ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ ប្រាប់ដល់ ក្រសួងស្ថាប័នរដ្ឋទាំងអស់ ក្នុងការកាត់បន្ថយការចំណាយ ដើម្បីសន្សំថវិកា សម្រាប់ប្រយុទ្ធប្រឆាំងនឹងការរីករាលដាល នៃជំងឺរលាកផ្លូវដង្ហើបធ្ងន់ធ្រ (COVID-19) និងទប់ទាល់ផលប៉ះពាល់ អវិជ្ជមានលើកសេដ្ឋកិច្ចជាតិ។
បើតាមចេញសារាចណែនាំ ស្តីពីការអនុវត្តន៍កាត់បន្ថយចំណាយ សម្រាប់ក្រសួងស្ថាប័នទាំងអស់របស់រដ្ឋ សម្រាប់ឆ្នាំ២០២០ នៅថ្ងៃទី៦ ខែមីនា ឆ្នាំ២០២០នេះ បានបញ្ជាក់ថា នៅឆ្នាំ២០២០នេះ តម្រូវឲ្យក្រសួងស្ថាប័នទាំងអស់អនុវត្តដូចជា គ្រប់គ្រងចំណាយបន្ទុកបុគ្គលិក ឲ្យម៉ឺងម៉ាត់បំផុត ដោយអនុវត្តន៍គោលការណ៍រើសថ្មី ត្រឹមស្មើនឹងចំនួនចូលនិវត្តន៍ ពោលរក្សាចំនួនក្របខណ្ឌមន្ត្រីរាជការស៊ីវិល យោធា និងនគរបាលដូចនៅក្នុងឆ្នាំ ២០១៩។ កាត់សន្សំចំណាយ បេសកកម្មក្រៅប្រទេស៥០% ចំពោះក្រសួងស្ថាប័នទាំងអស់ លើកលែងតែទីស្តីការគណៈរដ្ឋមន្ត្រី ក្រសួងការបរទេស និងក្រសួងពាណិជ្ជកម្ម កាត់ត្រឹម២៥%។ កាត់សន្សំចំណាយលើសម្ភារការិយាល័យ ១៥% គ្រប់ក្រសួងស្ថាប័ន។ កាត់បន្ថយចំណាយសម្ភារ និងបរិក្ខារបច្ចេកវិទ្យាព័ត៌មាន១៥% គ្រប់ក្រសួងស្ថាប័ន។ កាត់សន្សំចំណាយប្រេងឥន្ធនៈ និងប្រេងរំអិល១៣% សម្រាប់គ្រប់ក្រសួងស្ថាប័ន។ព្យួរការអនុវត្តន៍រាល់ការទិញរថយន្ត សម្រាប់បម្រើការងាររដ្ឋបាលរបស់គ្រប់ក្រសួងស្ថាប័ន លើកលែងតែការទិញរថយន្តអគ្គិភ័យ រថយន្តដឹកឱសថជាដើម ដើម្បីបំពេញតម្រូវការជាចាំបាច់ ក្នុងការផ្តល់សេវាសាធារណៈ៕ ដោយ៖បញ្ញាស័ក្តិ
