ស្ទឹងត្រែង: កម្លាំងការិយាល័យប្រឆាំងបទល្មើសសេដ្ឋកិច្ច ខេត្តស្ទឹងត្រែង ស្ទាក់ចាប់បានរថយន្ដសាំយ៉ុងមួយគ្រឿង ដឹកឈើបេង ជិត២ម៉ែត្រគូប នៅថ្ងៃទី ៩ខែមីនាឆ្នាំ ២០២០ ។
លោកវរសេនីយ៍ឯកវ៉ា សុផាន់ នាយការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តស្ទឹងត្រែង បានប្រាប់ថា រថយន្តដឹកឈើនេះ ដឹកចេញមកពី ឃុំស្រែគរថ្មី ឆ្លងកាត់ តាមផ្លូវក្រាលក្រួសក្រហម ឃុំភ្លុក ឃុំកំភុន ឃុំសាមឃួយ ស្រុកសេសាន ចូលមករកទីផ្សារក្នុងទីរួមខេត្តស្ទឹងត្រែង ហើយសមត្ថកិច្ចយើងស៊ើបដឹងទើប តាមក្រោយ មកស្ទាក់ចាប់បាន នៅទីប្រជុំជន ភូមិរាជានុគោល សង្កាត់ស្ទឹងត្រែង ក្រុងស្ទឹងត្រែង។ រថយន្តនិងឈើ បានប្រគល់ជូនទៅរដ្ឋបាលព្រៃឈើខេត្ត។ រថយន្តសាំយ៉ុង ពាក់ផ្លាកលេខ ភ្នំពេញ 2AC-94 14 បិទសញ្ញាពណ៌ផ្កាឈូកនៅខាងក្រោម ជាសញ្ញាសម្គាល់ របស់ឈ្មោះ វ៉ាន់ ណាន់ ជាប្រជាពលរដ្ឋ នៅឃុំខ្សាច់ថ្មី ។ ប៉ុន្តែក្នុងសកម្មភាពជាក់ស្តែង សមត្ថកិច្ចចាប់បានតែរថយន្តនិងឈើ តែប៉ុណ្ណោះ ឯម្ចាស់រត់បាត់។ ស្ទើរគ្រប់ករណីពុំដែលចាប់បានអ្នកបើករថយន្តនោះទេ។
មន្រ្ដីរដ្ឋាបាលព្រៃឈើ បានប្រាប់ថា វត្ថុតាង ប្រភេទឈើបេង មានចំនួន138ដុំ ស្មើ 1901 ម៉ែត្រគូប បានប្រគល់ជូន ជំនាញរដ្ឋបាលព្រៃឈើខេត្ត ដោយឡែក មធ្យោបាយបម្រើឲ្យបទល្មើស ជារថយន្តសាំយ៉ុង បានរក្សាទុក នៅស្នងការដ្ឋាននគរបាលខេត្ត ដើម្បីបន្តនីតិវិធី៕ ដោយ៖បញ្ញាស័ក្តិ
