កំពង់ស្ពឺ៖ ជនសង្ស័យម្នាក់ពាក់ព័ន្ធ ពីបទល្មើសឃាតកម្ម ប្រើកាំបិតចុងស្រួច ចាប់ទៅលើកុមារអាយុ១០ឆ្នាំម្នាក់ កំពុងគេងលក់ បណ្តាលឲ្យស្លាប់ ត្រូវបញ្ជូនទៅតុលាការដំបូងខេត្តកំពង់ស្ពឺ ដើម្បីផ្តន្ទាទោសពីបទល្មើសឃាតកម្ម នៅថ្ងៃទី៩មីនា២០២០។
អង្គការ Child Protection Unit នៅថ្ងៃទី៩ខែមីនានេះ បានផ្សាយព័ត៌មានលើផេកហ្វេសប៊ុកផ្លូវការថា នៅវេលាម៉ោង១០ និង៣០នាទីល្ងាច ថ្ងៃទី៨ ខែមីនា, ក្មេងប្រុសអាយុ១០ឆ្នាំ ដែលកំពុងគេងនៅក្រោមផ្ទះនៅភូមិត្រពាំងជ្រៃ ឃុំព្រៃវិហារ ស្រុកគងពិសី ត្រូវបានជនសង្ស័យប្រហារ ទៅលើដោយប្រើកាំបិតត្នោត។ ជនរងគ្រោះរងរបួស ដែលគ្រោះថ្នាក់ដល់ជីវិតនៅលើ.ក ហើយត្រូវបានបញ្ជូន ទៅមន្ទីរពេទ្យ ប៉ុន្តែបានបាត់បង់ជីវិត ព្រោះតែរបួស។
ជនសង្ស័យដែលនៅក្នុងឥទ្ធិពលគ្រឿងញៀនត្រូវបានកម្លាំងសមត្ថកិច្ចឃាត់ខ្លួន និងបញ្ជូនទៅអធិការដ្ឋានស្រុក។ អង្គភាពការពារកុមារបានទទួលដំណឹង ហើយបានបញ្ជូនក្រុមការងារស៊ើបអង្កេតបទល្មើសមនុស្សឃាត និងក្រុមការងារបច្ចេកទេសវិទ្យាសាស្ត្រទៅជួយដល់មន្ត្រីនគរបាលជាតិកម្ពុជាក្នុងការធ្វើការស៊ើបអង្កេតនៅកន្លែងកើតហេតុ និងពិនិត្យសាកសព។ អាវុធ និងសម្លៀកបំពាក់របស់ជនសង្ស័យត្រូវបានដកយកដើម្បីធ្វើការត្រួតពិនិត្យ។
បុរសអាយុ២១ឆ្នាំនឹងត្រូវបញ្ជូនទៅតុលាការដំបូងខេត្តកំពង់ស្ពឺដើម្បីផ្តន្ទាទោសពីបទល្មើសឃាតកម្ម៕ដោយ៖កូឡាប