ចៅក្រមម្នាក់ដែលល្បីធ្វើអត្តឃាតខ្លួនឯងនៅក្នុងបន្ទប់តុលាការ បន្ទាប់ពីរងសម្ពាធឲ្យផ្លាស់ប្តូរសាលក្រមពីថ្នាក់លើ ផ្ទុយពីឆន្ទៈភាពយុត្តិធម៌របស់គាត់ កាលពីអំឡុងខែតុលា ឆ្នាំ២០១៩ បានធ្វើអត្តឃាតសារជាថ្មី និងស្លាប់បានសម្រេចហើយ កាលពីព្រឹកមិញនេះ ។
លោក Kanakorn Pianchana ត្រូវបានដឹងថា បានបាញ់សម្លាប់ខ្លួនឯងជាលើកទី២នៅត្រង់បេះដូង ស្ថិតនៅផ្ទះរបស់គាត់ ក្នុងខេត្ត ឈៀងម៉ៃ នៅព្រឹកថ្ងៃទី០៧ ខែមីនា ឆ្នាំ២០២០ នេះ។
កាលពីខែតុលា ឆ្នាំមុន លោក Kanakorn Pianchana ដែលជាចៅក្រមនៅតុលាការខេត្ត Yala ភាគខាងត្បូងប្រទេសថៃ បានអះអាងជាសាធារណៈថា គាត់បានរងសម្ពាធពីមនុស្សមានឥទ្ធិពលក្នុងតុលាការ ដោយបង្ខំគាត់ឱ្យផ្លាស់ប្តូរសាលក្រមដែលមិនមានពិរុទ្ធភាពលើជនជាប់ចោទ ៥ នាក់ ដោយកាត់ទោសពួកគេ ៣ នាក់ ឲ្យស្លាប់ ហើយបញ្ជូន២នាក់ទៀតទៅពន្ធនាគារ ទោះបីគ្មានភ័ស្តុតាងគ្រប់គ្រាន់ដើម្បីផ្តន្ទាទោសនរណាម្នាក់ក៏ដោយ។
លោក Kanakorn បានថ្កោលទោសចំពោះការប្រព្រឹត្តមិនសមរម្យរបស់ចៅក្រមនៅក្នុងតុលាការ ដូចជាតម្រូវឱ្យធ្វើការបន្ទាប់ពីម៉ោងធ្វើការ ដើម្បីសរសេរសាលក្រមដោយមិនមានប្រាក់ឈ្នួលលើសម៉ោង និងត្រូវបានហាមឃាត់មិនឱ្យធ្វើការនៅក្នុងការងារទីពីរ ដើម្បីរកប្រាក់ចំណូលបន្ថែម។ លោកបានជំរុញឱ្យសមាជិកសភាធ្វើវិសោធនកម្មធម្មនុញ្ញតុលាការ ដើម្បីរារាំងចៅក្រមជាន់ខ្ពស់ពីការតាមដានសាលក្រមរបស់ចៅក្រមនៅតុលាការជាន់ទាប មុនពេលត្រូវបានបញ្ជូន។
សូមបញ្ជាក់ថា នៅថ្ងៃសុក្រ ទី០៤ ខែតុលា គាត់បានបាញ់សម្លាប់ខ្លួនឯងចំដើមទ្រូងនៅក្នុងបន្ទប់សវនាការរបស់គាត់ផ្ទាល់។ គាត់ត្រូវបានគេបញ្ជូនទៅមន្ទីរពេទ្យភ្លាមៗ ហើយជីវិតរបស់គាត់ត្រូវបានសង្គ្រោះ។
ប៉ុន្តែ នៅព្រឹកនេះ គាត់បានបាញ់សម្លាប់ខ្លួនជាលើកទី២ និងបំពេញតាមបំណងរបស់គាត់ហើយ ៕
ប្រែសម្រួលដោយ៖ លឹម ហុង (ប្រភព៖ coconuts, thethaiger)
