ភ្នំពេញ៖ ក្រសួងសេដ្ឋកិច្ចបានចេញសេចក្តីអំពាវនាវចំពោះម្ចាស់អាជីវកម្មអភិវឌ្ឍអចលនវត្ថុ ដើម្បីជួយដល់កម្មករនិយោជិតទទួលរងនូវការព្យូរការងាររយៈពេលខ្លីឬអត់បង់ការងារដែលរងផលប៉ះពាល់ពីការរីករាលដាលនៃជំងឺផ្លូវដង្ហើមកូរ៉ូណា។
ក្រសួងសេដ្ឋកិច្ច និងហិរញ្ញវត្ថុ នាថ្ងៃទី៩ ខែមីនា ឆ្នាំ២០២០នេះ បានចេញសេចក្ដីអំពាវនាវដល់ម្ចាស់ក្រុមហ៊ុនអចលនទ្រព្យទាំងឡាយ នូវសំណើមួយចំនួនពាក់ព័ន្ធនឹងការបន្ធូរបន្ថយថ្លៃ ឬបញ្ចុះថ្លៃសមស្របណាមួយសម្រាប់ការលក់លំនៅឋានជូនកម្មករ និយោជិត ដែលរងផលប៉ះពាល់ដោយសារការព្យួរការងារ។
ដើម្បីលើកកម្ពស់ស្មារតីចូលរួមជាមួយរាជរដ្ឋាភិបាលកម្ពុជាក្នុងការអនុវត្តវិធានការបន្ទាន់នានាសំដៅកាត់បន្ថយផលប៉ះពាល់អវិជ្ជមានពីការរីករាលដាលនៃជំងឺរលាកផ្លូវដង្ហើមធ្ងន់ធ្ងរកូវីដ 19 មកលើសង្គមនិងសេដ្ឋកិច្ចកម្ពុជា ពិសេសដើម្បីជួយដល់កម្មករនិយោជិតដែលទទួលរងនូវការព្យួរការងាររយៈពេលខ្លី ឬបាត់បង់ការងារហើយមានការលំបាកក្នុងការបង់រំលស់ថ្លៃផ្ទះជាមួយបណ្ដាក្រុមហ៊ុនអភិវឌ្ឍអចលនវត្ថ ក្រសួងសេដ្ឋកិច្ច សូមអំពាវនាវដល់ ក្រុមហ៊ុនអភិវឌ្ឍអចលនវត្ថុ ពិនិត្យលទ្ធភាពគឺ ផ្ដល់ភាពទន់ភ្លន់អំពីលក្ខខណ្ឌនៃការបង់ប្រាក់ចំពោះការទិញលំនៅឋានរបស់កម្មករ និយោជិតណា ដែលទទួលរងផលប៉ះពាល់ដូចបានគូសបញ្ជាក់ខាងលើ។ បញ្ចុះថ្លៃផ្ទះក្នុងកម្រិតសមស្របណាមួយ ខណៈដែលរាជរដ្ឋាភិបាលបានសម្រេចផ្ដល់ការលើកលែងពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ (លំនៅឋានគ្រប់ប្រភេទ) ដែលមានតម្លៃស្មើ ឬទាបជាង ៧០.០០០ដុល្លារ ក្នុងរយៈពេល១ឆ្នាំ។
ដើម្បីសម្រួលការអនុវត្តសេចក្តី អំពាវនាវខាងលើ ក្រសួងសេដ្ឋកិច្ចនិងហិរញ្ញវត្ថុដោយរួមសហការជាមួយក្រសួងស្ថាប័នពាក់ព័ន្ធជាអាទិ៍ ក្រសួងទេសចរណ៍ក្រសួងការងារនិងបណ្ដុះបណ្ដាលវិជ្ជាជីវៈត្រៀមខ្លួនជាស្រេច សម្របសម្រួលជាមួយម្ចាស់ក្រុមហ៊ុនអភិវឌ្ឍអចលនវត្ថុតាមការចាំបាច់៕ ដោយ៖កូឡាប
