ប្រទេសអ៊ីស្រាអ៊ែលបានតម្រូវឲ្យមនុស្សទាំងអស់ដែលបានធ្វើដំណើរពីក្រៅប្រទេសចូលក្នុងទឹកដីរបស់ខ្លួនស្ថិតនៅដាច់ដោយឡែករយៈពេល ១៤ ថ្ងៃសិន ដែលនេះជាវិធានការដើម្បីការពារការរីករាតដាលនៃវីរុសកូរ៉ូណា។
នេះបើតាមការបញ្ជាក់របស់នាយករដ្ឋមន្រ្តី Benjamin Netanyahu កាលពីថ្ងៃចន្ទម្សិលមិញនេះ។
អ៊ីស្រាអ៊ែលបានចាត់វិធានយ៉ាងតឹងរឹងរួចហើយ ដើម្បីការពារការផ្ទុះវីរុសកូរ៉ូណានៅក្នុងតំបន់ ដោយបានបង្ខំអ្នកដំណើរទាំងអស់ដែលមកពីតំបន់អាស៊ី និងអ៊ីរ៉ុប ស្ថិតនៅដោយឡែកក្នុងផ្ទះ។
លោកបានថ្លែងថា “អ្នកទាំងឡាយណាដែលធ្វើដំណើរពីក្រៅប្រទេសមកអ៊ីស្រាអ៊ែល នឹងត្រូវស្ថិតនៅដោយឡែករយៈពេល ១៤ថ្ងៃ”។
“នេះគឺជាការសម្រេចចិត្តដ៏លំបាក ប៉ុន្តែវាមានសារសំខាន់ក្នុងការការពារសុខភាពសាធារណៈ ហើយសុខភាពសាធារណៈជាអទិភាព”។
មន្រ្តីរដ្ឋាភិបាល បាននិយាយថា វិធានការនោះនឹងត្រូវចូលជាធរមានភ្លាមៗចំពោះប្រជាជនអ៊ីស្រាអ៊ែលទាំងអស់ដែលបានត្រឡប់ចូលប្រទេសវិញ។
បើតាមប្រព័ន្ធផ្សព្វផ្សាយអ៊ីស្រាអ៊ែលបានផ្សាយថា វិធានការក្នុងការដាក់ម នុស្សអោយនៅដោយឡែក នឹងធ្វើចំពោះប្រជាជនចំនួន ៣០០.០០០នាក់ ក្នុងចំណោមប្រជាជន ៩ លាននាក់។
សូមបញ្ជាក់ថា រហូតមកដល់ពេលនេះ ប្រទេសនេះមានការឆ្លងវីរុសកូរ៉ូណា ចំនួន ៤២ ករណី៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia