ភ្នំពេញ៖ រដ្ឋបាលរាជធានីភ្នំពេញបើកកិច្ចប្រជុំស្ដីពីគម្រោងរៀបចំផ្លូវថ្មើរជើង នៅតាមបណ្តោយទន្លេចតុមុខ ចាប់ពីប្រៃសណីយ៍កម្ពុជារហូតដល់មុខព្រះបរមរាជវាំង ស្ថិតក្នុងភូមិសាស្ត្រខណ្ឌដូនពេញ រាជធានីភ្នំពេញ នារសៀលថ្ងៃអង្គារ ទី១០ ខែមីនា ឆ្នាំ២០២០នេះ ។
លោក ឃួង ស្រេង អភិបាល នៃគណៈអភិបាលរាជធានីភ្នពេញ ជាប្រធាននៃអង្គប្រជុំ បានសម្រេចឯកភាពតាមគម្រោង របស់មន្ទីរសាធារណការ និងដឹកជញ្ជូន រាជធានីភ្នំពេញ ដោយបែងចែកចេញជាបីដំណាក់កាល ក្នុងការស្ថាបនាគម្រោងមួយនេះ។
លោកសាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញ បានឲ្យដឹងថា គម្រោង ស្ថាបនាផ្លូវថ្មើរជើងខាងលើនេះ ស្ថិតនៅតាមតំបន់មាត់ទន្លេ ដែលរដ្ឋបាលរាជធានីភ្នំពេញ បានគិតគូយ៉ាងម៉ត់ចត់ទៅលើការកែលម្អនិងលើកកម្ពស់សោភ័ណ ភាពរាជធានីភ្នំពេញ និងទាក់ទាញភ្ញៀវទេសចរក៏ដូចជាបង្កើននូវប្រព័ន្ធផ្លូវធ្វើ ដំណើរឲ្យកាន់តែទូលំទូលាយ ជាពិសេសផ្លូវថ្មើរជើងតាមមាត់ទន្លេ។ លោកប្រធានមន្ទីរឲ្យដឹងទៀតថា ក្រៅពីស្ថាបនាផ្លូវថ្មើរជើងនេះ យើងនៅមានគម្រោងជាដំណាក់កាលច្រើនទៀតដូចជា ការបង្កើតផ្សាររាត្រីដែលលក់ដូរ ចាប់ពីម៉ោង៦ល្ងាចដល់ម៉ោង១១យប់ ផ្សារណាត់ Pub street វិថីម្ហូបអាហារ តំបន់ថ្មើរជើងសម្រាប់ភ្ញៀវទេសចរជាដើម។ ជាមួយគ្នានេះយើងក៏បានជជែកជាមួយអាជ្ញាធរ ដែនដីពាក់ព័ន្ធលើការរៀបចំសណ្តាប់ធ្នាប់ របៀបរៀបរយសាធារណៈដែលរហូត មកដល់ពេលនេះ អាជ្ញាធរបានរៀបចំសណ្តាប់ធ្នាប់ បានមួយចំនួនហើយ។
លោក ឃួង ស្រេង បានឯកភាពតាមគម្រោងរបស់មន្ទីរសាធារណការ និងដឹកជញ្ជូនរាជធានីភ្នំពេញ ដោយចែកចេញជា៣ដំណាក់កាល ក្នុងការស្ថាបនាគម្រោងមួយនេះ និងពន្លឿនការរៀបចំ និងស្ថាបនាផ្លូវថ្មើរជើងនេះ ឲ្យបានតាមការគ្រោងទុក។
លោកអភិបាលក៏បានអំពាវនាវដល់បងប្អូនប្រជាពលរដ្ឋ ដែលមានលំនៅដ្ឋានអមសងខាងទីតាំងខាងលើ ឲ្យចូលរួមសហការជាមួយអាជ្ញាធរ ដើម្បីពន្លឿនការងារស្ថាបនាផ្លូវថ្មើរជើងនេះ ទៅតាមគម្រោង ក៏ដូចសហការរៀបចំផលប៉ះពាល់លើ គម្រោងនេះ៕ដោយ៖កូឡាប