កំពត៖ រដ្ឋបាលខេត្តកំពតបើកកិច្ចប្រជុំលើកទី២ រកដំណោះស្រាយ ឆ្លើយតបបញ្ហាទំនាស់ដីធ្លីរវាងប្រជាពលរដ្ឋ និងម្ចាស់ដីឡូត៍ មានទីតាំងស្ថិតក្នុងឃុំកំពង់គ្រែងស្រុកទឹកឈូខេត្តកំពត។
រសៀលថ្ងៃទី០៦ខែ មីនា ឆ្នាំ២០២០ នៅសាលប្រជុំសាលាខេត្ត រដ្ឋបាលខេត្តកំពត បានបើកកិច្ចប្រជុំលើកទី២ រកដំណោះស្រាយ ដើម្បីឆ្លើយតប ការស្នើសុំអន្តរាគមន៍ពីប្រជាពលរដ្ឋលើបញ្ហាទំនាស់ដីធ្លី ដែលពាក់ព័ន្ធព្រំផ្លូវ និងលំនៅស្ថានរវាងប្រជាពលរដ្ឋ និងម្ចាស់ដីឡូត៍ដែលមានភាពរ៉ាំរ៉ៃចាប់តាំងពីឆ្នាំ ២០១៦ មក ស្ថិតនៅទីតាំងមូលដ្ឋានភូមិព្រៃត្នោត ឃុំកំពង់គ្រែង ស្រុកទឹកឈូខេត្តកំពត។
កិច្ចប្រជុំក្រោមកិច្ចដឹកនាំដោយ លោក ជាវ តាយ អភិបាលនៃគណៈអភិបាលខេត្ត និងមានការចូលរួមពី លោកប៉ាន់ ខែមប៊ុនថន នាយករងខុទ្ទកាល័យសម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងលោក ប៉ឹល កុសល អភិបាលរងខេត្តទទួលបន្ទុកការងារដីធ្លី ព្រមទាំងថ្នាក់ដឹកនាំមន្ទីរអង្គភាពពាក់ព័ន្ធ អាជ្ញាធរមូលដ្ឋាន ភូមិឃុំ និងស្រុកទឹកឈូ និងប្រជាពលរដ្ឋដែលជាភាគីស្នើសុំរកដំណោះស្រាយ សរុប៣៣នាក់។
សូមបញ្ជាក់ថា បញ្ហាទំនាស់ដីធ្លី ដែលពាក់ព័ន្ធនិងព្រំផ្លូវ និងលំនៅស្ថានរវាងប្រជាពលរដ្ឋ និងម្ចាស់ដីឡូត៍ ខាងលើនេះដែលប្រជាពលរដ្ឋបានស្នើសុំឱ្យ ឲ្យអាជ្ញាធរមានសមត្ថកិច្ចពាក់ព័ន្ធជួយអន្តរាគមន៍ ដោះស្រាយជូនពួកគាត់។ ត្រូវបានរដ្ឋបាលខេត្តកំពតក្រោមកិច្ច ដឹកនាំប្រជុំសម្របសម្រួល រកដំណោះស្រាយ ដោយលោកជាវ តាយអភិបាលនៃគណៈអភិបាលខេត្ត រវាងភាគីទំនាស់ម្ចាស់ដីឡូត៍ និងប្រជាពលរដ្ឋ កាលពីថ្ងៃទី២៤ខែកុម្ភៈ ឆ្នាំ២០២០ កន្លងរួចមកហើយ តែលទ្ធផលរងចាំការចម្លើយ ពីម្ចាស់ដីឡូត៍ដោយភាពអវិជ្ជមាន ក្នុងការរកដំណោះស្រាយ។ ហើយកិច្ចប្រជុំនៅពេលនេះក្នុង គោលបំណងសំខាន់ គឺរកដំណោះស្រាយឲ្យបានជោគជ័យ ក្នុងគោលការណ៍ឈ្នះឈ្នះ ទាំងសងខាង នៃភាគីទំនាស់ តាមលទ្ធភាពក្រៅប្រព័ន្ធតុលាការ៕ ដោយ៖កូឡាប