ភ្នំពេញ៖មន្ទីរសុខាភិបាលរាជធានីភ្នំពេញ បានផ្សាយព័ត៌មានថា នៅល្ងាចម៉ោង ១៦:៤៩នាទី ថ្ងៃទី ៦ ខែមីនា ឆ្នាំ២០២០ នាយកដ្ឋានជំងឺឆ្លង សហការណ៍ជាមួយក្រុមការងារឆ្លើយតបបន្ទាន់(RRT)នៃមន្ទីរសុខាភិបាលរាជធានីភ្នំពេញ ការិ.ស្រុកប្រតិបតិ្តសែនសុខ និងមណ្ឌលសុខភាពភ្នំពេញថ្មី ដឹកនាំដោយលោកបណ្ឌិត ងី មានហេង ប្រធានមន្ទីរសុខាភិបាលរាជធានីភ្នំពេញ បានចុះអង្កេតតាមដាន និងធ្វើការវាយតម្លៃម្តងទៀតលើករណីនេះ និងបានមកយកវត្ថុវិភាគពីជនជាតិចិនទាំង២នាក់នោះ ដើម្បីយកទៅពិនិត្យរកCOVID-19 ឲ្យច្បាស់នៅមន្ទីរពិសោធន៍នៃវិទ្យាស្ថានជាតិប៉ាស្ទរ័កម្ពុជា។
ជាលទ្ធផលបឋមតាមការសាកសួរ និងពិនិត្យរោគសញ្ញាបានឲ្យដឹងថា ករណីនេះពុំមានអាការៈឈឺ និងមិនមានរោគសញ្ញា ណាមួយ ត្រូវជាមួយនិយមន័យដែលផ្តល់ដោយ ក្រសួងសុខាភិបាលនោះទេ។
ជាចុងក្រោយយើងបានផ្ដល់ការអប់រំ ដល់ករណីជនជាតិចិន ហេីយធ្វើការតាមដានសុខភាពរយៈ១៤ថ្ងៃ គិតត្រឹមថ្ងៃដែលគាត់មកដល់ប្រទេសកម្ពុជា។ ក្នុងអំឡុងពេល១៤ថ្ងៃដដែលនេះ ប្រសិនបើគាត់មានរោគសញ្ញា ក្ដៅខ្លួន ក្អក ហៀរសំបោរ ឈឺបំពង់ក ពិបាកដកដង្ហើម ត្រូវរាយការណ៍ មកមន្ត្រីសុខាភិបាល(115) ឬអាជ្ញាធរមូលដ្ឋានជាបន្ទាន់ ដើម្បីមន្ត្រីសុខាភិបាលទៅយកសំណាកភ្លាម។ យើងបានអប់រំអំពី អនាម័យក្នុងការរស់នៅក្នុងផ្ទះ ឬក៏ចេញទៅតាមទីសាធារណៈ។
នាយកដ្ឋានប្រយុទ្ធនឹងជំងឺ បានឲ្យដឹងថា រហូតដល់ម៉ោង ៥ ល្ងាច ថ្ងៃទី ៦ មីនា ២០២០ យេីងនៅមិនទាន់រកឃេីញករណីថ្មីនៅឡេីយទេ យេីងនៅតែរក្សា ១ករណី ដដែល ដែលគាត់ជាជនជាតិចិន ហេីយគាត់បានព្យាបាលជាសះស្បេីយដោយគ្រូពេទ្យនៅក្រុងព្រះសីហនុ និងបានវិលត្រលប់ទៅប្រទេសចិនវិញ នៅថ្ងៃទី ១០ កុម្ភ: ២០២០ ។ យេីងបានធ្វេីតេស្តកេីនដល់ ៤២៥ ករណី តែមិនបានរកឃេីញវិជ្ជមានមេរោគ COVID-19 នោះទេ ។ ដោយឡែកអ្នកប៉ះពាល់ផ្ទាល់ ៤នាក់ និង ៤០នាក់ប៉ះពាល់ប្រយោល ជាមួយអ្នកជំងឺជនជាតិជប៉ុន ដែលតម្រូវឱ្យគាត់នៅ ដោយឡែកពីគេចំនួន ១៤ថ្ងៃ និងតាមដានសុខភាពនោះ រហូតពេលនេះពួកគាត់ពុំទាន់មានរោគសញ្ញានៅឡេីយទេ ។ យេីងនៅតែបន្តធ្វេីការងារខាងលេីនេះដោយ សហការយ៉ាងជិតស្និទ្ធជាមួយអាជ្ញាធរដែនដី មន្ត្រីអង្គការសុខភាពពិភពលោក WHO មជ្ឈមណ្ឌលប្រយុទ្ធនឹងជំងឺឆ្លងសហរដ្ឋអាមេរិក USCDC និងវិទ្យាស្ថានប៉ាស្ទ័រកម្ពុជា IPC ៕ ដោយ៖កូឡាប