ភ្នំពេញ: ក្រុមទម្លាក់យោងម្នាក់ ក្នុងចំណោម៣នាក់ ត្រូវចោមរោមស្វាគមន៍មួយដៃមួយជើង ឡើងប៉ោងមុខ បន្ទាប់ពីក្រុមបាតសង្គមនេះ ទម្លាក់កញ្ចប់មាស ហើយប្រើល្បិចបបួលស្ត្រីម្នាក់ ជិះចេញកន្លែងកើតហេតុ លួងលោមដោះយកគ្រឿងអលង្ការអស់ពីខ្លួន ។
នារីកម្មការិនីរោងចក្រម្នាក់ត្រូវគេល្បួង ដោះដូរយកគ្រឿងអលង្ការសរុបជាង១ពាន់ដុល្លារ នាវេលាម៉ោង១និង៣០នាទី រសៀលថ្ងៃទី០៦ ខែមិនា ឆ្នាំ២០២០ នៅត្រង់ចំណុចភូមិជង្រុក សង្កាត់ត្រពាំងក្រសាំង ខណ្ឌពោធិសែនជ័យ ។
ជនរងគ្រោះឈ្មោះ ឆាន់ ស្រីនិច ភេទស្រី អាយ ២៥ឆ្នាំ មុខរបរ កម្មការនីរោងចក្រ មានប្តីឈ្មោះ វាសនាអាយុ២៧ឆ្នាំ ជាជាងជួសជុលរថយន្ត ស្នាក់នៅផ្ទះជួល ភូមិជម្ពូវ័ន សង្កាត់ចោមចៅ៣ ភ្នំពេញ។
ជនរងគ្រោះបានឲ្យដឹងថា មុនកើតហេតុ គាត់ហូបបាយ រួចបំណងចូលទៅខាងក្នុងរោងចក្រវិញ នៅភូមិព្រៃព្រីងជើង១ សង្កាត់ចោមចៅទី២ ក៏ឆ្លៀតដើរទៅកន្លែងលក់ដង្កៀប កៀបសក់ លក់នៅខាងមុខរោងចក្រ ជួបស្ត្រីជនសង្ស័យម្នាក់ដើរមកសួរ រឿងមានគេជ្រុះកញ្ចប់មាស រហូតទាក់អារម្មណ៍បាន គេក៍បបួលជិះចេញ រហូតគេលួងលោមដោះយកគ្រឿងអលង្ការអស់ពីខ្លួន ជនសង្ស័យទុកកញ្ចប់លោហៈ ពណ៌ក្រហម (ខ្សែកកាឡៃ)ឲ្យមួយខ្សែ ហើយជនសង្ស័យ៣នាក់ ស្រី២នាក់ ប្រុស១នាក់ គេចខ្លួនបាត់ នៅសល់ជនសង្ស័យម្នាក់ រៀបនឹងចាកចេញ ជនរងគ្រោះ ទាញកញ្ចប់មកមើល ដឹងថាកាឡៃ ស្ទុះចាប់កន្ទុយម៉ូតូជាប់ ស្រែកទ្រហោយំ ផ្អើលអ្នកភូមិមកជួយចាប់ជនល្មើសស្វាគមន៍យ៉ាងចាស់ដៃ ទើបប្រគល់ឲ្យនគរបាលចាត់ការបន្ត៕ ដោយ៖កូឡាប
