ភ្នំពេញ៖ នៅព្រឹកថ្ងៃសុក្រ ថ្ងៃទី៦ ខែមីនា ឆ្នាំ២០២០នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញដឹកនាំគណៈប្រតិភូជាន់ខ្ពស់ក្រសួងមហាផ្ទៃ មាតុភូមិនិវត្តន៍មកដល់អាកាសយានដ្ឋានអន្តរជាតិភ្នំពេញ បន្ទាប់ពីបានបំពេញទស្សនកិច្ចការងារ រយៈពេល៣ថ្ងៃ នៅរដ្ឋធានីវៀងច័ន្ទ សាធារណរដ្ឋប្រជាធិបតេយ្យប្រជាមានិតឡាវ ។
ទស្សនកិច្ចការងាររបស់សម្ដេចក្រឡាហោម ស ខេង ឧបនាយករដ្ឋមន្ត្រី ធ្វើឡើងតបតាមការអញ្ជើញរបស់លោកឧត្តមសេនីយ៍ឯក វិល័យ ឡាខាំហ្វង រដ្ឋមន្ត្រីក្រសួងសន្តិសុខសាធារណៈ នៃសាធារណរដ្ឋប្រជាធិបតេយ្យប្រជាមានិតឡាវ ដើម្បីធ្វើជាសហប្រធានដឹកនាំកិច្ចប្រជុំពិនិត្យវាយតម្លៃលទ្ធផលការអនុវត្តកំណត់ហេតុ នៃកិច្ចសហប្រតិបត្តិការឆ្នាំ២០១៩ និងកំណត់ហេតុស្ដីពីកិច្ចសហប្រតិបត្តិការឆ្នាំ២០២០ រវាងក្រសួងមហាផ្ទៃកម្ពុជា និងក្រសួងសន្តិសុខសាធារណៈឡាវ។
សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃកម្ពុជា និងលោកឧត្តមសេនីយ៍ឯក វិល័យ ឡាខាំហ្វង រដ្ឋមន្ត្រីក្រសួងសន្តិសុខសាធារណៈឡាវ បានវាយតម្លៃខ្ពស់ ចំពោះលទ្ធផលល្អប្រសើរ ដែលសម្រេចបានតាមរយៈការអនុវត្តកំណត់ហេតុ ស្ដីពីកិច្ចសហប្រតិបត្តិការឆ្នាំ២០១៩ រវាងក្រសួងទាំងពីរ រួមមានការផ្លាស់ប្ដូរទស្សនកិច្ចប្រតិភូអាជ្ញាធរខេត្តជាប់ព្រំដែន និងប្រតិភូនៃបណ្ដាអង្គភាពពាក់ព័ន្ធនៅថ្នាក់ក្រសួង ការងារបណ្ដុះបណ្ដាលធនធានមនុស្ស និងកិច្ចសហប្រតិបត្តិការបង្ក្រាបបទល្មើសគ្រប់ប្រភេទនៅ តាមបណ្ដោយព្រំដែន ពិសេសបទល្មើសគ្រឿងញៀន។
ភាគីទាំងពីរពង្រឹង កិច្ចសហការជិតស្និទ្ធរវាងអាជ្ញាធរខេត្ត និងកងកម្លាំងមានសមត្ថកិច្ចនៃបណ្ដាខេត្តជាប់ព្រំដែនរបស់ប្រទេសទាំងពីរ ក្នុងការថែរក្សាបរិយាកាសសន្តិសុខតាមខ្សែបន្ទាប់ព្រំដែន បានយ៉ាងល្អប្រសើរ រួមចំណែកបង្កលក្ខណ្ឌអំណោយផល ដល់ការប្រកបអាជីវភាពរស់នៅរបស់ប្រជាពលរដ្ឋ បម្រើការអភិវឌ្ឍសង្គមជាតិ និងផលប្រយោជន៍ទៅវិញទៅមក របស់ប្រជាជននៃប្រទេសទាំងពីរ កម្ពុជា ឡាវ។
នៅក្នុងឱកាសនោះ ភាគីទាំងពីរបាន ចុះហត្ថលេខាលើកំណត់ហេតុស្ដីពីកិច្ចសហប្រតិបត្តិការ សម្រាប់ឆ្នាំ២០២០ និងបានឯកភាពយកចិត្តទុកដាក់ បន្តអនុវត្តកិច្ចការសំខាន់ៗមួយចំនួនទៀត រួមមាន បន្តជំរុញអាជ្ញាធរខេត្តជាប់ព្រំដែនប្រទេសទាំងពីរឱ្យសហការបង្កលក្ខណៈ ងាយស្រួលដល់ការ ចេញ ចូល ឆ្លងកាត់ព្រំដែនរបស់ប្រជាពលរដ្ឋ និងការផ្លាស់ប្ដូរពាណិជ្ជកម្មទៅវិញទៅមក ដើម្បីបំរើដល់សេចក្ដីត្រូវការនៃការអភិវឌ្ឍ និងការរីកចម្រើន នៃជីវភាពរស់នៅរបស់ប្រជាពលរដ្ឋតំបន់ព្រំដែន ព្រមទាំងសហការដោះស្រាយបញ្ហា ឬបាតុភាពផ្សេងៗ ជូនប្រជាពលរដ្ឋបានទាន់ពេលវេលា ដោយសន្តិវិធី និងមានការយោគយល់គ្នាខ្ពស់។
ភាគីទាំងពីរនឹងបន្តសហការចាត់វិធានការ ម៉ឺងម៉ាត់ទប់ស្កាត់ និងបង្ក្រាបទល្មើស គ្រឿងញៀនឆ្លងដែន នៃប្រទេសទាំងពីរ ព្រមទាំងសហការផ្លាស់ប្ដូរព័ត៌មាន និងបទពិសោធន៍ទៅវិញទៅមក ពាក់ព័ន្ធនឹងបទល្មើសគ្រឿងញៀន ជាពិសេសជំរុញបង្កើតភូមិឃុំ និងសាលារៀនគ្មានគ្រឿងញៀនតាមតំបន់ព្រំដែន និងបន្តជំរុញចាត់វិធានការតឹងរឹងដើម្បីទប់ស្កាត់ និងបង្ក្រាបការលួចឆ្លងដែនខុសច្បាប់ ព្រមទាំងបន្តកិច្ចសហប្រតិបត្តិការគ្រប់គ្រង តាមខ្សែបន្ទាប់ព្រំដែន និងសហការដោះស្រាយបញ្ហាផ្សេងៗដោយសន្តិវិធី ឈរលើគោលការណ៍ គោរពឯករាជ្យ និងអធិបតេយ្យគ្នាទៅវិញទៅមក។
សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញលោកឧត្តមសេនីយ៍ឯក វិល័យ ឡាខាំហ្វង រដ្ឋមន្ត្រីក្រសួងសន្តិសុខសាធារណៈឡាវ ដឹកនាំគណៈប្រតិភូជាន់ខ្ពស់បំពេញទស្សនកិច្ចការងារ នៅរាជធានីភ្នំពេញ នៃព្រះរាជាណាចក្រកម្ពុជា តាមពេលវេលាសមស្រប ដើម្បីចូលរួមកិច្ចប្រជុំពិនិត្យវាយតម្លៃលទ្ធផលការអនុវត្តកំណត់ហេតុ សហប្រតិបត្តិការឆ្នាំ២០២០ និងចុះហត្ថលេខា លើកំណត់ហេតុសហប្រតិបត្តិការឆ្នាំ២០២១ រវាងក្រសួងទាំងពីរ។
ដោយឡែកក្នុងពេល បំពេញទស្សនកិច្ចការងារនៅរដ្ឋធានីវៀងច័ន្ទនេះដែរ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រួងមហាផ្ទៃ ក៏បានអញ្ជើញដឹកនាំគណៈប្រតិភូជាន់ខ្ពស់ចូលជួប សម្ដែងការគួរសម និងបានពាំនាំ ការផ្ដាំផ្ញើសួរសុខទុក្ខរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជណាចក្រកម្ពុជា ជូនលោកថងលូន ស៊ីសូលីត នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ។
លោក ថងលូន ស៊ីសូលីត ក៏បានលើកឡើង ចំពោះទំនាក់ទំនងដ៏ល្អរវាងកម្ពុជា និងឡាវ តាមរយៈការផ្លាស់ប្ដូរទស្សនកិច្ចទៅវិញទៅមកជាញឹកញាប់ រវាងប្រមុខដឹកនាំជាន់ខ្ពស់នៃប្រទេសទាំងពីរ ដែលបានរួមចំណែករឹតចំណងសាមគ្គីភាព មិត្តភាព និងកិច្ចសហប្រតិបត្តិការកាន់តែជិតស្និទ្ធ ទាំងលើវិស័យសេដ្ឋកិច្ច នយោបាយ សន្តិសុខ កាន់តែរឹងមាំថែមទៀត។
ក្នុងជំនួបនោះដែរ ភាគីទាំងពីរបានកត់សម្គាល់នូវសារសំខាន់នៃកិច្ចសហប្រតិបត្តិការ រវាងអាជ្ញាធរខេត្តជាប់ព្រំដែន និងកងកម្លាំងនគរបាលនៃប្រទេសទាំងពីរ ដែលជាការរួមចំណែកមិនអាចខ្វះ បានក្នុងបុព្វហេតុនៃការរក្សាសន្តិសុខជូនជាតិ និងប្រជាជន ជាពិសេសការបង្ការ និងបង្ក្រាបបទល្មើសឆ្លងដែនគ្រប់ប្រភេទ សំដៅបម្រើដល់ការអភិវឌ្ឍសេដ្ឋកិច្ច និងសង្គមប្រកបដោយចីរភាព នៃប្រទេសទាំងពីរ៕ដោយ៖កូឡាប