ខេត្តស្វាយរៀង ៖ លោកស្រីកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រីរដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចនារសៀលថ្ងៃទី ៥ ខែមីនា ឆ្នាំ២០២០នេះបានថ្លែងអំពាវនាវឲ្យស្ត្រីរួមគ្នាថែរក្សាការពារសន្តិភាព ដើម្បីអភិវឌ្ឍន៍ជាតិ ធានាបានសមភាពយេនឌ័រប្រកបដោយបរិយាប័ន្ន។
លោកស្រី ម៉ែន សំអន បានលើកឡើងបែបនេះនៅក្នុងពិធីជួបសំណេះសំណាលជាមួយនារី នៃសមាគមនារីកម្ពុជា ដើម្បីសន្តិភាព និងអភិវឌ្ឍន៍ ខេត្តស្វាយរៀងក្នុងពិធីអបអរសាទរខួបលើកទី១០៩ ទិវាអន្តរជាតិនារី ០៨មីនា ឆ្នាំ២០២០ ក្រោមប្រធានបទ “មានសន្តិភាព មានការលើកកម្ពស់សមភាពយេនឌ័រ ”នៅសាលប្រជុំសាលាខេត្តស្វាយរៀងនិងសាលប្រជុំស្នងការនគរបាលខេត្តដែលមានការចូលរួមពីស្ត្រីជាសមាជិកយ៉ាងច្រើនកុះករផងដែរ។
លោកស្រី ម៉ែន សំអន បានបន្តថាសុខសន្តិភាព និងស្ថេរភាពនយោបាយ គឺជាមូលដ្ឋានគ្រឹះដ៏ចាំបាច់ សម្រាប់ រដ្ឋាភិបាលប្រទេសមួយមានលទ្ធភាពផ្តោតការយកចិត្តទុកដាក់ លើកិច្ចអភិវឌ្ឍន៍សេដ្ឋកិច្ច សង្គម និងសុខមាលភាពរបស់ប្រជាជន។ បើបាត់បង់សន្តិភាពនោះ អ្វីៗគ្រប់យ៉ាងរួមទាំងសមភាពយែនឌ័រនឹងត្រូវបាត់បង់។ ដូច្នេះ សន្តិភាពគឺជាធាតុផ្សំដ៏សំខាន់ សម្រាប់ធានាចីរភាពនៃកិច្ចអភិវឌ្ឍន៍។
លោកស្រីបានបន្តទៀតថាជាក់ស្តែងបន្ទាប់ពីទទួលបានសុខសន្តិភាពពេញលេញ នៅទូទាំងប្រទេស អាស្រ័យដោយនយោបាយ “ឈ្នះ ឈ្នះ” ដែលផ្តូចផ្តើមដោយសម្តេចអគ្គមហាសេនាបតីតេជោ ហ៊ុន សែន ប្រទេសកម្ពុជាមានការប្រែប្រួល និងរីកចំរើន ជាលំដាប់ ដោយបោះជំហានយ៉ាងជឿជាក់លើមាគ៌ានៃការអភិវឌ្ឍន៍លើគ្រប់វិស័យ ឆ្ពោះទៅរកអនាគតមួយដ៏ភ្លឺស្វាង។ ក្រោមម្លប់សន្តិភាព ស្ថេរភាពនយោបាយ និងកំណើនសេដ្ឋកិច្ចដ៏ខ្ពស់ និងមានស្ថិរភាព ក្នុងអត្រាមធ្យមប្រមាណជាង ៧% នាអំឡុងពេលពីទស្សវត្សកន្លងមកនេះ ធ្វើឲ្យភាពក្រីក្រនៅកម្ពុជាត្រូវបាន កាត់បន្ថយមកត្រឹម ១០% នាពេលបច្ចុប្បន្ន រីឯអត្រាគ្មានការងារធ្វើមានប្រមាណ ០.៣% ហើយប្រទេសកម្ពុជាត្រូវបានរំពឹងថា នឹងក្លាយជាខ្លាសេដ្ឋកិច្ច ថ្មីនៅអាស៊ី ។ តាមរយៈ កំណើនសេដ្ឋកិច្ចដ៏ខ្ពស់នេះ កម្ពុជាបានផ្លាស់ប្តូរមុខមាត់ពីប្រទេសក្រីក្រ ទៅជាប្រទេសមានចំណូលមធ្យមកំរិតទាប និងបោះជំហាន ឆ្ពោះទៅសម្រេចនូវចក្ខុវិស័យរបស់ខ្លួនទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។
លោកស្រី ម៉ែន សំអន បានបញ្ជាក់ថា ៖
១. អរគុណសម្តេចតេជោ ដែលបានដឹកនាំកម្ពុជាឲ្យមានសន្តិភាព និងបានធ្វើឲ្យប្រទេសជាតិរីកចម្រើនរុងរឿង។
២. រួមគ្នាថែរក្សាសន្តិភាព ធានាបានសមភាពយេនឌ័រប្រកបដោយបរិយាប័ន្ន។
៣.វិនិយោគលើសមភាពយេនឌ័រ ដើម្បីកិច្ចអភិវឌ្ឍន៍ប្រកបដោយចីរភាព។
៤. ស្ត្រីរួមគ្នាថែរក្សាការពារសន្តិភាព ដើម្បីអភិវឌ្ឍន៍ជាតិ។
៥. មានសន្តិភាព មានការលើកកម្ពស់សមភាពយេនឌ័រ។
ដើម្បីឆ្លើយតបទៅនឹងប្រធានបទក្នុងឆ្នាំនេះលោកជំទាវម៉ែន សំអនក៏សូមផ្តល់អានុសាសន៍មួយចំនួនដូចខាងក្រោម៖
-ការចេះការពារខ្លួន ការធ្វើអនាម័យជាប្រចាំ គឺជាជម្រើសដែលល្អ បំផុត ដែលការញរខ្លួនបានពីជំងឺគ្រប់ប្រភេទ រួមទាំងជម្ងឺ COVID-19 ផងដែរ។
-ចូលរួមទប់ស្កាត់រាល់ការប្រើប្រាស់ ការជួញដូរគ្រឿងញៀន ពង្រឹងការអនុវត្តន៍ច្បាប់ចរាចរណ៍ គ្រប់គ្រងជនអន្តោប្រវេសន៍ជាដើម។
-រួមគ្នារក្សាឲ្យបាននូវសន្តិសុខសណ្តាប់ធ្នាប់ និងទប់ស្កាត់បាននូវមហិច្ឆតាអាក្រក់ទាំងឡាយ ដែលប៉ុនប៉ងបង្កចលាចល បំផ្លាញសន្តិសុខសណ្តាប់ធ្នាប់សង្គម។
-ត្រូវចេះប្រើប្រាស់ពេលវេលាឲ្យបានល្អ និងត្រូវបែងចែកការទទួលខុសត្រូវនៅអង្គភាព និងកិច្ចការគ្រួសារផ្ទាល់ដើម្បីធានាបានជោគជ័យក្នុងការងារផង និងសុភមង្គលក្នុងគ្រួសារផង។
-ក្នុងតួនាទីជាម្តាយ ជាយាយ និងឧត្តមភរិយា ស្ត្រី្តត្រូវអប់រំកូន ចៅឲ្យខិតខំរៀនសូត្រ ឲ្យនៅឆ្ងាយពីគ្រឿងញៀន។ ត្រូវប្រកាន់យកការគោរព សុភាពរាបសារ និងសីលធម៌ អហិង្សា ជៀសវាងពាក្យអសុរស ដើម្បីឲ្យពួកគេក្លាយជាកុលបុត្រ កុលធីតាល្អប្រសើររបស់សង្គមជាតិ ចេះគោរពច្បាប់ និងចេះអត់ឱន អធ្យាស្រ័យ ។ល។
សូមជម្រុញឲ្យខ្លឹមសារប្រធានបទឆ្នាំនេះ “មានសន្តិភាព មានការលើកកម្ពស់សមភាពយេនឌ័រ” ប្រែក្លាយទៅជាស្មារតីអមតៈមិនចេះរីងស្ងួត ដើម្បីជម្រុញឲ្យស្ត្រីបន្តខិតខំប្រឹងប្រែងក្នុងក្របខណ្ឌ ដៃគូរការងារមិនអាចខ្វះបានរបស់បុរស៕ ដោយ ៖ វ៉ៃកូ