រដ្ឋមន្រ្តីក្រសួងវប្បធម៌បារាំង លោក Franck Riester បានក្លាយជាអ្នកនយោបាយចុងក្រោយបំផុតដែលបានឆ្លងវីរុសកូរ៉ូណា ក្រោយពេលសមាជិកសភាបារាំងជាច្រើននាក់បានឆ្លងវីរុសនោះ។
នេះបើតាមការបញ្ជាក់របស់មន្រ្តីរដ្ឋាភិបាលបារាំងនៅថ្ងៃចន្ទម្សិលមិញនេះ។
រដ្ឋមន្រ្តីសុខាភិបាល លោក Olivier Veran និយាយតាមកញ្ចក់ទូរទស្សន៍ថា លោក Franck Riester មានស្ថានភាពល្អ ហើយកំពុងសម្រាកនៅផ្ទះ។
បើតាមប្រព័ន្ធផ្សព្វផ្សាយ សមាជិកសភាបារាំងចំនួន ៥រូបបានឆ្លងវីរុសកូរ៉ូណា រួមទាំងកម្មករម្នាក់ដែលធ្វើការនៅតៀមលក់អាហារក្នុងរដ្ឋសភា កន្លែងដែលសមាជិកសភាទាំងអស់ ឬមួយចំនួនទៅយកអាហារមកខ្លួនឯង។
ប្រភពពីក្រសួងវប្បធម៌បានឲ្យដឹងថា រដ្ឋមន្រ្តីវប្បធម៌ប្រហែលជាឆ្លងវីរុសមកពីសមាជិកសភាម្នាក់ ក្នុងចំណោម ៥ នាក់។ លោករដ្ឋមន្រ្តី បានជួបប្រធានាធិបតីបារាំង Emmanuel Macron ចុងក្រោយបង្អស់កាលពី ៤ ទៅ ៥ ថ្ងៃកន្លងទៅ។
សូមបញ្ជាក់ថា បើតាមតួលេខរបស់ វេបសាយ Johns Hopkins CSSE ប្រទេសបារាំងមានអ្នកឆ្លងវីរុសកូរ៉ូណា ជាង ១.២០០ ករណី និងមានអ្នកស្លាប់ចំនួន ១៩ នាក់ ចំណែកអ្នកជាសះស្បើយមានចំនួន ១២ នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
