ពិតណាស់ ការកាត់ទោសរកយុត្តិធម៌ជូនជនរងគ្រោះ ក្នុងអំពើឧក្រិដ្ឋអ្វីមួយភ្លាមៗ ពីសំណាក់សាធារណជនបញ្ចេញកំហឹង ត្រូវបានសាទរដោយមនុស្សភាគច្រើន ប៉ុន្តែ រឿងនេះបើគិតតាមផ្លូវច្បាប់គឺខុសទាំងស្រុង ។ លើសពីនេះ ប្រសិនបើទង្វើនេះធ្វើខុស ទៅលើមនុស្សដែលមិនបានប្រព្រឹត្ត សួរថាអ្វីៗនឹងទៅជាយ៉ាងណា? ។
ជាក់ស្តែង ដូចករណីនេះអ៊ីចឹង ធ្វើឲ្យមហាជនមានការហួសចិត្តជាខ្លាំង នៅពេលដែលបុរសម្នាក់រស់នៅ Johor ដែលរងការចោទថាចាប់រំលោភក្មេងស្រីជំទង់អាយុ ១៦ ឆ្នាំម្នាក់ នៅក្នុងហាងខារ៉ាអូខេក្នុងតំបន់ ត្រូវបានហ្វូងមនុស្សមួយក្រុម ចាប់ស្រាត និងវាយដុំឡើងទ្រោម ប៉ុន្តែ ក្រោយមក នារីរងគ្រោះបែរជានិយាយសុំទោស ចំពោះអ្វីដែលនាងបានអះអាងថាបុរសនេះបានចាប់រំលោភនាង ។
មានការអះអាងថា អ្នកចាប់រំលោភបានលួងលោមក្មេងស្រីជំទង់អាយុ ១៦ ឆ្នាំ ឱ្យទៅខារ៉ាអូខេដើម្បីច្រៀង មុនពេលនាំនាងទៅបន្ទប់ផ្សេងទៀតដើម្បីលេងហ្គេមទូរស័ព្ទជាមួយគ្នា។ ទោះយ៉ាងណា ក្រោយមកបុរសនោះត្រូវបានចោទប្រកាន់ចាប់រំលោភនាងនៅក្នុងបន្ទប់។
នៅពេលត្រូវបានចាប់ចងដោយហ្វូងមនុស្ស បុរសនោះបានព្យាយាមអង្វរទុកជីវិតឲ្យរូបគេផង ដោយសូម្បីផ្តល់ប្រាក់ទៅហ្វូងមនុស្ស ដោយសង្ឃឹមថានឹងអាចរួចខ្លួន។ ប៉ុន្តែពួកគេបានឡោមព័ទ្ធ ហើយបង្ខំរូបគេឱ្យដោះសម្លៀកបំពាក់ចេញពីខ្លួន។
បន្ទាប់មក ពួកគេបានវាយទៅលើបុរសនេះ និងឈានដល់ទៅប្រើដបកែវ ដើម្បីវាយក្បាលបែកឈាមទៀតផង។
ទោះយ៉ាងណា រឿងហេតុដែលបានកើតឡើងនេះ គឺហាក់មិនដូចដែលបានពិពណ៌នានោះទេ ព្រោះភ្លាមៗបន្ទាប់ពីនោះ វីដេអូមួយត្រូវបានបញ្ចេញដោយនារីរងគ្រោះដែលបានចោទប្រកាន់ បានចេញមុខសុំអភ័យទោស។ តាមមើលទៅ នាងមិននឹកស្មានថា អ្វីដែលនាងបានធ្វើការចោទប្រកាន់ នាំឱ្យបុរសនោះត្រូវបានគេវាយដំយ៉ាងសាហាវដូច្នេះឡើយ។
នាងបាននិយាយថា៖ «ខ្ញុំគ្រាន់តែចង់និយាយថាសុំទោសចំពោះរឿងដែលបានកើតឡើងនេះផង ប្រហែលជាខ្ញុំមិនបានយល់នោះទេ នូវអ្វីខ្ញុំបាននិយាយថាគាត់បានចាប់រំលោភខ្ញុំ» ។
តាមរយៈសាច់រឿងខាងលើនេះ យើងសូមសំណូមពរដល់បងប្អូនមហាជន មុននឹងសម្រេច «រកយុត្តិធម៌ដោយកំហឹង» បែបនេះដល់នរណាម្នាក់ គួរណាស់សួរនាំភាគីទាំងសង្ខាងជាមុនសិន ព្រោះថាពេលខ្លះវាជារឿងឯកជនរបស់ពួកគេក៏ថាបាន ៕ អត្ថបទ៖ លឹម ហុង (ប្រភព៖ worldofbuzz)