្វើរបងបំពានផ្លូវសាធារណៈ ជាពិសេសការចតឡានបិទផ្លូវ ឬសម្លេងរោទិ៍របស់ឡានជាដើម ដែលបង្កការរំខានដល់ពួកគាត់ ។
លោកបានបន្តថា បើពិនិត្យលើរូបភាព ពិតជាមានការធ្វើឈើលើផ្លូវសាធារណៈមែន ឬអាចនិយាយថា បិទផ្លូវដោយប្រយោល តែចំពោះការធ្វើរបងបំពានលុះត្រាអាជ្ញាធរជាអ្នកពិនិត្យទើបដឹង ដោយមិននិយាយរឿងផ្សេងទេ។
លោក បានបន្តឲ្យដឹងថា លោកផ្ទាល់ក៏ជាអ្នកចូលចិត្តបទចម្រៀងខ្លះៗ របស់កំពូលតារារូបនេះ តែចំពោះការបំពានទ្រព្យសម្បត្តិសាធារណៈ គឺជាទោស ដែលបានបញ្ញតិ្ត ដោយក្រមព្រហ្មទណ្ឌ ហើយច្បាប់ដាក់ទោសមិនស្គាល់តារា មិនស្គាល់លោកខែនោះទេ។
ឯការតវ៉ារបស់ពលរដ្ឋជារឿងមួយផ្នែក តែប្រសិនជាបិទផ្លូវសាធារណៈមែន អាជ្ញាធរគួរមានវិធានការដោះស្រាយ បើជាកំហុសអចេតនា រើឈើចេញទៅសម្រួលគ្នាទៅ ហើយពលរដ្ឋសំណូមពរអ្វីខ្លះដោះស្រាយទៅ វាគ្មានបញ្ហាអីធំដុំផង ដើម្បីរក្សាតម្លៃថ្លៃថ្នូរ ជាពិសេសសម្ដេចតេជោអំពាវនាវហើយ ថាឲ្យសិល្បករ សិល្បការិនី ធ្វើជាគំរូដល់សង្គម។
តែកំពូលតារាចម្រៀងក៏ដោយ ពលរដ្ឋក៏ដោយ សិទ្ធិស្មើគ្នាចំពោះមុខច្បាប់ ការតវ៉ារបស់ពលរដ្ឋ ក្នុងទ្រង់ទ្រាយតូចនេះចាត់ទុកថា ជាការប្រើសិទ្ធិសេរីភាពបញ្ចេញមតិ ដែលការពារដោយច្បាប់ ។
បើនិយាយន័យសង្គមទូទៅ បើយើងមិនប៉ះពាល់គេ គេមិនមកបង្កបញ្ហាអ្វីនោះដែរ ។
សូមបញ្ជាក់ថា កាលពីថ្ងៃទី៤ ខែមីនា ឆ្នាំ២០២០ មានព័ត៌មានដ៏រសើបថា ប្រជាពលរដ្ឋប្រមាណ៧០គ្រួសារ ដែលរស់នៅជិតផ្ទះលោក ព្រាប សុវត្ថិ បាននាំគ្នាផ្ទុះការតវ៉ាសុំឲ្យអាជ្ញាធរសង្កាត់គោកឃ្លាង និងអាជ្ញាធរខណ្ឌសែនសុខ ជួយរកដំណោះស្រាយករណីលោក ព្រាប សុវត្ថិ បានរំលោភផ្លូវសាធារណៈ និងបង្កការរំខានដល់ការរស់នៅរបស់ពួកគាត់ ស្ទើររាល់ថ្ងៃ។ ក្នុងការតវ៉ានោះប្រជាពលរដ្ឋ បានស្នើសុំអាជ្ញាធរមូលដ្ឋានជួយដោះស្រាយជាមួយលោក ព្រាប សុវត្ថិនូវហេតុផលចំនួន៤ចំណុច ៖១ ស្នើឲ្យលោកព្រាប សុវត្ថិ បញ្ឈប់ធ្វើរបងបំពានលើផ្លូវសាធារណៈ។ ២ ស្នើឲ្យបញ្ឈប់ធ្វើរោងឈើបិទផ្លូវ។ ៣ ស្នើឲ្យបញ្ឈប់ចតរថយន្តបិទផ្លូវ គ្មានសណ្ដាប់ធ្នាប់និង៤ ស្នើឲ្យបញ្ឈប់រោទិ៍សំឡេងរថយន្តលាន់ខ្លាំងៗ ធ្វើឲ្យមានសំឡេងរំខាន ដល់ការរស់នៅពួកគាត់។ ប៉ុន្តែជាការឆ្លើយតបលោក ព្រាប សុវត្ថិ បញ្ជាក់ថា លោកនឹងទទួលយកការដោះស្រាយ តាមសំណូមពររបស់ប្រជាពលរដ្ឋ។
លោកហេង ឡុង ប្រធានសមាគមមិត្តសិល្បៈស្ម័គ្រចិត្តជួយសង្គម បានបញ្ជាក់នៅមុននេះបន្តិចថា បង ព្រាប សុវត្ថិ សូមបដិសេធព័ត៌មានផ្សាយកាលពីថ្ងៃទី៤ ខែមីនា ឆ្នាំ២០២០ ម្សិលមិញ ចំពោះការផ្ទុះតវ៉ាពាក់ព័ន្ធជាមួយ នឹងផ្ទះរបស់គាត់ ហើយបានចោទប្រកាន់ថា គាត់បានរំលោភផ្លូវសាធារណៈ និងធ្វើឲ្យរំខានអ្នកជិតខាង ដោយមានរហូត៧០គ្រួសារ មកតវ៉ា តែជាក់ស្ដែងមានត្រឹមពីរបីគ្រួសារប៉ុណ្ណោះ ហើយគាត់បានចោទជាសំណួរថា ពួកគាត់មានបំណងអ្វី? នៅពេលដែលគាត់នៅផ្ទះ ហេតុអ្វីមិនមកនិយាយគ្នា? សូមបញ្ជាក់ថា ថ្ងៃកើតហេតុម្សិលមិញនេះ គាត់មិនបាននៅភ្នំពេញទេ ឥឡូវនេះគាត់កំពុងតែធ្វើដំណើរត្រឡប់មកពីខេត្តមណ្ឌលគិរីវិញ។
លោក ព្រាប សុវត្ថិ បាននិយាយថា ពេលមកដល់ភ្នំពេញវិញ លោកនឹងជួបសម្រុះសម្រួល សួរនាំពីហេតុផលជាមួយប្រជាពលរដ្ឋ ព្រោះពេលកើតមានបញ្ហាលោក មិនបាននៅផ្ទះទេ គឺកំពុងស្នាក់នៅឯខេត្ត ទើបរឿងខ្លះមិនបានដឹងច្បាស់។ លោកថា បើសិនជាមុនពេលមានបញ្ហានេះកើតឡើង ហើយប្រជាពលរដ្ឋរាយការណ៍ ប្រាប់ទៅអាជ្ញាធរ ឬលោកផ្ទាល់នោះ គឺអាចនឹងសម្រុះសម្រួលគ្នាគ្មានរឿងនេះកើតឡើងទេ។
នៅពេលសួរថាតើតួលេខប្រជាពលរដ្ឋ ដែលទៅតវ៉ាមានចំនួន៧០គ្រួសារនោះ ពិតដែរឬទេ? ចំណុចនេះលោក ព្រាប សុវត្ថិ បានបញ្ជាក់ថា ខ្ញុំក៏មិនបានដឹងច្បាស់ដែរ តែបើសិនជាពួកគាត់ផ្តិតមេដៃ មានចំនួនប៉ុន្មានគឺអាស្រ័យលើហ្នឹង បើគាត់ថា៧០គ្រួសារក៏៧០គ្រួសារទៅ។ លោក ព្រាប សុវត្ថិ បានបន្ថែមថា រាល់ថ្ងៃការរស់នៅតំបន់នោះ រវាងលោកនិងអ្នកជិតខាង មិនដែលធ្លាប់មានជម្លោះទាស់ទែងពាក្យសម្តីគ្នាទេ ពោលគឺពេលល្ងាចឲ្យតែទំនេរ តែងជួបមុខជជែកគ្នាលេងជាធម្មតា៕ដោយ៖កូឡាប
