សៀមរាប ៖ រដ្ឋបាលខេត្តសូមជូនដំណឹងដល់ក្រុមហ៊ុន សហគ្រាស ឱសថស្ថានគ្រប់ប្រភេទ ម្ចាស់ហាងទំនិញ និងសាធារណជនជ្រាបថា ដោយមានបញ្ហារីករាលដាលជំងឺរលាកសួតដោយវីរុស COVID-19 នៅបណ្តាប្រទេសនានា ក្នុងនោះក៏មានក្រុងសៀមរាបផងដែរ។
រដ្ឋបាលខេត្តសៀមរាប កាលពីថ្ងៃទី១០ខែមីនា បានចេញសេចក្តីជូនដំណឹងថា ក្នុងរយៈពេលមានវីរុស COVID-19 នេះកើតមានឡើងរដ្ឋបាលខេត្ត សង្កេតឃើញថាក្រុមហ៊ុន សហគ្រាស ឱសថស្ថានគ្រប់ប្រភេទ ម្ចាស់ហាងទំនិញមួយចំនួន ឆ្លៀតឱកាសដំឡើងថ្លៃទំនិញ គ្រឿងបរិភោគ និងសម្ភារៈប្រើប្រាស់ចាំបាច់មួយចំនួន។ ក្នុងន័យនេះ រដ្ឋបាលខេត្តសូមធ្វើការណែនាំ និងចាត់វិធានការចំនួន ៥ចំណុច រួមមានដូចក្នុងសេចក្តីជូនដំណឹងដូចខាងក្រោម ៖
សូមឱ្យបងប្អូនប្រជាពលរដ្ឋ និងសាធារណជន ត្រូវអនុវត្តតាមការណែនាំរបស់ក្រសួងសុខាភិបាល ឲ្យបានជាប្រចាំ។ សូមឲ្យប្រជាពលរដ្ឋនិងសាធារណជនត្រូវ រក្សាភាពនឹងនរ កុំមានការចលាចល ដែលនាំឲ្យជនឆ្លៀតឱកាសនិយម អាចយកចំណេញតាមរយៈការអនុវត្តដំឡើងថ្លៃទំនិញ និងសម្ភារៈផ្សេងៗដោយមិនសមហេតុសមផល។ ត្រូវបញ្ឈប់ការផ្សព្វផ្សាយព័ត៌មានមិនពិត តាមបណ្ដាញសង្គមនិងប្រព័ន្ធផ្សព្វផ្សាយនានា ដែលធ្វើឲ្យប៉ះពាល់ដល់សន្តិសុខ សណ្តាប់ធ្នាប់ និងរបៀបរៀបរយសាធារណៈ ហើយអាជ្ញាធរមានសមត្ថកិច្ច នឹងចាត់វិធានការតាមផ្លូវច្បាប់ ចំពោះអ្នកផ្សព្វផ្សាយព័ត៌មានមិនពិត។ សូមម្ចាស់ក្រុមហ៊ុន សហគ្រាស ឱសថស្ថាន គ្រប់ប្រភេទ ហាងទំនិញទូទៅ ត្រូវប្រកាន់នូវស្មារតីសាមគ្គីជាតិខ្មែរ កុំឆ្លៀតឱកាសលក់ដំឡើងថ្លៃទំនិញ ម៉ាស អាកុល និងសម្ភារៈផ្សេងៗ ស្រេចតែអំពើចិត្ត ក្នុងករណីរកឃើញភាពមិនប្រក្រតី អាជ្ញាធរមានសមត្ថកិច្ច នឹងចាត់វិធានការតាមផ្លូវច្បាប់ជាធរមាន។ សូមបងប្អូនប្រជាពលរដ្ឋ និងសាធារណជនទាំងអស់ ចូលរួមសហការ និងផ្ដល់ព័ត៌មានអំពីភាពមិនប្រក្រតីនានា ដែលបានកើតឡើងជាក់ស្ដែង ជូនរដ្ឋបាលខេត្តសៀមរាប និងសមត្ថកិច្ចពាក់ព័ន្ធ ដើម្បីចាត់វិធានការតាមផ្លូវច្បាប់ និងទប់ស្កាត់បានទាន់ពេលវេលា៕ដោយ៖កូឡាប