ភ្នំពេញ៖ ថ្លែងក្រោយបញ្ចប់ទិវារត់ប្រណាំងស្ត្រី ថ្ងៃទី៨មីនា នៅសួនច្បារវត្តបទុមវតី រាជធនីភ្នំពេញ, លោក វ៉ាត់ ចំរើន រដ្ឋលេខាធិការ ក្រសួងទេសចរណ៍ និងជាអគ្គលេខាធិការ គណៈកម្មាធិការជាតិអូឡាំពិកកម្ពុជា (NOCC) មានប្រសាសន៍ថា «ទិវារត់ប្រណាំងស្ត្រី១០គីឡូម៉ែត្រ» បានប្រព្រឹត្តិទៅប្រកបដោយភាពជោគជ័យ ដោយមាន ការចូលរួមរបស់ស្ត្រីច្រើនជាងគេ។
លោក បញ្ជាក់ជូនថា ដោយការរៀបចំក្រោមការដឹកនាំរបស់លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានNOCC ជាលើកដំបូងនេះ យើងសង្កេតឃើញថា ការចូលរួមរបស់យុវជន យុវនារី សិស្សា នុសិស្ស ប្រជាពលរដ្ឋមានភាពសប្បាយរីករាយ ដោយទូរលេខចុងក្រោយនេះគឺអ្នកចូលរួមជាស្ត្រីមានច្រើនជាង៧០% នៅក្នុងទិវាអបអរទិវាសិទ្ធិនារីអន្តរជាតិ៨មីនានេះ។ អ្នកចូលរួមនានាទទួលបាននូវភាពរីករាយ ដោយទទួលបានមេដាយ និងវត្ថុអនុស្សាវរីយ៍ ដែលផ្តល់ជូនដោយគណៈកម្មការ ដើម្បីជាការចងចាំនូវកម្រងអនុស្សាវរីយ៍នៃទិវារត់ប្រណាំងប្រកបដោយអត្ថន័យនេះ។
លោក វ៉ាត់ ចំរើន បានឡើកឡើងបន្ថែមថា «អ្វីដែលយើងចាប់អារម្មណ៍ជាងគេ គឺស្ត្រីចូលរួមបានច្រើន ហើយ ការរៀបចំរបស់យើង ទាំងកន្លែងពិធីទីតាំងចេញដំណើរនិងដល់ទី ទាំងនៅតាមដងផ្លូវរត់នានា យើងបានរិតបណ្តឹង ក្នុងការថែរក្សាបរិស្ថាន អនាម័យបានល្អប្រសើរ។ ចំពោះគោលបំណងចម្បងៗនៃទិវានេះ រួមមាន៖ បំផុសស្ត្រីឲ្យចូលរួមក្នុង កីឡាឲ្យកាន់តែសម្បូរបែបដូចបុរសដែរ លើកកម្ពស់ឲ្យស្ត្រីស្វែងយល់បន្ថែមពីអត្ថប្រយោជន៍នៃកីឡា ដែលកីឡានេះហើយធ្វើឲ្យយើងទទួលបានសុខភាពល្អ ដែលជាបញ្ហាសំខានសម្រាប់មនុស្សគ្រប់រូប។ ជាមួយគ្នានោះទិវានេះក៏ផ្តោតសំខាន់លើការលើកកម្ពស់បរិស្ថានផងដែរ»។
លោក អះអាងថា នៅក្នុងពេលដែលជំងឺផ្លូវដង្ហើម COVID-19 កំពុងរីករាលដាលនៅលើពិភពលោក ប៉ុន្តែមិន បានធ្វើឲ្យប៉ះពាល់ដល់ទិវារត់ប្រណាំងនេះទេ ដោយមនុស្សម្នាចូលរួមរត់ប្រកបដោយភាពរីករាយ មិនមានការភ័យខ្លាច ចំពោះជំងឺផ្លូវដង្ហើមថ្មីនេះទេ។ លោក ស្នើសុំឲ្យប្រជាពលរដ្ឋទាំងអស់ប្រកាន់ជំហររឹងមាំ ស្របតាមការប្រកាសរបស់ ប្រមុខរាជរដ្ឋាភិបាលកម្ពុជា និងក្រសួងសុខាភិបាលថាកុំឲ្យកើតមាននូវជំងឺភ័យខ្លាច ខ្លាំងជាងជំងឺ COVID-19 ដោយកុំផ្តោតលើបញ្ហាភ័យខ្លាចជ្រុលពេក។ លោក អំពាវនាវឲ្យប្រជាពលរដ្ឋទូទាំងប្រទេសហាត់ប្រាណ លេងកីឡាឲ្យបានគ្រប់ៗគ្នា ដើម្បីធ្វើឲ្យទទួលបានសុខភាពរាងកាយល្អ ជៀសផុតពីជំងៗផ្សេងៗ៕ដោយ៖បញ្ញាស័ក្តិ
