ពិតណាស់ កាលពីពុំទាន់ផ្ទុះករណីវីរុសថ្មី Covid-19 នោះតម្លៃម៉ាសធម្មតា ត្រូវបានដឹងថាអាចចន្លោះ១តម្លៃ ៣០០ រៀល ឬ ពីរតម្លៃ ៥០០ រៀល ប៉ុណ្ណោះ ។ ប៉ុន្តែ នៅពេលវីរុសនេះកំពុងរីករាលទៅកាន់ប្រទេសនានានៅលើពិភពលោក ក្នុងនោះមានកម្ពុជាយើងផងដែរ គេសង្កេតឃើញថា កន្លែងលក់ម៉ាសមួយចំនួនបានឆ្លៀតឱកាសលក់តំឡើងថ្លៃដ៏ហួសហេតុ ខណៈតម្រូវការម៉ាសកំពុងត្រូវការខ្ពស់ ។
ជាក់ស្តែង ថ្មីៗនេះ តាមរយៈគណនីហ្វេសប៊ុកឈ្មោះ «ម៉េងហេង សេម» បានបង្ហោះឲ្យបងប្អូនបានដឹងថា កន្លែងលក់ម៉ាសមួយនៅម្តុំរង្វង់មូលចោមចៅ បានដាក់ស្លាកតម្លៃច្បាស់ៗ ដោយម៉ាស១លក់ក្នុងតម្លៃរហូតដល់ ៤,០០០ ៛ (បួនពាន់រៀល) ឯណោះ ។
ក្រោយពីឃើញបែបនេះ អ្នកលេងបណ្តាញសង្គមបានលាន់មាត់ហួសចិត្តថា លក់ធ្វើសេដ្ឋីហើយមើលទៅ, ម៉ែអាថ្លែនអើយ ការពារបានអ្វីខ្លះបានជាថ្លៃជាងអង្ករសុីបាយទៅទៀត, នេះជាសញ្ញាល្អសម្រាប់វិនិយោគដែលអាចរកប្រាក់ពាន់លានរៀលបាន…បើតម្រូវការម៉ាស់កើនឡើង នោះតម្លៃក៏បន្តកើនឡើងដូចគ្នា ។ រីឯអ្នកខ្លះទៀត ស្នើសុំឱ្យសមត្ថកិច្ចសេដ្ឋកិច្ចចុះអន្តរាគន៍ផង ។
សូមបញ្ជាក់ថា ថ្លែងនៅក្នុងសន្និសីទសារព័ត៌មាននៅថ្ងៃទី៧ ខែមីនា ឆ្នាំ២០២០ ឯកឧត្ដម ម៉ម ប៊ុនហេង រដ្ឋមន្ត្រីក្រសួងសុខាភិបាលបញ្ជាក់ថា ក្នុងករណីអ្នកលក់ម៉ាស់លក់ថ្លៃហួសហេតុក្រសួងនឹងសហការណ៍ជាមួយសមត្ថកិច្ចសេដ្ឋកិច្ចដើម្បីចុះអន្តរាគមន៍ ។ ចំណែកឯអ្នកដែលជួបប្រទះអ្នកលក់ម៉ាស់ដែលមានតម្លៃថ្លៃខ្លាំង សូមប្ដឹងទៅកាន់សមត្ថកិច្ចសេដ្ឋកិច្ចដើម្បីចុះអន្តរាគមន៍ ៕ ដោយ៖ លឹម ហុង