ភ្នំពេញ៖ លោកឧត្តមសេនីយ៍ឯក ហ៊ុនម៉ាណែត កូនប្រុសច្បង សម្តេចតេជោ ហ៊ុន សែន បានស្នើឲ្យប្រជាពលរដ្ឋទាំងអស់ ក៏ដូចជាលោកតា លោកយាយ រួមគ្នារក្សាសន្តិភាពកុំចូលរួមក្នុងការអូសទាញ ពីជនអគតិមួយចំនួន ដោយចង់ផ្លាស់ប្ដូររដ្ឋាភិបាលស្របច្បាប់ ដោយលោកបញ្ជាក់ថា បើមានគេបបួលទៅធ្វើរដ្ឋប្រហារ ឬដុតកម្ទេចប្រទេសយើង សូមបងប្អូនលោកតា លោកយាយកុំចូលរួម ហើយអ្វីដែលយើងត្រូវចូលរួមនោះ គឺការ ចូលរួមកសាងវត្តអារាម ការចូលរួមធ្វើបុណ្យទាន ចូលរួមបោះឆ្នោត ជូនសម្ដេចតេជោហ៊ុន សែន ធ្វើជានាយករដ្ឋមន្ត្រីបន្តទៀត។
លោកឧត្តមសេនីយ៍ឯក ហ៊ុនម៉ាណែត អគ្គមេបញ្ជាការរងកងយុទ្ធពលខេមរភូមិន្ទ និងជាមេបញ្ជាការកងទ័ពជើងគោក តំណាងដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន បានមានប្រសាសន៍ថា វត្តអារាមមិនត្រឹមតែជាកន្លែងសម្រាប់ប្រតិបត្តិព្រះធម៌ប៉ុណ្ណោះទេ តែវត្តអារាមជាកន្លែងសម្រាប់រួមសាមគ្គីគ្នា ក្នុងការកសាងនូវសមិទ្ធផលនានា សម្រាប់ព្រះរាជាណាចក្រកម្ពុជារបស់យើងផងដែរ។
លោកបញ្ជាក់ផងដែរថា សមិទ្ធផលដែលកើតមាននៅក្នុងព្រះរាជាណាចក្រកម្ពុជា និងនៅតាមវត្តអារាមនានា គឺកើតចេញពីសន្តិភាព។ ប្រទេសមានសន្តិភាពទើបមានហេដ្ឋារចនាសម្ព័ន្ធ មានការអភិវឌ្ឍទាំងពុទ្ធចក្រ និងអាណាចក្រ។ ដូច្នេះទេ លោកសូមឲ្យមានការរួមគ្នាធ្វើយ៉ាងណា រក្សាឲ្យបាននូវសន្តិភាពនេះ។
ការលើកឡើងរបស់ លោកហ៊ុន ម៉ាណែត បានធ្វើឡើងក្នុងឱកាសដែលលោក បានអញ្ជើញជាអធិបតីភាព ក្នុងពិធីកាត់ឫសសីមា ព្រះវិហារថ្មីនិងសម្ពោធសមិទ្ធផលនានា នៅក្នុងវត្តចតុភក្រ្តាមង្គលឧត្តមមុនី ហៅវត្តហារាម ស្ថិតនៅសង្កាត់ព្រៃស ខណ្ឌដង្កោ រាជធានីភ្នំពេញ កាលពីព្រឹកថ្ងៃទី ៧ ខែមីនា ឆ្នាំ២០២០ ដោយមានការចូលរួមពីលោកឃួង ស្រេង អភិបាល នៃគណៈអភិបាលរាជធានីភ្នំពេញ មន្ត្រីក្រោមឱវាទសាលារាជធានីភ្នំពេញ ព្រមទាំងមានការជូបរួមពី មន្ត្រីរាជការកងកម្លាំងប្រដាប់អាវុធ លោកគ្រូ អ្នកគ្រូ ក្មួយៗសិស្សានុសិស្សបងប្អូនប្រជាពលរដ្ឋ ប្រមាណ១៨០០ នាក់។
ក្នុងឱកាសនោះដែរ លោកក៏បានស្នើឲ្យប្រជាពលរដ្ឋទាំងអស់ ក៏ដូចជាលោកតា លោកយាយ រួមគ្នារក្សាសន្តិភាពកុំចូលរួម ក្នុងការអូសទាញពីជនអគតិមួយចំនួន ដោយចង់ផ្លាស់ប្ដូររដ្ឋាភិបាលស្របច្បាប់ ដោយលោកបញ្ជាក់ថា បើមានគេបបួលទៅធ្វើរដ្ឋប្រហារ ឬដុតកម្ទេចប្រទេសយើង សូមបងប្អូនលោកតា លោកយាយកុំចូលរួម ហើយអ្វីដែលយើងត្រូវចូលរួមនោះ គឺការ ចូលរួមកសាងវត្តអារាម ការចូលរួមធ្វើបុណ្យទាន ចូលរួមបោះឆ្នោត ជូនសម្ដេចតេជោហ៊ុន សែន ធ្វើជានាយករដ្ឋមន្ត្រី ខណៈដែលសម្ដេចហ៊ុន សែន នៅតែបន្តធ្វើជានាយករដ្ឋមន្ត្រី នោះសម្តេចនឹងមានឱកាស ដើម្បីបម្រើប្រជាពលរដ្ឋ អភិវឌ្ឍន៍ប្រទេសជាតិ ឲ្យរីកចម្រើនជាងនេះបន្ថែមទៀត។
អភិបាលនៃគណៈអភិបាលរាជធានីភ្នំពេញ លោកឃួង ស្រេង នៅក្នុងឱកាសនោះ ក៏បានមានប្រសាសន៍ថា នៅក្នុងរដ្ឋានខណ្ឌដង្កោនេះមានវត្តអារាមចំនួន២៣វត្ត មានព្រះសង្ឃគង់នៅអាស្រ័យចំនួន៤២៧ អង្គរ។ ដោយឡែកវត្តចតុភក្រ្តាមង្គលឧត្តមមុនីហៅវត្តហារាម ដែលបានសម្ពោធ កាត់ឫសសីមានាពេលនេះ មានអាយុកាល២១៨ឆ្នាំហើយ គឺបានសាងសង់ឡើងតាំងពីដើមសតវត្សរ៍ទី១៨ សម័យរាជធានីឧត្តុង្គ ដោយមានព្រះចៅអធិការចំនួន៨ អង្គមកហើយ ហើយបច្ចុប្បន្ននេះគឺព្រះសច្ចកោសលម៉ក់ សុខលីគឺជាព្រះចៅអធិការ។
លោកអភិបាលរាជធានី ក៏បានបញ្ជាក់ផងដែរថា សមិទ្ធផលដែលបានសម្ពោធឆ្លងក្នុងឱកាសនេះ គឺព្រះវិហារថ្មីដ៏ធំស្កឹមស្កៃទំហំ១២ម៉ែត្រគុណនឹង២១ម៉ែត្រ កម្ពស់៤៩ម៉ែត្រ និងហេដ្ឋារចនាសម្ព័ន្ធ បំពាក់ភ្ជាប់
ជាច្រើនទៀត ដោយបានចំណាយថវិកាសាងសង់ រហូតដល់ប្រមាណជិត២លាន៣សែនដុល្លារសហរដ្ឋអាមេរិក ដែលបានមកពីកម្លាំងមហាសាមគ្គី របស់ព្រះសង្ឃនិងពុទ្ធបរិស័ទចំណុះជើងវត្ត ព្រមទាំងសប្បុរសជននានា ទាំងក្រៅនិងក្នុងប្រទេស។
ក្នុងឱកាសនោះដែរ លោកឃួង ស្រេង ក៏បានជំរុញនិងស្នើសុំឲ្យបងប្អូន ប្រជាពលរដ្ឋបន្តរួមគ្នា ជាមួយនឹងអាជ្ញាធរមូលដ្ឋានគ្រប់លំដាប់ថ្នាក់ ដើម្បីការពារសន្តិភាពស្ថិរភាពនយោបាយ សន្តិសុខនិងសណ្តាប់ធ្នាប់សាធារណៈ ដែលសម្ដេចតេជោនាយករដ្ឋមន្ត្រី បានខិតខំពុះពារជម្នះរាល់ការលំបាកខ្លាំងណាស់ ទម្រាំដណ្តើមបានសន្តិភាព និងការអភិវឌ្ឍរីកចម្រើនលើគ្រប់វិស័យ រហូតមកដល់សព្វថ្ងៃនេះ។
បន្ថែមពីលើនេះទៀត លោកអភិបាលរាជធានីភ្នំពេញ ក៏បានបញ្ជាក់ផងដែរថា ដោយសារ រដូវនេះជារដូវប្រាំង ដែលតាមការព្យាករណ៍ អាចមានការកើនឡើងនូវកំដៅខ្ពស់ ជាងបណ្ដាឆ្នាំកន្លងទៅ ហើយខណ្ឌដង្កោគឺជាខណ្ឌមួយស្ថិតនៅជាយរាជធានី មិនទាន់មានបណ្ដាញទឹកស្អាតគ្រប់គ្រាន់ ។ លោកស្នើឲ្យអាជ្ញាធរមូលដ្ឋានគ្រប់លំដាប់ថ្នាក់ និងបងប្អូនប្រជាពលរដ្ឋ ចូលរួមគ្នារក្សាទុកទឹកស្អាត និងប្រើប្រាស់ដោយការសន្សំសំចៃខ្ពស់ ។ ជាពិសេសត្រូវត្រៀមចូលរួមបង្ការទប់ស្កាត់ និងអន្តរាគមន៍ឲ្យបានទាន់ពេលវេលា ចំពោះគ្រោះមហន្តរាយគ្រោះរាំងស្ងួត និងគ្រោះអគ្គិភ័យជាយថាហេតុ៕ដោយ៖កូឡាប