ក្រុមហ៊ុនឱសថរបស់ចិនមួយ បានត្រូវពិន័យ ហើយបិទទ្វារ ខណៈពេលក្រុមហ៊ុន “ទុច្ចរិក” មួយនេះបានបន្លំដាក់ស្លាកលើរថយន្តដឹកកាកសំណល់ពុលថា ជារថយន្តដឹកទឹក… សម្អាតផ្លូវ។ លើសពីនេះអំពើលាមក សម្លាប់មនុស្សនេះ អូសបន្លាយបានដល់ទៅជិត…១ឆ្នាំឯណោះ។
តាមស្ថានីយ៍ទូរទស្សន៍ខេត្ត Jiangsu ក្រុមហ៊ុនផលិតឱសថ១ នៅភាគបូព៌ា ប្រទេសចិន មានយីហោថា Bairui Biomedical Technology បានរងការពិន័យចំពោះទង្វើបាញ់ទឹកសំណល់ឧស្សាហកម្ម ៣.០០០តោន លើផ្លូវក្នុងអំឡុងពេល១ឆ្នាំមកហើយ។ ដើម្បីបំបាំងភ្នែករបស់អាជ្ញាធរ និងពលរដ្ឋ គេបានលាបដោយសរសេរស្លាកបន្លំថា ជារថយន្តដឹកទឹកសម្អាតថ្នល់ក្នុងទីក្រុង។
រថយន្តដឹកទឹកកាកសំណល់គីមីត្រូវបាន “បន្លំ”ជារថយន្តដឹកទឹក…
តាមរយៈវិធីសាស្ត្រ “អសីលធម៌”នេះ វាបានចាក់ចោលកាកសំណល់ពុលរាប់ពាន់តោន ទម្រាំត្រូវបាន”វែកមុខ” នៅសប្តាហ៍មុន។ ប៉ូលិស និងស្ថាប័នគ្រប់គ្រងទីក្រុងបានក្របួចជាប់រថយន្តគួរឲ្យ “មន្ទិលសង្ស័យ”នេះ នៅពេលកណ្តាលយប់ ខណៈវាកំពុងបើកបរយឺតៗលើផ្លូវសម្រាប់ទោចក្រយានយន្ត ហើយបង្ហូរចេញនូវសារធាតុរាវ មានក្លិនឈួលច្រមុះ។
ក្រោយពេលយកសារធាតុនេះទៅធ្វើតេស្ត អាជ្ញាធរគ្រាន់តែប្រកាសថា វាលើសពីស្តង់ដា នៃទឹកសំណល់ ប៉ុន្តែពុំបញ្ជាក់ថា ជាសារធាតុគីមីធ្វីឡើយ។
ក្រុមហ៊ុនត្រូវបានដកហូតអាជ្ញាប័ណ្ណ បិទទ្វារ និងរងការពិន័យ ១២៤.០០០ដុល្លារ ចំពោះទង្វើចាក់ចោលកាកសំណល់ពុំមានការ “អនុញ្ញាត”នេះ។
អ្នកទទួលខុសត្រូវពាក់ព័ន្ធក៏ត្រូវបានប៉ូលិសចាប់ខ្លួនដើម្បីស៊ើបអង្កេត៕ ចន្ទ្រា
