(ព្រះសីហនុ)៖ មានគ្រោះថ្នាក់ចរាចរណ៍ រថយន្តចំនួន៥គ្រឿងបុកប៉ះបន្តគ្នា បង្កឡើងដោយរថយន្តកុងតឺន័រមួយគ្រឿង បានដាច់ហ្វ្រាំងនៅផ្លូវចំណោតលោកយាយម៉ៅក្រុងព្រះសីហនុ វេលាម៉ោង 3 កន្លះ រសៀលថ្ងៃទី 6មិនា2020។ សមត្ថកិច្ចប្រាប់ថា មិនមានមនុស្សរងគ្រោះថ្នាក់ធ្ងន់ធ្ងរទេ និងថាករណីនេះ សមត្ថកិច្ចជំនាញបានធ្វើការដោះស្រាយតាមនិតិវិធី។
បើតាមនគរបាលជំនាញបញ្ជាក់ថា ត្រង់ចំណុចនេះជាផ្លូវកោងនិងចំណោត ងាយមានគ្រោះថ្នាក់ចរាចរណ៍ ដែលបង្កឡើងដោយការបើកបរលឿន មិនប្រុងប្រយត្ន័។
របាយការណ៍របស់ស្នងការដ្ឋាននគរបាលខេត្ត បានបញ្ជាក់ថា គ្រោះថ្នាក់ចរាចរណ៍នេះ បង្កដោយរថយន្តដឹកកុងតឺន័រ ១គ្រឿងម៉ាក FUSO ពណ៌បៃតង ពាក់ផ្លាកលេខ ភ្នំពេញ 3D-3192 បើកបរឈ្មោះ ស៊ី ធឿន ភេទប្រុស អាយុ២៧ឆ្នាំ ស្នាក់នៅសង្កាត់២ ក្រុង-ខេត្តព្រះសីហនុ មានទិសដៅកើតឆ្ពោះទៅលិច លុះមកដល់ចំណុចខាងលើស្ថានភាពផ្លូវចុះចំណោទ រថយន្តដាច់ហ្វ្រាំង បានជ្រុលទៅជាបន្តបន្ទាប់រថយន្ត ៤គ្រឿងមានទិសដៅស្របគ្នារួមមាន៖ ១ រថយន្តម៉ាក HYUNDAI ពណ៌ ទឹកប្រាក់ ពាក់ផ្លាកលេខ ព្រះសីហនុ2A-8562 អ្នកបើកបរឈ្មោះ យ៉ុក សុខហុងភេទប្រុស អាយុ ៣១ឆ្នាំ មុខរបរ បើកបរថយន្ត ស្នាក់នៅ ឃុំរាម ស្រុកព្រៃនប់ ខេត្តព្រះសីហនុ។ ២ រថយន្តស្ទូចម៉ាក FUSO ពណ៌ ស ពាក់ផ្លាកលេខភ្នំពេញ 3B-7907 (ជាកម្មសិទ្ធរបស់ក្រុមហ៊ុនដូនពេញ) ចំណែកអ្នកបើកបរឈ្មោះ ផុន សុភាព ភេទប្រុស អាយុ ៣១ឆ្នាំ មុខរបរ ស្នាក់នៅសង្កាត់២ ក្រុង/ខេត្តព្រះសីហនុ។ ៣ រថយន្តម៉ាក TICO ពណ៌ ឈាមជ្រូក ពាក់ផ្លាកលេខ កណ្ដាល 2A-0664 អ្នកបើកបរឈ្មោះ ប៉ែន ហឿន ភេទប្រុស អាយុ៣៧ឆ្នាំ មុខរបររត់តាក់ស៊ី ស្នាក់នៅភូមិ៣ សង្កាត់៣ ក្រុង-ខេត្តព្រះសីហនុ។ ៤ រថយន្តម៉ាក INNOVA ពណ៌ ស ពាក់ផ្លាកលេខ ភ្នំពេញ 2BD-1389 អ្នកបើកបរឈ្មោះ យ៉ុន យេន ភេទប្រុស អាយុ ៣៩ឆ្នាំ មុខរបរ បុគ្គលិកកាស៊ីណូហូលីដេ ស្នាក់នៅភូមិ១ សង្កាត់លេខ៣ ក្រុង-ខេត្តព្រះសីហនុ។
គ្រោះថ្នាក់ចរាចរណ៍នេះ បណ្ដាលឲ្យរងរបួសមនុស្សធ្ងន់ត្រង់ជើងម្នាក់ ឈ្មោះ ស៊ី ធឿន អ្នកបើកបររថយន្តកុងតឺន័រ បានបញ្ជូនទៅព្យាបាលនៅគ្លីនិកមិត្តភាពឃ្លាំងលើ។
រីឯវត្ថុតាងរថយន្តចំនួន ៥គ្រឿង ខូចខាតកម្រិត (ធ្ងន់៤គ្រឿង ស្រាល១គ្រឿង) ត្រូវបានសមត្ថកិច្ចជំនាញ យកមករក្សាទុកនៅ ការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាល ខេត្តព្រះសីហនុបន្តតាមនីតិវិធី៕ ដោយ៖បញ្ញាស័ក្តិ
