ស្ថានីយ៍ទូរសទ្សន៍រដ្ឋ NHK បានធ្វើការសុំទោសប៉ុន្មាននាទីក្រោយពេលប្រកាសព្រមានអំពីកាំជ្រួចកូរ៉េខាងជើង ទើបត្រូវបានបាញ់បង្ហោះអមសំណូមពរឲ្យពលរដ្ឋរកកន្លែងរឹងមាំលាក់ខ្លួន។
ការប្រកាសអាសន្ន ត្រូវបាន NHK ផ្សាយចេញតាមប្រតិបត្តិការមួយលើបរិក្ខារចល័ត ក៏ដូចជាក្នុងគេហទំព័ររបស់ស្ថានីយ៍នេះនៅវេលាម៉ោង ១៨និង៥៥នាទី ថ្ងៃទី ១៦ ខែមករា (ម៉ោងនៅតំបន់) -នេះបើតាម AFP។
“ហាក់ដូចជាកូរ៉េខាងជើងទើបបាញ់បង្ហោះកាំជ្រួច១… ប្រញាប់ចូលក្នុងអាគារ ឬលេណដ្ឋានក្រោមដី ៖ រដ្ឋាភិបាល” -សំណេរនៃការប្រកាសអាសន្ន។
ប៉ុន្តែ៥នាទីក្រោយ NHK បានសារភាពថា ការប្រកាសអាសន្ននេះពុំត្រឹមត្រូវ “យើងខ្ញុំពិតជាសុំទោស!” NHK សរសេរលើគេហទំព័រ ដោយពុំមានការបកស្រាយអ្វីបន្ថែម។
ពលរដ្ឋជប៉ុន តាមដានព័ត៌មានកាលពីការបាញ់បង្ហោះកាំជ្រួចកូរ៉េខាងជើងលើកមុន (ខែសីហា ២០១៧)។
គួររំលឹកឡើងវិញថា មុននោះ១ថ្ងៃ ករណីស្រដៀងគ្នានេះ បានកើតឡើងនៅរដ្ឋហាវ៉ៃរបស់អាមេរិក ខណៈពេលទូរស័ព្ទរបស់ពលរដ្ឋរស់នៅរដ្ឋនេះទទួលបានការប្រកាសអាសន្នពីកាំជ្រួចអន្តរទ្វីបមួយ កំពុងហោះសំដៅមក ជាហេតុនាំឲ្យមនុស្សម្នាភ័យតក់ស្លុត។ ក្រោយមកក៏បានប្រកាសថា នេះជាកំហុសរបស់បុគ្គលិកក្នុងស្ថាប័នគ្រប់គ្រងគ្រាមានអាសន្ន៕ សូយន
