ភ្នំពេញ៖ សម្តេចពិជ័យសេនាបានអះអាងថា នេះជាលើកទី៤ហើយ ដែលកម្ពុជា ធ្វើជាម្ចាស់ផ្ទះ នៃការហ្វឹកហ្វឺនគ្រូបង្គោលបច្ចេកទេស បោសសម្អាតមីនថ្នាក់អាស៊ាននិងតំបន់ សម្រាប់ប្រតិបត្តិការអង្គការសហប្រជាជាតិ។
សម្តេចពិជ័យសេនា ទៀ បាញ់ ឧបកនាយករដ្ឋមន្ត្រី រដ្ឋមន្ត្រីក្រសួងការពារជាតិ ថ្លែងដូច្នេះនៅក្នុងពិធីបើវគ្គហ្វឹកហ្វឺនគ្រូងបង្គោលអាស៊ាន នៅល្ងាចថ្ងៃទី១០ ខែមីនា ឆ្នាំ២០២០ នៅទីស្តីការគណៈរដ្ឋមន្ត្រី។ សម្តេចពិជ័យសេនា បញ្ជាក់ថា “ការហ្វឹកហ្វឺន នេះ ដើម្បីប្រមូលផ្តុំអ្នកជំនាញអន្តរជាតិនៅក្នុងវិស័យមីន ដើម្បីចែករំលែកបទពិសោធន៍ទៅវិញទៅមក បណ្តុះបណ្តាលនិងហ្វឹកហ្វឺនឲ្យក្លាយជាគ្រូបង្គោល ប្រកបដោយប្រសិទ្ធភាពពេលបញ្ចប់វគ្គសិក្សា និងសហការរួមគ្នាដោះស្រាយជាលក្ខណៈបច្ចេកទេសលើបញ្ហាគ្រឿងផ្ទុះ និងប្រឆាំងគ្រឿងកែច្នៃ”។
សម្តេច ទៀ បាញ់ មានប្រសាសន៍ថា រាជរដ្ឋាភិបាលកម្ពុជា ក្រសួងការពារជាតិ នៅតែចាត់ទុកថា ការងារហ្វឹកហ្វឺនវិស័យរក្សាសន្តិភាពនៅតែជាការងារអទិភាពដ៏សំខាន់បំផុត សម្រាប់លើកកម្ពស់សមត្ថភាពធនធានមនុស្ស ទៅបំពេញបេសកកម្មមនុស្សធម៌ ក្រោមឆ័ត្រអង្គការសហប្រជាជាតិ។ កងកម្លាំងរក្សាសន្តិភាពកម្ពុជា បានអនុវត្តយ៉ាងម៉ឹងម៉ាត់ ចំពោះការហ្វឹកហ្វឺនប្រកបដោយប្រសិទ្ធភាព ទើបសម្រេចបានជោគជ័យជាបន្តបន្ទាប់ ទទួលបានការកោតសរសើរលើឆាកអន្តរជាតិ និងចាត់ទុកថា កម្ពុជាជាប្រទេសមួយបានបញ្ជូនធនធានមនុស្ស ប្រកបដោយវិជ្ជាជីវៈ ដើម្បីបុព្វហេតុសន្តិភាព សន្តិសុខដល់បណ្តាប្រទេសក្នុងសកលលោក។
លោក នាយឧត្តមសេនីយ៍ សែម សុវណ្ណនី អនុប្រធានទី២ អាជ្ញាធរមីន និងជាអគ្គនាយកមជ្ឈមណ្ឌលជាតិរក្សាសន្តិភាព អោយដឹងដែរថា “វគ្គហ្វឹកហ្វឺននេះមានរយៈពេល១៩ថ្ងៃ ចាប់ផ្តើមពីថ្ងៃទី៩-២៧ ខែមីនា ឆ្នាំ២០២០ ដើម្បីផ្តល់ការគាំទ្រដល់ប្រតិបត្តិការសន្តិភាព អង្គការសហប្រជាជាតិនិងអនុវត្តតាមនិយាមអង្គការសហប្រជាជាតិ ប្រព័ន្ធគ្រប់គ្រងទិន្នន័យព័ត៌មានសកម្មភាពមីន យុទ្ធសាស្ត្រសកម្មភាពមីនថ្នាក់ជាតិ និងបទពិសោធន៍ជាក់ស្តែង ដែលបានមកពីអាជ្ញាធរមីន ក៏ដូចជាការដកស្រង់ផ្ទាល់ពីតំបន់បេសកកម្ម មកធ្វើសក្ខីកម្ម សម្រាប់អនុវត្តទាំងក្នុងនិងក្រៅប្រទេស។
លោកបញ្ជាក់ថា វគ្គហ្វឹកហ្វឺននេះ មានការចូលរួមពីសំណាក់យោធាចាជាតិ និងអន្តរជាតិ មានបារាំង ឥណ្ឌា និងកម្ពុជា។ ចំពោះសិក្ខាកាមមានមកពី ប្រទេសមីយ៉ាន់ម៉ា ម៉ាឡេស៊ី ឥណ្ឌូណេស៊ី នេប៉ាល់ និងហ្វីលីពី និងសិក្ខាកាមកម្ពុជា មានចំនួនសរុប២១នាក់។
លោកស្រី Pauline Tamesis អ្នកសម្របសម្រួលអង្គការសហប្រជាជាតិប្រចាំកម្ពុជា មានប្រសាសន៍ថា “បេសកកម្មរក្សាសន្តិភាព អង្គការសហប្រជាជាតិ គឺជាការវិនិយោគដ៏សំខាន់មួយក្នុងសន្តិសុខ និងសន្តិភាពសង្គម។ វគ្គនេះអាចសម្រេច បានទៅបាន ក៏អាស្រ័យលើភាពជាដៃគូដ៏រឹងមាំមួយ ដែលជាស្នូលនៃការបន្តកិច្ចសហប្រតិបត្តិការរវាងអង្គការសហប្រជាជាតិ និងអាស៊ាន”៕ ដោយ៖កូឡាប