នារីជាអ្នកបកប្រែភាសាជនជាតិកូរ៉េម្នាក់ រស់នៅក្នុងប្រទេសហូឡង់ ត្រូវបានបុរសពីរនាក់ជិះម៉ូតូ ផ្តោតគោលដៅមកលើរូបនាង ហើយបានស្រែកថា “ ចិន!” ហើយព្យាយាមដាល់នាង ពេលនាងកំពុងជិះកង់។
Jiye Seong-Yu អាយុ ២៩ ឆ្នាំ បានប្រាប់ BuzzFeed ថា “ វាពិតជាគួរឱ្យខ្លាចណាស់ ព្រោះវាយឺតពេលទៅហើយ ខណៈដែលខ្ញុំនៅម្នាក់ឯង ហើយខ្ញុំនៅតាមផ្លូវដែលខ្ញុំមិនឃើញនរណាម្នាក់នៅក្បែរនោះសោះ” ។
Seong-Yu ដែលជិះកង់នៅផ្ទះតែម្នាក់ឯងនៅក្នុងទីក្រុង Hague បន្ទាប់ពីបញ្ចប់ថ្នាក់រាំមួយនៅវេលាប្រហែលជាម៉ោង ១០ យប់ កាលពីថ្ងៃច័ន្ទ បានព្យាយាមគេចចេញពីកណ្តាប់ដៃរបស់បុរសទាំងនោះ ហើយស្ទើរតែដួលកង់ជួបគ្រោះថ្នាក់។
នាងបានប្រាប់មិត្តរួមបន្ទប់របស់នាង និងដាក់របាយការណ៍ទៅប៉ូលីសអំពីហេតុការណ៍ដែលបានកើតឡើងនេះ។
Seong-Yu សង្ឃឹមថា ខ្សែវីដេអូឃ្លាំមើលនឹងត្រូវបានរកឃើញដោយប៉ូលីស ប៉ុន្តែនាងត្រូវបានគេប្រាប់ថា ពួកគេមិនអាចធ្វើអ្វីបានទៀតទេ រហូតទាល់តែមានមនុស្សជាច្រើនដាក់របាយការណ៍ស្រដៀងគ្នានេះ ទើបអាចមានប្រសិទ្ធភាព។
Seong-Yu ដែលបានរស់នៅក្នុងប្រទេសហូឡង់អស់រយៈពេល ៣ ឆ្នាំហើយ បាននិយាយថា នាងបានជួបប្រទះនឹងការរើសអើងជាតិសាសន៍នៅក្នុងប្រទេសអ៊ឺរ៉ុបពីមុន ប៉ុន្តែឧប្បត្តិហេតុថ្មីៗនេះបានធ្វើឱ្យនាងភ្ញាក់ផ្អើលជាខ្លាំង។
នាងបាននិយាយថា “ ខ្ញុំបានមកប្រទេសហូឡង់ជាមួយឪពុកចុងរបស់ខ្ញុំដែលជាជនជាតិហូឡង់ និងម្តាយរបស់ខ្ញុំ អស់រយៈពេលជាយូរមកហើយ ។ យើងមិនដែលមានបទពិសោធន៍ទាំងនេះទេ នៅពេលដែលយើងមកទីនេះជាក្រុមគ្រួសារ។”
នាងបានបន្តទៀតថា “ នៅពេលដែលខ្ញុំនៅជាមួយមិត្តភក្តិជនជាតិហូឡង់ វាមិនកើតឡើងចំពោះខ្ញុំទេ” ។ មានតែកើតឡើងនៅពេលដែលខ្ញុំនៅម្នាក់ឯង ឬជាមួយមិត្តស្រីអាស៊ីដទៃទៀតប៉ុណ្ណោះ។ ”
Seong-Yu ចង់លើកកម្ពស់ការយល់ដឹងអំពីការរើសអើងជាតិសាសន៍ ដែលផ្តោតលើប្រជាជនដើមកំណើតអាស៊ី តាមរយៈការចាប់ផ្តើមបង្កើតអង្គការជាមួយមិត្តកូរ៉េនៅក្នុងប្រទេសហូឡង់។ នាងក៏បានចូលហ្វេសប៊ុក ដើម្បីចែករំលែកពីករណីដ៏ជ្រុលហួសហេតុនេះ ៕
ប្រែសម្រួលដោយ៖ លឹម ហុង (ប្រភព៖ nextshark)