មនុស្សចំនួន ២១នាក់នៅលើកប៉ាល់ទេសចរណ៍មួយគ្រឿងដែលចូលចតនៅសមុទ្រអាមេរិច មានផ្ទុកវីរុសកូរ៉ូណា។
ការរកឃើញអ្នកផ្ទុកវីរុសនេះកើតឡើង ក្រោយពេលមនុស្សចំនួន ៤៦នាក់ដែលនៅលើកប៉ាល់ទេសចរណ៍ Grand Princess ត្រូវបានគេធ្វើតេស្តដើម្បីរកវីរុស។ កប៉ាល់ទេសចរណ៍យក្សនោះបានចតនៅដែនទឹកនៃរដ្ឋកាលីហ្វញ៉ា។
អនុប្រធានាធិបតីអាមេរិច លោក Mike Pence បាននិយាយថា ក្នុងចំណោមអ្នកផ្ទុកវីរុស ២១នាក់ មាន ១៩នាក់ជាបុគ្គលិកនាវា និង ២នាក់ជាអ្នកដំណើរ។
នៅលើនាវាទេសចរណ៍យក្សនោះ មានមនុស្សសរុបចំនួន ៣.៥០០នាក់។
លោកថ្លែងទៀតថា រដ្ឋាភិបាលសហព័ន្ធកំពុងធ្វើកិច្ចការជាមួយនឹងមន្រ្តីរដ្ឋកាលីហ្វញ៉ាដើម្បីយកប៉ាល់នៅកាន់កំពង់ផែនៅចុងសប្តាហ៍នេះ ហើយមនុស្សដែលនៅលើកប៉ាល់ទាំងអស់ នឹងត្រូវធ្វើតេស្តរកវីរុស។
លោកអនុប្រធានាធិបតី បាននិយាយថា អ្នកទាំងនោះនឹងត្រូវដាក់អោយនៅដាច់ដោយឡែក ហើយអ្នកដែលត្រូវការការមើលថែសុខភាព នឹងទទួលបានវា៕
អត្ថបទប្រែសម្រួលដោយ៖ សុភ័ក្រ
ប្រភព៖ 7News
