ភ្នំពេញ៖ ស្នងការនគរបាលរាជធានីភ្នំពេញ បានឲ្យដឹងថា “នេះជាព័ត៌មានមិនពិត ។ សមត្ថកិច្ចនឹងចាត់វិធានការចំពោះជនទាំងឡាយណា ដែលផុស និងចែកចាយ ព័ត៌មានមិនពិត” ។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល នៅថ្ងៃទី៨ ខែមីនា ឆ្នាំ២០២០នេះ បានចេញមកទាត់ចោល និងថ្កោលទោសចំពោះសកម្មជន Facebook ដែលមាននិន្នាការប្រឆាំង ដែលបង្ហោះព័ត៌មានបំពុល បំណងធ្វើឲ្យមានភាពចលាចលសង្គម បានលើកឡើងថា ”គ្រប់មន្ទីរពេទ្យឲ្យតែសង្ស័យមានឆ្លង Covid-19 នឹងចាក់ថ្នាំសម្លាប់ចោល”។
លោកស្រី វណ្ណឌីន បានទាត់ចោលការលើកឡើង បែបល្ងង់ខ្លៅរបស់សកម្មជនប្រឆាំង និងស្នើឲ្យអាជ្ញាធរមានសមត្ថកិច្ច ស្វះស្វែងរកវិធីធ្វើយ៉ាងណាចាប់ខ្លួនជននោះ មកផ្តន្ទាទោសតាមច្បាប់ កុំឲ្យនៅតែបន្តបង្កើតព័ត៌មានបំពុល ធ្វើឲ្យសង្គមចលាចលបែបនេះទៀត។
លោកស្រី ឱ វណ្ណឌីន បានចាត់ទុកការបង្ហោះព័ត៌មានប្រឌិននេះថា “ជាពាក្យសំដីអសីលធម៌ និងប្រឌិតបំពុលសង្គមទាំងស្រុង។ សូមកុំជឿ និងសុំឲ្យអាជ្ញាធរពាក់ព័ន្ធ ចាត់ការតាមផ្លូវច្បាប់”។
ជាមួយគ្នានេះ លោកស្រី នៅតែអំពាវនាវយ៉ាងទទូច ដល់បងប្អូនប្រជាពលរដ្ឋ ពិសេសអ្នកលេង Facebook សូមកុំជឿទៅលើព័ត៌មានមិនផ្លូវការ ឬការបង្ហោះ Facebook ដែលគ្មានប្រភពច្បាស់ ហើយសូមមេត្តាជឿជាក់លើរាជរដ្ឋាភិបាល ក្រសួងសុខាភិបាល ប្រសិនមានអ្វីវិវត្តន៍ថ្មី ក្រសួងនឹងជម្រាបជូនភ្លាមៗ ដើម្បីឲ្យប្រជាពលរដ្ឋបានដឹង ងាយស្រួលបង្ការ។
សង្គមមួយដែលសម្បូរធនធានបែបនេះ ពិតជាចលាចលរករីកចម្រើនមិនឃើញទេ ប៉ុន្តែជាបុណ្យកុសលល្អ សង្គមយើងសម្បូរធនធានមនុស្សល្អៗច្រើនបំផុត ដែលកំពុងចូលរួមកសាងប្រទេសជាតិយើងឲ្យរីកចម្រើន ប៉ុន្តែសល់តែមេរោគប៉ុន្មានក្បាលណឹងទេ ដែលដេកមិនលក់ បក់មិនល្ហើយ មួយថ្ងៃៗគិតតែរឿងចង់ដណ្ដើមអំណាចៗៗៗៗៗៗ ភ្លេចខ្លួនជាខ្មែរ ដើរហែហមតាមបិសាច ។ កែខ្លួនទៅណាលោក ទាន់គេនៅហៅជាមនុស្ស។
នាយករដ្ឋានប្រយុទ្ធនឹងជំងឺឆ្លង នៅថ្ងៃទី៨មីនា បានឲ្យដឹងថា បើបងប្អូនសាធារណជន មានរោគសញ្ញាក្តៅខ្លួនឬមានរោគសញ្ញាផ្លូវដង្ហើម និងទើបធ្វើដំណើរពីប្រទេស ដែលមានឆ្លងជំងឺ COVID-19 ឬប៉ះពាល់ជាមួយអ្នកមានជំងឺ បង្កឡើងដោយមេរោគ COVID-19 ក្នុងអំឡុងពេល១៤ថ្ងៃ មុនចេញរោគសញ្ញា សូមអញ្ជើញទៅពិគ្រោះជំងឺ នៅមន្ទីរពេទ្យខ្មែរ-សូវៀតនៅភ្នំពេញ និងនៅគ្រប់មន្ទីរពេទ្យខេត្តនៅបណ្តាខេត្តទាំងអស់ នៅទូទាំងប្រទេស ។ ក្នុងករណីគ្រូពេទ្យពិនិត្យឃើញថា ចូលករណីសង្ស័យដែលតម្រូវឱ្យយកវត្ថុ ឬតម្រូវឱ្យសម្រាកពេទ្យ អ្នកជំងឺទាំងនេះនឹងមិនមានការបង់ថ្លៃធ្វើតេស្តរកមេរោគ COVID-19 នីងតម្លៃព្យាបាលទេ ដែលបញ្ជាក់ថាមានវិជ្ជមាន COVID-19 ។ ការអនុវត្តន៍នេះ នឹងធ្វើឡើងទាំងជនជាតិខ្មែរ និងជនជាតិបរទេសទាំងអស់ ៕ ដោយ៖កូឡាប
