ចិន នៅថ្ងៃសៅរ៍នេះ បានឲ្យដឹងថា មានអ្នកស្លាប់បន្ថែមដោយសារវីរុសកូរ៉ូណា ចំនួន ២៨នាក់ ហើយតួលេខអ្នកស្លាប់សរុបទូទាំងប្រទេសកើនដល់ចំនួន ៣.០៧០នាក់។
អ្នកស្លាប់ថ្មីទាំងអស់ស្ថិតក្នុងខេត្ត Hubei ដែលជាកន្លែងផ្ទុះនៃវីរុសមរណៈនេះ។
ចិនក៏បានប្រកាសទៀតថា មានអ្នកឆ្លងត្រឹមតែ ៩៩នាក់ប៉ុណ្ណោះកាលពីថ្ងៃសុក្រម្សិលមិញ ដែលមានការថយចុះពី១៤៣ករណីកាលពីថ្ងៃសុក្រ ដែលនេះគឺជាតួលេខដ៏ទាបបំផុតចាប់តាំងពីថ្ងៃទី ២០ខែមករាមក។
នេះបើតាមការឲ្យដឹងរបស់គណៈកម្មាការសុខាភិបាលចិន។
សូមបញ្ជាក់ថា វីរុសកូរ៉ូណា ឬ COVID-19 បានផ្ទុះឡើងកាលពីខែធ្នូ កន្លងទៅ និងបានរាតត្បាតយ៉ាងលឿនទៅកាន់ប្រទេសជិត១០០ជុំវិញពិភពលោក។ រហូតមកដល់ពេលនេះ មានអ្នកស្លាប់ដោយសារវីរុសនេះជិត ៣.៥០០នាក់ជុំវិញពិភពលោក និងឆ្លងលើស១០០.០០០ករណី។
ក្រៅពីមានការឆ្លង និងស្លាប់យ៉ាងច្រើន អ្នកជំងឺជិត ៦០.០០០នាក់ត្រូវបានព្យាបាលឲ្យជាសះស្បើយ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia