ខេត្តស្វាយរៀង៖មានរឿងហួសចិត្ត ស្ត្រីពិការម្នាក់អាយុ៧២ឆ្នាំ បានដើរទៅដុតជញ្ជ្រាំងនៅកណ្តាលវាលស្រែ បណ្តាលឲ្យភ្លើងជញ្ជ្រាំងឆាបឆេះយ៉ាងសន្ធោសន្ធៅ ធ្វើឲ្យឆេះស្លាប់យ៉ាងអណោចអធ័ម។ ករណីនេះបានកើតឡើងកាលពីវេលាម៉ោង២និង០៥នាទីរសៀល ថ្ងៃទី១០មីនា២០២០ នៅភូមិរមាំងថ្កោល ឃុំរមាំងថ្កោល ស្រុកស្វាយទាប ខត្តស្វាយរៀង។ តាមសមត្ថកិច្ចបានឲ្យដឹងថា៖ ជនរងគ្រោះមានឈ្មោះមាសហេង អាយុ៧២ឆ្នាំ រស់នៅភូមិឃុំកើតហេតុខាងលើ។
ប្រភពបានបន្តទៀតថា៖ នៅមុនពេលកើតហេតុ លោកយាយរងគ្រោះខាងលើ បានដុតពពក់ភ្លើង ក្នុងស្រែធ្វើជាជី ខណៈនោះភ្លើងក៏ឆេះរាលដល់ជញ្ជ្រាំងជាប់ភ្នក់ភ្លើង បណ្តាលឲ្យឆាបឆេះរាលពាត់ជុំជុំវិញយ៉ាងខ្លាំង ដោយលោកយាយខ្លាចរាលឆាបឆេះដល់ផ្ទះអ្នកស្រុក លោកយាយក៏ខំប្រឹងពន្លត់ភ្លើង ក៏ប៉ុន្តែលោកយាយជាមនុស្សពិការ មិនអាចពន្លត់ភ្លើងឈ្នះ ភ្លើងបានឆេះរាលព័ទ្ធជុំវិញលោកយាយ ខំកឹលគេចចេញដែរ តែមិនអាចចេញរួចម្យាងថ្ងៃក្តៅផង ធ្វើឲ្យលោកយាយអស់កម្លាំងដួលកណ្តាលភ្លើង ក៏ត្រូវភ្លើងឆេះស្លាប់ក្នុងអណ្តាតភ្លើងតែម្តង។ ខណៈនោះប្រជាពលរដ្ឋបានមកជួយដែរ តែអ្វីៗគឺហួសពេលទៅហើយ។ លោកមេឃុំរមាំងថ្កោល បានមកពិនិត្យនិងរាយការណ៍ មកសមត្ថកិច្ចជំនាញបានចុះមកពិនិត្យសាកសព និងប្រគល់សាកសពឲ្យខាងក្រុមគ្រួសារ យកទៅធ្វើបុណ្យតាមប្រពៃណី។ សូមបញ្ជាក់លោកយាយ គឺជាទុរគត់ជន រស់នៅ២នាក់បងប្អូនលោកយាយពិកាស្វិតជើងទាំងពីរ រីឯប្អូនស្រីវ័យ៥៧ឆ្នាំ គឺពិការគរថ្លង់ និងសតិមិនប្រកតីផង ពិតជាសង្វេកណាស់ ត្រូវការសប្បុរសជនជួយ៕ដោយ៖ វ៉ៃកូ