ខេត្តព្រះសីហនុ៖ ប្រភពព័ត៌មានពីមន្ត្រីនគរបាល នៃស្នងការដ្ឋានខេត្តព្រះសីហនុ បានបង្ហើបឲ្យដឹងថា អធិការរងស្រុកព្រៃនប់ម្នាក់ ទទួលបន្ទុកផ្នែកគ្រឿងញៀន រួមនឹងបក្ខពួកចំនួន២នាក់ទៀត ជាមន្ត្រីនគរបាលអធិការដ្ឋានស្រុកព្រៃនប់ កំពុងត្រូវបានសង្ស័យជាប់ពាក់សំណុំរឿងជំរិតទារប្រាក់ចំនួន៦០០០ដុល្លារសហរដ្ឋអាមេរិក ជាថ្នូរនឹងការដោះលែងជនរងគ្រោះម្នាក់ ស្នើសុំមិនបញ្ចេញឈ្មោះមានមុខរបរជាអ្នកបើករថយន្តតាក់ស៊ី។
ប្រភពស្នើមិនបង្ហាញអត្តសញ្ញាណបានឲ្យដឹងបន្តថា ក្នុងចំណោមមន្ត្រីនគរបាលទាំង២នាក់ មានម្នាក់ ត្រូវជាកូន ប្រុស របស់ លោក ហួ យ៉ៃ អធិការនគរបាលស្រុកព្រៃនប់ និងម្នាក់ទៀតជានាយរងនគរបាលប៉ុស្តិ៍រដ្ឋបាលឃុំបឹងតាព្រហ្ម ស្រុកព្រៃនប់ ខេត្តព្រះសីហនុ។
ប្រភពដដែលបន្តថា កាលពីយប់ថ្ងៃទី៤ ខែ មីនា ឆ្នាំ ២០២០ ជនរងគ្រោះខាងលើត្រូវបាន លោកអធិការងទទួលបន្ទុកប្រឆាំងបទល្មើសគ្រឿងញៀននៃអធិកាដ្ឋាននគរបាលស្រុកព្រៃនប់ និងបក្ខពួកទាំង០២នាក់ចាប់ឃាត់ខ្លួន ដោយចោទថា ជនរងគ្រោះជាអ្នកប្រើប្រាស់ និងជួញដូរគ្រឿងញៀន..។
ប្រភពបន្តទៀតថា នៅពេលឃាត់ខ្លួនជនរងគ្រោះ លោកអធិការរងខាងលើ និងបក្ខពួកបានឆែកឆេរ និងធ្វើតេស្តិ៍ទឹកនោមជនរងគ្រោះ និងឆែករថយន្ត របស់ជនរងគ្រោះ ប៉ុន្តែរកមិនឃើញសារធាតុញៀន បន្ទាប់មកមន្ត្រីនគរបាលជាប់ចោទទាំង៣នាក់ ក៏បាននាំរថយន្តជនរងគ្រោះយកទៅរក្សាទុក និងតម្រូវឲ្យជនរងគ្រោះជាម្ចាស់រថយន្ត យកប្រាក់ចំនួន ៦០០០ដុល្លារអាមេរិក មកបង់ឲ្យបក្ខពួកខ្លួន ទើបដោះលែង និងឲ្យយករថយន្តទៅប្រកបរបរមុខរបរវិញ។
ប្រភពបញ្ជាក់ថា បន្ទាប់ពីលេចឮព័ត៌មានអាស្រូវខាងលើនេះភ្លាម លោក ជួន ណារិន្ទ ស្នងការនគរបាលខេត្តព្រះសីហនុ បានកោះហៅ លោកអធិការង និងបក្ខពួក ដែលជាប់សង្ស័យលើសំណុំរឿងខាងលើមកសាកសួរទៅតាមនីតិវិធីនៅការិយាល័យនគរបាលព្រហ្មទណ្ឌ នៃស្នងការដ្ឋាននគរបាលខេត្តព្រះសីហនុ ទាក់ទិនករណីពុករលួយជំរិតទារប្រាក់ចំនួន ៦០០០ដុល្លារអាមេរិក ពាក់ព័ន្ធបទល្មើសគ្រឿងញៀន..។
ទោះជាបែបនេះក្តី លោក ហួ យ៉ៃ អធិការនគរបាលស្រុកព្រៃនប់ មិនអាស្នើការបំភ្លឺបានទេតាមទូរស័ព្ទ ជុំវិញការចោទប្រកាន់ទៅលើមន្ត្រីក្រោមឱវាទ របស់ខ្លួន គឺលោកអធិការងទទួលការងារប្រឆាំងគ្រឿងញៀន និងមន្ត្រីនគរបាល២រូបទៀត ដែលនគរបាលម្នាក់ត្រូវជាកូនប្រុស របស់លោក បានទេនៅរសៀលថ្ងៃអាទិត្យ ទី៨ ខែមីនា ឆ្នាំ២០២០។
យ៉ាងនេះក្តី លោកស្នងការរង នៃស្នងការដ្ឋាននគរបាលខេង្តព្រះសីហនុម្នាក់ ស្នើមិនបញ្ចេញឈ្មោះ បានឲ្យដឹងថា ពេលនេះកម្លាំងនគរបាលជំនាញកំពុងតែធ្វើការសាកសួរមន្ត្រីនគរបាល នៃអធិការដ្ឋាននគរបាលស្រុកព្រៃនប់ ទៅតាមនីតិវិធីច្បាប់។
ចំណែក លោកអធិការរងនគរបាលស្រុកព្រៃនប់ និងបក្ខពួក២នាក់ទៀត ដែលជាប់ចោទ ក៏មិនទាន់អាចស្វែងរក ដើម្បីស្នើការបំភ្លឺ ជុំវិញការចោទប្រកាន់ខាងលើបានទេ នៅរសៀលថ្ងៃអាទិត្យ ទី៨ ខែមីនា ឆ្នាំ២០២០នេះ៕ ដោយ ៖ ដែនសីមា