ពោធិ៍សាត់៖ សម្តេចតេជោ នាយករដ្ឋមន្ត្រី បានអំពាវនាវឲ្យប្រជាពលរដ្ឋទាំងអស់ត្រូវមានជំនឿជឿជាក់លើខ្លួនឯង មិនត្រូវមានការភ័យខ្លាចហួសហេតុនោះទេ ទាក់ទងនឹងជំងឺកូរ៉ូណាដែលកំពុងកើតមានក្នុងប្រទេស។
នៅព្រឹកថ្ងៃចន្ទ ទី៩ ខែមីនា ឆ្នាំ ២០២០ នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង លោក វ៉ាង វិនធៀន ឯកអគ្គរដ្ឋទូតចិនប្រចាំកម្ពុជា បានអញ្ជើញសម្ពោធដាក់ឱ្យប្រើប្រាស់ផ្លូវជាតិលេខ៥៥ តភ្ជាប់ពីផ្លូវជាតិលេខ៥ ក្នុងទីរួមខេត្តពោធិ៍សាត់ ឆ្ពោះទៅកាន់ព្រំដែនថ្មដា ជាប់ជាមួយខេត្តត្រាត ប្រទេសថៃ និងបើកការដ្ឋានសាងសង់ផ្លូវជាតិលេខ១០ តភ្ជាប់ពីសំឡូត ទៅខេត្តកោះកុង។
សម្តេចនាយករដ្ឋមន្ត្រី ហ៊ុន សែន ជំរុញដល់ពលរដ្ឋទុកចិត្តលើរដ្ឋាភិបាលខ្លួនឯង កុំភ័យខ្លាចតាមការបំភ័យដោយព័ត៌មានមិនពិត ។ សម្តេចបានស្នើដល់អ្នកលក់កុំឱ្យដំឡើងថ្លៃទំនិញនៅលើទីផ្សារផងដែរ។
នៅព្រឹកនេះ សម្តេច ហ៊ុន សែន បានថ្លែងថា នៅពេលដែលរដ្ឋបង្ហាញនូវតម្លាភាព នៃព័ត៌មានទាក់ទងនឹងជំងឺកូរ៉ូណាក្នុងប្រទេស បែរជាធ្វើឱ្យពលរដ្ឋមានការជ្រួលជ្រើម ភ័យខ្លាចនាំគ្នាទៅទិញស្បៀងទុកនៅផ្ទះរៀងខ្លួន ដែលសម្តេចតេជោថា ជាជំងឺភ័យខ្លាចហួសហេតុ។
សម្តេចតេជោ បានថ្លែងថា៖ “ឥឡូវដល់និយាយមិនស្ដាប់ មានតែរុញទូកបណ្ដោយទឹកបណ្ដោយទៅ វាធូរផ្លូវដែរ។ និយាយចឹងហ្មងទៅ វាស្រួលស្ដាប់។ កាន់តែសំណូមពរ កុំឱ្យភ័យ កាន់តែភ័យខ្លាច។ ឥឡូវខ្ញុំគោរពសិទ្ធិអ្នកភ័យ ទិញអីទិញទៅ តែកុំឱ្យអ្នកលក់តម្លៃថ្លៃបានហើយ។ សម្តេចបានជំរុញដល់ពលរដ្ឋឱ្យទុកចិត្តលើរដ្ឋាភិបាល ដោយថា បើសិនជាមានជំងឺមែន ប្រទេសវៀតណាម និងថៃ ឬក៏សឹង្ហបុរី ក៏មិនទទួលយកទៅព្យាបាលដែរ។
សម្តេចនាយករដ្ឋមន្រ្តី បានលើកឡើងថា៖ “បើយើងភ័យខ្លាច យើងរត់ទៅរកវៀតណាម តើគេឱ្យយើងទៅទេ? ត្រូវមានជំនឿទុកចិត្តលើខ្លួនឯង ប្រាប់ថា អញអត់ឈឺ អាណាចង់ផុសបំផុសអី ឱ្យវាបំផុសទៅ។ តែបើមានការសង្ស័យ ត្រូវរត់រកពេទ្យ ដើម្បីសង្គ្រោះខ្លួនឯង”។
សម្តេច ហ៊ុន សែន ថា នឹងទៅខេត្តសៀមរាប ដើម្បីបំបាត់អារម្មណ៍ភ័យខ្លាចនេះ។
នៅថ្ងៃនេះ សម្តេចតេជោ បានជំរុញឲ្យប្រជាពលរដ្ឋកម្ពុជាយើងប្រើប្រាស់ក្រមាជំនួស ដែលអាចប្រើការពារជំនួយម៉ាស់ក៏បាន ក្នុងការបង្ការការពារជំងឺកូវីដ១៩។ សម្តេចបានមានប្រសាសន៍បញ្ជាក់ថា ពេលនេះ សម្តេចបានប្រើសេនាឌីយោទី២ គឺពេលដឹងថាមានពលរដ្ឋខ្មែរយើងកើតជំងឺកូវីដ១៩ភ្លាម សម្តេចបានប្រកាសឲ្យបិទជាបណ្តោះអាសន្នជាង១០សាលា នៅទីរួមខេត្តសៀមរាប និងបានលុបចោលអង្គរសង្ក្រាន្តផងដែរ។ សម្តេចតេជោ សូមឲ្យប្រជាពលរដ្ឋត្រូវតែមានការប្រុងប្រយ័ត្នការពារខ្លួន ជាពិសេសកុមារតូចៗ ដែលពិបាកក្នុងការការពារខ្លួន។ សម្តេចតេជោនាយករដ្ឋមន្ត្រី សុំឲ្យអាជីវករទាំងឡាយសូមកុំដំឡើងថ្លៃលក់ទំនិញនានានៅលើទីផ្សារ។ សម្តេចតេជោ បានអំពាវនាវឲ្យប្រជាពលរដ្ឋទាំងអស់ ត្រូវមានជំនឿជឿជាក់លើខ្លួនឯង មិនត្រូវមានការភ័យខ្លាចហួសហេតុនោះទេ។
សម្តេចតេជោ ក៏បានថ្លែងអំណរគុណដល់បងប្អូន ប្រជាពលរដ្ឋខេត្តពោធិ៍សាត់ទាំងអស់ ដែលកន្លងមកតែងតែគោរពស្រឡាញ់សម្តេច និងតែងតែបោះឆ្នោតជូនគណបក្សប្រជាជនកម្ពុជា ជាបន្តបន្ទាប់។ សម្តេចតេជោនាយករដ្ឋន្ត្រី បានមានប្រសាសន៍រំលឹកពីតំបន់នេះ ដែលពីអតីតកាលគឺជាសមរភូមិក្តៅមួយ ជាតំបន់ដែលមានត្រួតត្រាច្រើន។ សម្តេចតេជោបន្តថា ពីមុនផ្លូវនេះជាផ្លូវជាតិលេខ៥៦ ដែលពេលនេះប្តូរមកជាផ្លូវជាតិលេខ៥៥វិញ។ សម្តេចតេជោនាយករដ្ឋមន្ត្រី បានមានប្រសាសន៍ថា នៅពេលខាងមុខនេះ រាជរដ្ឋាភិបាលកម្ពុជា នឹងខិតខំបើកច្រកព្រំដែនកម្ពុជា-ថៃ (ច្រកថ្មដា) ដើម្បីភ្ជាប់ខេត្តពោធិ៍សាត់ជាមួយនឹងខេត្តត្រាតនៃប្រទេសថៃ ក្នុងការនាំទំនិញចេញចូលរវាងប្រទេសទាំងពីរ និងដើម្បីជីវភាពនៃប្រជាពលរដ្ឋ នៃប្រទេសទាំងពីរផងដែរ។
សម្តេចតេជោបានមានប្រសាសន៍ថា ក្រោយពីការដាក់ចេញនូវនយោបាយ ឈ្នះ ឈ្នះ ហើយ ក្នុងការអភិវឌ្ឍប្រទេសសម្តេចតេជោ បានដាក់ចេញនូវគោលដៅ ២សំខាន់ ដែលគោលដៅទី១ គឺការប្រែក្លាយតំបន់សមរភូមិក្តៅទាំងអស់ ឲ្យក្លាយទៅជាតំបន់ដែលមានសុខសន្តិភាព និងការអភិវឌ្ឍ និងគោលដៅទី២ គឺការប្រែក្លាយតំបន់ព្រំដែនទាំងអស់ ឲ្យទៅជាព្រំដែនដែលមានសុខសន្តិភាព តំបន់ទីផ្សារ និងកិច្ចសហប្រតិបត្តិការល្អ ជាមួយប្រទេសជិតខាង។
ចំពោះផ្លូវជាតិលេខ១០ ដែលត្រូវបើកការដ្ឋាននាពេលនេះ សម្តេចតេជោ ហ៊ុន សែន បានបង្ហាញនូវក្តីមោទនភាពចំពោះសមិទ្ធផលថ្មីបន្ថែមទៀត ដោយសម្តេចតេជោបានសង្កត់ធ្ងន់ថា ក្រោយពីបានផ្លូវនេះមួយទៀត បងប្អូនប្រជាពលរដ្ឋនៅវាលវែងនេះ រស់នៅកាន់តែមានភាពងាយស្រួល ហើយសម្តេចតេជោបានហៅតំបន់នេះថា សំណាងថ្មដា វាសនាវាលវែង ហើយសម្តេចនឹងតែងបទចម្រៀងមួយបទ ដែលដាក់ថា សំណាងថ្មដា វាសនាវាលវែង ទៀតផងនាពេលខាងមុខ។ សម្តេចតេជោបន្តថា នៅទីនេះ ថ្ងៃអនាគតនឹងមានការបង្កើនរោងចក្រនៅទីនេះផងដែរ។ សម្តេចតេជោបានមានប្រសាសន៍ថា ផ្លូវជាតិលេខទាំងពីរខ្សែនេះ នឹងដើរតួនាទីយ៉ាងសំខាន់ និងជាផ្លូវយុទ្ធសាស្រ្តមួយ សម្រាប់បម្រើឱ្យការអភិវឌ្ឍសេដ្ឋកិច្ចផង ការពារអធិបតេយ្យភាពជាតិផង និងជួយទ្រទ្រង់យ៉ាងរឹងមាំនូវកិច្ចសហប្រតិបត្តិការល្អ រវាងប្រទេសកម្ពុជា និងប្រទេសថៃ និងជាច្រករបៀងសេដ្ឋកិច្ចដ៏សំខាន់ផងដែរ។
នៅថ្ងៃនេះ សម្តេចតេជោបានជូននូវដំណឹងល្អសម្រាប់កម្មករកម្មការិនី ដោយក្នុងនោះមិត្តចិនបានផ្តល់នាវាចំនួន៧គ្រឿង ដឹកវត្ថុធាតុដើមមកមកប្រើប្រាស់ ក្នុងរោងចក្រនៅកម្ពុជាចាប់ពីខែមីនានេះ រហូតដល់ខែឧសភា ឆ្នាំ២០២០។ ទន្ទឹមនឹងនេះ នៅថ្ងៃនេះផងដែរ សម្តេចតេជោបានអំពាវនាវ៤ចំណុចសំខាន់៖ ១)សូមរោងចក្រនានាមេត្តាកុំលុបចោលកិច្ចសន្យាការងារ ជាមួយកម្មករ កម្មការិនី។ ២)ចំពោះមីក្រូហិញ្ញវត្ថុទាំងអស់ ត្រូវពន្យារការសង ឬការមិនយកការប្រាក់ដល់កម្មករ កម្មការិនីដែលបានជំពាក់លុយនៅមីក្រូហិរញ្ញវត្ថុនោះ។ ៣)សុំឲ្យម្ចាស់បុរីលំនៅដ្ឋានទាំងអស់ ដែលរំលស់ផ្ទះជាមួយបងប្អូនកម្មករ ត្រូវពន្យារការបង់ និងកុំផ្តាច់កុងត្រានោះអី។ ៤)សូមឲ្យអគ្គិសនីកម្ពុជា អនុញ្ញាតឲ្យកម្មករកម្មការិនីជំពាក់ថ្លៃភ្លើងសិនក្នុងអំឡុងពេលនេះ៕ដោយ៖កូឡាប