សហស្ថាបនិកក្រុមហ៊ុន Alibaba លោក Jack Ma បានបរិច្ចាគម៉ាសចំនួន ១ លាន ដល់ប្រទេសជប៉ុន តាមរយៈមូលនិធិរបស់លោក បន្ទាប់ពីប្រទេសនេះបានជួយដល់ប្រទេសចិនយ៉ាងសប្បុរស ក្នុងការដោះស្រាយការផ្ទុះឡើងវីរុសថ្មីឆ្នាំ ២០១៩ (Covid-19) ។
ការបរិច្ចាគនេះត្រូវបានធ្វើឡើងដោយមូលនិធិជេម៉ា និងមូលនិធិអាលីបាបា កាលពីថ្ងៃច័ន្ទ ដើម្បីជួយប្រទេសជប៉ុនកាត់បន្ថយការរងគ្រោះនៅក្នុងការផ្ទុះឡើងនេះ ។ នេះបើតាម AsiaOne ។
លោក Ma បានសរសេរនៅលើគណនី Weibo របស់គាត់ដោយដកស្រង់កំណាព្យចិនបុរាណមួយថា៖ “ដូចជាជួរភ្នំដែលលាតសន្ធឹងនៅចំពោះមុខអ្នក និងខ្ញុំ ចូរចែករំលែកការសាកល្បង និងការលំបាកជាមួយគ្នា។ យើងសង្ឃឹមថាអ្វីៗនឹងប្រសើរឡើងឆាប់ៗនេះ” ។
នៅក្នុងសារអំពីការបរិច្ចាគរបស់គាត់តាមរយៈ Mainichi លោកបាននិយាយថា៖ “ ប្រជាជនជប៉ុនបានគាំទ្រប្រទេសចិនតាមរយៈការបញ្ជូនរបស់របរដែលរួមមានម៉ាស និងឈុតការពារជាច្រើនលើក នៅពេលដែលកង្វះខាតធនធានវេជ្ជសាស្ត្រ បានកើនឡើងនៅក្នុងប្រទេសរបស់យើង” ។
ក្រៅពីម៉ាសដែលបរិច្ចាគដោយម៉ា ស្ថានទូតចិនប្រចាំនៅជប៉ុនក៏កំពុងផ្តល់ម៉ាស់ចំនួន ១០០,០០០ ឈុតសម្លៀកបំពាក់ការពារ ៥០០០ និងឧបករណ៍ធ្វើរោគវិនិច្ឆ័យមេរោគដល់ប្រទេសជប៉ុនផងដែរ។
នេះមិនមែនជាលើកទីមួយទេ ដែលលោក ម៉ា បានបរិច្ចាគជួយដល់អ្នកដែលកំពុងប្រយុទ្ធនៅជួរមុខ ក្នុងកំឡុងពេលនៃការផ្ទុះជំងឺ Covid-19 ។ កាលពីចុងខែមករា មហាសេដ្ឋីចិនរូបនេះក៏បានបរិច្ចាគប្រាក់ចំនួន ១៤ លានដុល្លារអាមេរិក ដល់អ្នកវិទ្យាសាស្ត្រដើម្បីជួយពួកគេក្នុងការអភិវឌ្ឍការព្យាបាលវីរុសនេះផងដែរ៕
ប្រែសម្រួលដោយ៖ លឹម ហុង (ប្រភព៖ nextshark)
