សត្វកវែងញីពណ៌សដ៏កម្រ និងកូនរបស់វាមួយក្បាល ត្រូវបានព្រានព្រៃបាញ់សម្លាប់នៅក្នុងប្រទេសកេនយ៉ា ដែលវាគឺជាការបាត់បង់ដ៏ធំធេង ព្រោះវាជាសត្វកវែងពណ៌សដែលមានតែមួយប៉ុណ្ណោះក្នុងលោក។ នេះបើតាមការបញ្ជាក់របស់អ្នកអភិរក្សកាលពីថ្ងៃអង្គារម្សិលមិញនេះ។
សាកសពរបស់សត្វកវែងពណ៌ស ២ក្បាល ត្រូវបានគេប្រទះឃើញក្នុងសភាពជាគ្រោងឆ្អឹង ក្រោយពេលត្រូវបានបាញ់សម្លាប់ដោយព្រានព្រៃ នៅក្នុងតំបន់អភិរក្ស Garissan ភាគខាងកើតប្រទេសកេនយ៉ា។
ការស្លាប់របស់សត្វកវែញី ពណ៌ស និងកូនរបស់វា បណ្តាលឲ្យនៅសល់សត្វកវែងឈ្មោល ពណ៌សតែមួយក្បាលប៉ុណ្ណោះ។ សត្វកវែងឈ្មោលពណ៌ស គឺជាកូនរបស់សត្វញីដែលត្រូវគេសម្លាប់។
សូមបញ្ជាក់ថា សត្វកវែងពណ៌ដ៏កម្រ ទទួលបានការចាប់អារម្មណ៍យ៉ាងខ្លាំងកាលពីឆ្នាំ ២០១៧ នៅពេលដែលគេប្រទះឃើញវានៅក្នុងតំបន់អភិរក្ស ហើយការចាប់អារម្មណ៍នោះក៏ផ្ទុះឡើងម្តងទៀត នៅពេលដែលវាបង្កើតកូនបាន ២ក្បាល សុទ្ធតែពណ៌សដូចគ្នា កាលពីខែសីហា ឆ្នាំមុន៕
អត្ថបទប្រែសម្រួលដោយ៖ សុភ័ក្រ
ប្រភព៖ dailymail
