ភ្នំពេញ៖ស្របពេលដែលរាជរដ្ឋាភិបាលកម្ពុជា ដែលមានក្រសួងសេដ្ឋកិច្ចនិងហិរញ្ញវត្ថុជាសេនាធិការនោះបាន ត្រៀមកញ្ចប់ ថវិកា៣០លានដុល្លារអាមេរិកដើម្បីការពារ ទប់ទល់នឹងជំងឺវីរុសកូវីដ-១៩ ដែលបានសម្លាប់មនុស្សជាង ៣០០០នាក់ និងមេរោគឆ្លងនានា ក្នុងរយៈពេល៦ខែខាងមុខនេះ។
លោក ស្រី ឱ វ៉ាន់ឌីន អ្នអ្នកនាំពាក្យក្រសួងសុខាភិបាល បាន ក្នុងសន្និសីទសារព័ត៌មានមួយនៅថ្ងៃព្រសហ្បតិ៍ ទី៥មីនា នេះថា ក្រសួងសុខាភិបាលដែលសហការជាមួយក្រសួងសេដ្ឋកិច្ច ប្រើប្រាស់ថវិកានោះក្នុងការត្រៀមគ្រូពេទ្យប្រចាំការតាមបណ្តារាជធានីខេត្តមួយចំនួន ការត្រៀមឱសថ និងការព្យាបាល និងសម្ភារៈអប់រំផ្សេងៗ។
លោក ស្រី ឱ វ៉ាន់ឌីន បានបន្ថែមថា៖ «មានទាំងការគិតគូរ ប៉ាន់ប្រមាណអំពីតម្រូវការនៃសម្ភារៈបរិក្ខារពេទ្យ។ ហើយក៏ដូចជាឱសថចាំបាច់ៗសម្រាប់ផ្គត់ផ្គង់អ្នកជំងឺ ប្រសិនបើយើងរកឃើញថាមាននរណាម្នាក់មានវិជ្ជមាននូវវីរុស កូវីដ-១៩ នេះ»។
ក្រសួងសេដ្ឋកិច្ច និងហិរញ្ញវត្ថុ បានបង្ហាញថា ចំពោះក្របខ័ណ្ឌរួមជាវិធានការ និងយន្តការជាកញ្ចប់ ពាក់ព័ន្ធកិច្ចការពារវីរុស Covid-19 និងមេរោគឆ្លងនានា រាជរដ្ឋាភិបាលគ្រោងចំណាយថវិកាជាង ៣០ លានដុល្លារអាមរិក ដើម្បីបង្កើតប្រព័ន្ធការពារ និងឧបករណ៍តាមដាន, រៀបចំទីកន្លែង, ទទួលដោះស្រាយ និងការស្វែងរកអ្នកដែលឆ្លងជំងឺជាដើម។
លោក អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាសហ ប្រធានក្រុម (ឃ) និងលោក Bretton G. Scaironi សហប្រធានក្រុម ឃ (ខាងផ្នែកឯកជន) នៅក្នុងកិច្ចប្រជុំក្រុមការងារ ផ្នែកនីតិកម្មពន្ធដារ និងអភិបាលកិច្ច (ក្រុម ឃ) នៅថ្ងៃទី៥ ខែមីនា ឆ្នាំ២០២០ នេះ ក្នុងនោះ អង្គប្រជុំបានលើឡើងបញ្ហា ប្រឈមចំនួន ៤ រួមមាន ៖ គឺការសិក្សាស្រាវជ្រាវលើពាណិជ្ជកម្មថ្នាំជក់ខុសច្បាប់, សេចក្តីបារម្ភរបស់ឧស្សាហកម្មស្រា លើសេចក្តី ព្រាងច្បាប់ ស្ដីពីការត្រួតពិនិត្យផលិតផលគ្រឿងស្រវឹង, ផលប៉ះពាល់ពីជំងឺរលាកផ្លូវដង្ហើមធ្ងន់ធ្ងរ (Covid-19) និងផលប៉ះពាល់នៃការព្យួរភាពអនុគ្រោះពន្ធលើទំនិញមួយចំនួន ក្រោមកម្មវិធីទំនិញគ្រប់មុខ លើកលែងតែអាវុធ (EBA) ដល់សេដ្ឋកិច្ច កម្ពុជា ។
ចំពោះផលប៉ះពាល់ ពីជំងឺរលាកផ្លូវដង្ហើមធ្ងន់ធ្ងរ Covid-19, នៅក្នុងពិភពលោក និងក្នុងតំបន់បានជះឥទ្ធិពលដល់ សេដ្ឋកិច្ចកម្ពុជា ក្នុងនោះ ផ្នែកឯកជនបានស្នើសុំការផ្ដល់ព័ត៌មាន វិធានការរបស់រាជរដ្ឋាភិបាលលើបញ្ហានេះ ដូចជា ការរៀបចំ ជាច្បាប់បទប្បញ្ញត្តិ និងគោលនយោបាយសម្រាប់ប្រយុទ្ធប្រឆាំង នឹងវីរុស Covid-19 ប្រសិនបើវីរុសរីករាលដាលនៅប្រទេស កម្ពុជា និងផលប៉ះពាល់ដល់សេដ្ឋកិច្ចកម្ពុជា ។
ឆ្លើយតបនឹងបញ្ហានេះ ក្រសួងសុខាភិបាល បានចាត់វិធានការ លើកពីការការពារការរីករាលដាលនៃវីរុស Covid-19 ព្រមទាំងគិតគូររកវិធានការជាប្រព័ន្ធ ដើម្បីទប់ស្កាត់បញ្ហានេះពីគ្រប់ក្រសួង-ស្ថាប័នពាក់ព័ន្ធ តាមរយៈការរៀបចំផែនការយុទ្ធ សាស្ត្រ, វិធានការឆ្លើយតបបន្ទាន់, រៀបចំគោលការណ៍ណែនាំ ចុះធ្វើការផ្សព្វផ្សាយនៅហ្នឹងកន្លែង និងវិធានការអប់រំដល់ប្រជាពលរដ្ឋ ដើម្បីដោះស្រាយ និងបង្ការបញ្ហា ដែលអាចកើតមានជាយថាហេតុ ឱ្យបានទាន់ពេលវេលា ក្នុងស្មារតីបុរេសកម្ម ក៏ដូចជាពង្រឹង និងបង្កើនធនធានបន្ថែម ទាំងផ្នែកគ្រូពេទ្យ សម្ភារៈពេទ្យ រៀបចំឧបករណ៍ស្គេនកម្តៅ ប្រព័ន្ធគ្រប់គ្រង និងភ្នាក់ងារចាំទទួលព័ត៌មានពាក់ព័ន្ធវីរុសតាមរយៈលេខទំនាក់ទំនងបន្ទាន់លេខ ១១៥ ផងដែរ ។
ជាមួយគ្នានេះ, ក្រសួងសេដ្ឋកិច្ច និងហិរញ្ញវត្ថុ បានកំពុងសហការជាមួយក្រសួងសុខាភិបាល និងដៃគូពាក់ព័ន្ធ ដើម្បីរៀបចំក្របខណ្ឌរួម, ជាវិធានការ និងយន្តការជាកញ្ចប់ពាក់ព័ន្ធ សម្រាប់កិច្ចការពារវីរុស Covid-19 និងមេរោគឆ្លងនានា ក្នុងនោះ សម្រាប់រយៈពេល ៦ ខែ រាជរដ្ឋាភិបាលគ្រោងចំណាយថវិកាជាង ៣០ លានដុល្លារអាមេរិក តាមរយៈការរៀបចំបង្កើតប្រព័ន្ធការពារ និងឧបករណ៍តាមដាន, រៀបចំទីកន្លែងដើម្បីទទួលដោះស្រាយ ក៏ដូចជាស្វែងរកអ្នកឆ្លង កុំឱ្យមានការរីករាលដាល សំដៅបង្ការ ការពារ និងព្យាបាលក្នុងករណីមានការឆ្លងវីរុស ។ ការរៀបចំក្របខ័ណ្ឌដោះស្រាយទាំងផ្នែករឹង និងផ្នែកទន់ ដើម្បីអាចទប់ស្កាត់ រួមជាមួយវិធានការដោះស្រាយលើគ្រប់ទិដ្ឋភាពដែលអាច ឈានទៅដល់ការគិតគូរឱ្យមានប្រព័ន្ធការពារសុខភាពសាធារណៈសម្រាប់ការពារជំងឺឆ្លងទៅអនាគតតែម្តង ៕ ដោយ៖កូឡាប
