ប្រទេសបង់ក្លាដេស និងមីយ៉ានម៉ា បានព្រមព្រៀងគ្នាលើរយៈពេល ក្នុងការបញ្ជូនជនជាតិរ៉ូហ៊ីងយ៉ារាប់សែននាក់ ត្រឡប់ទៅកាន់ប្រទេសមីយ៉ានម៉ាវិញ។ នេះបើតាមការចេញផ្សាយរបស់ BBC។
បើតាមការបញ្ជាក់របស់បង់ក្លាដេស បានឲ្យដឹងថា មីយ៉ានម៉ា យល់ព្រមទទួលជនជាតិដើមភាគតិចរ៉ូហ៊ីងយ៉ាចំនួន ១.៥០០នាក់ឲ្យត្រឡប់ទៅវិញជារៀងរាល់សប្តាហ៏ ហើយពួកគេគ្រោងនឹងបញ្ជូនជនជាតិដើមទាំងនោះត្រឡប់ទៅមីយ៉ានម៉ាវិញឲ្យអស់ក្នុងរយៈពេល
២ឆ្នាំ។
បង់ក្លាដេសបញ្ជាក់ថា ខ្លួននឹងបញ្ជូនអ្នកដែលមានគ្រួសារ ព្រមទាំងកុមារកំព្រា និងកុមារដែលកើតមកដោយសារតែការចាប់រំលោភ ឲ្យត្រឡប់ទៅមុន។
ទោះយ៉ាងណា ជនភៀសខ្លួនរ៉ូហ៊ីងយ៉ាដែលកំពុងនៅក្នុងប្រទេសបង់ក្លាដេសបានសំដែងការព្រួយ បារម្ភពីការត្រឡប់ទៅកាន់ប្រទេសមីយ៉ានម៉ាវិញ។
សូមរំលឹកថា ជនជាតិរ៉ូហ៊ីងយ៉ាកាន់សាសនាអ៊ីស្លាម ច្រើនជាង ៧៤០.០០០ បានភៀសខ្លួនទៅកាន់ប្រទេសបង់ក្លាដេស ដើម្បីគេចពីអំពើហឹង្សាដែលកើតឡើងនៅក្នុងរដ្ឋរ៉ាឃីន។
បើតាមរបាយការណ៏ក្រុមមនុស្សធម៌ បានឲ្យដឹងថា ជនជាតិរ៉ូហ៊ីងយ៉ា ជិត ៧.០០០នាក់ត្រូវបានសម្លាប់ចាប់តាំងពីអំពើហិង្សាផ្ទុះឡើងកាលពីខែសីហា ឆ្នាំ ២០១៧មក៕ សុភ័ក្ត្រ
