ខេត្តស្វាយរៀង៖ លោកឧត្តមសេនីយ៍ត្រី សែ វុទ្ធី មេបញ្ជាការ កងរាជអាវុធហត្ថខេត្តស្វាយរៀង បានមានប្រសាសន៍ថា ស្ត្រីជាឆ្អឹងខ្នងដ៏សំខាន់ក្នុងការអភិវឌ្ឍន៍គ្រួសារ និងសង្គមជាតិ ដែលមិនអាចខ្វះបាន។
ការលើកឡើងរបស់លោកមេបញ្ជាការអាវុធខេត្តស្វាយរៀង បែបនេះនៅក្នុងឱកាស ដែលលោកបានអញ្ជើញជាអធិបតី
ក្នុងពិធីប្រជុំត្រួតពិនិត្យការអនុវត្តតួនាទី ភារកិច្ច និងការងារកងរាជអាវុធហត្ថប្រចាំខែមីនា ទិសដៅការងារខែមេសា ឆ្នាំ២០២០ និងអបអរសាទរខួបអនុស្សាវរីយ៍លើកទី១០៩ ទិវាអន្តរជាតិ ៨មីនា ឆ្នាំ២០២០ ក្រោមប្រធានបទ”មានសន្តិភាព មានការលើកកម្ពស់សមភាពយេនឌ័រ” នៅព្រឹកថ្ងៃទី១១ខែមីនាឆ្នាំ២០២០ ដែលមានការចូលរួមពីសំណាក់ លោក លោកស្រីមេបញ្ជាការរង លោកនាយរងសេនាធិការដ្ឋាន លោក លោកស្រីនាយការិយាល័យ លោកមេបញ្ជាការមូលដ្ឋានកងរាជអាវុធហត្ថក្រុង-ស្រុកទាំង៨ និងនាយអាវុធហត្ថជាច្រើនរូបទៀតផងដែរ។
លោកឧត្តមសេនីយ៍ត្រី សែ វុទ្ធី បានបន្តទៀតថា ការប្រារព្ធទិវាអន្តរជាតិ ៨មីនា ឆ្នាំ២០២០ នេះពិតជាចំគោលដៅ ដើម្បីលើកកម្ពស់ស្ថានភាពជីវភាព សិទ្ធិសេរីភាព ឋានៈតួនាទីរបស់ស្រ្តី នៅក្នុងសង្គម ក្នុងនាមយើងជាកម្លាំងកងរាជអាវុធហត្ថ នឹងបន្តគាំទ្រ ជំរុញដល់ស្ដ្រីក្នុងការចូលរួមជាស្នូលដ៏សំខាន់ ក្នុងការបំពេញកិច្ចការងារជួយជាតិ មាតុភូមិ។
លោកមេបញ្ជាការបានថ្លែងធ្វើការកោតសសើរ ដល់នាយទាហាន នាយទាហានរងទាំងអស់ដែលខិតខំធ្វើការងារកន្លងមក ដោយបានសហការជាមួយអាជ្ញាធរដែនដី និងអ្នកដែលពាក់ព័ន្ធទាំងអស់ ក្នុងខេត្តដើម្បីការពារសន្តិសុខសណ្តាប់ធ្នាប់ សង្គមជូនប្រជាពលរដ្ឋបានល្អប្រសើរ ធ្វើឲ្យមានការកោតសរសើរ និងទទួលស្គាល់ពីសំណាក់ថ្នាក់ដឹកនាំ ក្រសួងការពារជាតិ កងរាជអាវុធហត្ថលើផ្ទៃប្រទេស និងអភិបាលខេត្តស្វាយរៀងផងដែរ។
លោកក៏បានផ្តាំផ្ញើរដល់មន្ត្រីអាវុធហត្ថទាំងអស់ ត្រូវពង្រឹងបណ្ដាញក្ដាប់យកព័ត៌មាន ដែលបង្កឱ្យវឹកវរដល់សង្គម នៅជុំវិញខេត្តនិងបន្ដការស្រាវជ្រាវ មុខសញ្ញាបទល្មើស។ មិនតែប៉ុណ្ណោះ ត្រូវថែរក្សាសម្ភារបរិក្ខារដែលមានស្រាប់ និងធ្វើការវាយតម្លៃទៅលើអគារ សម្ភារប្រើប្រាស់ មធ្យោបាយធ្វើដំណើរ។
នៅក្នុងឱកាសនោះ លោកឧត្តមសេនីយ៍ត្រី មេបញ្ជាការ បានផ្តល់ជូនដល់អាវុធហត្ថនារីចំនួន ១២នាក់ ក្នុងម្នាក់ៗទទួលបានក្រណាត់សំពត់ហូលមួយ ក្រណាត់អាវប៉ាក់មួយ និងថវិកាចំនួន៥០០០០រៀល៕ ដោយ៖វ៉ៃកូ