ខេត្តស្វាយរៀង៖យ៉ាងហោចណាស់បុរសម្នាក់ បានរងរបួសធ្ងន់ និងស្ត្រីម្នាក់ទៀតបានស្លាប់ នៅនិងកន្លែងកើតហេតុ ដោយសារគ្រោះថ្នាក់ចរាចរណ៍ ដែលបានកើតឡើងកាលពីវេលាម៉ោង១និង៤០នាទីយប់ ថ្ងៃទី១១ខែមីនាឆ្នាំ២០២០ នៅត្រង់ចន្លោះគីឡូម៉ែត្រលេខ១៥៩-១៦០ ស្ថិតក្នុងភូមិ ត្រពាំងផ្លុង សង្កាត់ បាទី ក្រុង បាវិត ខេត្តស្វាយរៀង។
សមត្ថកិច្ចបានឲ្យដឹងថា៖ នៅមុនពេលកើតហេតុមានម៉ូតូមួយគ្រឿងម៉ាក ហុងដា ស៊េរី២០១៥ ពាក់ផ្លាកលេខ ស្វាយរៀង1G3880 ជិះគ្នា២នាក់ បើកបរដោយឈ្មោះ សុខ ញឹក ភេទ ប្រុស ៣៦ឆ្នាំ ជនជាតិខ្មែរ មុខរបរចុងភៅ រស់នៅភូមិ តាបឹប សង្កាត់ បាវិត ក្រុងបាវិត (គ្មានពាក់មួកសុវត្ថិភាពម៉ូតូមានកញ្ចក់មើលក្រោយ) បើកបរពីលិចទៅកើត។ លុះមកដល់ចំណុចកើតហេតុខាងលើ ក៏បានបុកប៉ះនឹងទ្រូងចែកផ្លូវ បណ្ដាលឲ្យរងរបួសធ្ងន់ និងអ្នករួមដំណើរម្នាក់ឈ្មោះ រិន រឿន ភេទស្រី អាយុ ២៥ឆ្នាំ ជនជាតិខ្មែរ មុខរបរអ្នករត់តុ រស់នៅភូមិ ថ្លាង ឃុំ កោះជីវាង ស្រុក ឯកភ្នំ ខេត្តបាត់ដំបង (គ្មានពាក់មួកសុវត្ថិភាព) បណ្តាលឲ្យស្លាប់នៅនឹងកន្លែងកើតហេតុ។
បច្ចុប្បន្នអ្នករងរបួសធ្ងន់ ត្រូវបានបញ្ជូនទៅព្យាបាលនៅមន្ទីរពេទ្យបង្អែកខេត្តស្វាយរៀង។ រីឯសាកសព ត្រូវបានសមត្ថកិច្ច យកមកតម្កល់ទុកនៅវត្តពោធិថ្មី ស្ថិតក្នុងភូមិច្រកលាវ សង្កាត់បាវិត ក្រុងបាវិត ខេត្តស្វាយរៀង ដើម្បីរង់ចាំក្រុមគ្រួសារ មកយកទៅធ្វើបុណ្យតាមប្រពៃណី។
មូលហេតុ បណ្ដាលមកពីអ្នកបើកបរម៉ូតូ ប្រើប្រាស់ល្បឿនលឿនខ្វះការប្រុងប្រយ័ត្ន។ ចំពោះមធ្យោបាយ ម៉ូតូខូចខាតស្រាល ត្រូវបាន សមត្ថកិច្ចយករក្សាទុកនៅ អធិការដ្ឋាននគរបាលក្រុងបាវិត៕ដោយ៖ វ៉ៃកូ